Ieremia

29 TEIA te au tuatua i te leta ta te peroveta ra ta Ieremia i akau, mei Ierusalema atu, ki te toenga o te aronga pakari o te au tuikaa ra, e te kau taunga, ma te au peroveta, e te tangata katoa, i apai tuikaaia e Nebukanesa ki Babulonia, mei Ierusalema atu;

2 i muri ake i te riro anga o te ariki ra ko Iekonia, ma te ariki vaine, e te au eunuka, e te ui ariki o Iuda, e to Ierusalema, e te aronga tarai rakau ra, e te aronga tupaki auri, mei Ierusalema atu;

3 I te rima o Elasa, te tamaiti a Saphana, e o Gemaria, te tamaiti a Hilikia ra, i ta te ariki o Iuda ta Zedekia i akaunga ki Babulonia, ki te ariki o Babulonia ia Nebukanesa ra, na ko akera,

4 Te na ko mairā Iehova Sabaota ra, te Atua o Iseraela, ki te au tuikaa katoa ra, ki taku i akaue kia apai tuikaaia ki Babulonia, mei Ierusalema atu nei;

5 E akatu kotou i te are, e ka noo ki roto, e tanu oki i te kainga, ka kai ei i te kai o te reira ra;

6 E rave i te vaine, e akaanau tama i te tamariki tamaroa, e te tamaine; e rave oki i te vaine na ta kotou au tamariki, e oronga oki i ta kotou au tamaine na te tane, kia anau mai oki ta ratou, i te tamaroa e te tamaine; e kia rai oki kotou i reira, auraka kia iti.

7 E kimi oki kotou i te au no taua oire ra, tei apai tuikaaia kotou e au ra i reira, e e pure kia Iehova i te reira; ko to te reira au, ko to kotou katoa rai ïa au.

8 Te na ko maira oki a Iehova Sabaota ra, te Atua o Iseraela; Auraka ta kotou au peroveta i roto ia kotou ra, e ta kotou au tauraatua, e pikikaa mai ia kotou, auraka oki kotou e akarongo i to kotou aronga moe, ta kotou e akamoe ra.

9 E pikikaa oki ta ratou i totou ia kotou i toku nei ingoa, kare au i tono ia ratou, te tuatua mairā Iehova.

10 Te na ko maira oki a Iehova, Kia ope nga mataiti e itu ngauru i Babulonia ra, e atoro atu ei au ia kotou, e e akatupu au i taku tuatua meitaki ia kotou i reira, i te akaoki anga mai ia kotou ki teianei ngai.

11 Kua kite oki au i te au akakoro anga taku i akakoro ia kotou nei, te tuatua mairā Iehova, e akakoro anga au ïa, kare to te kino, kia oronga atu au ia kotou i te openga ta kotou i manako ra.

12 E kapiki mai oki kotou iaku, e aere oki kotou e pure mai iaku, e naku e akarongo atu ia kotou.

13 E kimi mai oki kotou iaku, e kitea au e kotou, kia kimi mai kotou iaku ma te ngakau katoa ra.

14 E kitea au e kotou, te tuatua mairā Iehova: e e ruri ke au i taua tuikaa anga no kotou ra, e akaputuputu mai au ia kotou, mei te au enua katoa mai, e mei te au ngai katoa i tuaruia atu ei kotou e au ra, te tuatua mairā Iehova; e arataki akaou mai au ia kotou ki taua ngai i tuku atu ei au ia kotou kia apai tuikaaia ra.

15 No te mea, kua tuatua mai kotou e, Kua akutupu io nei a Iehova i te au peroveta na tatou ki Babulonia nei;

16 Te na ko mairā Iehova i te ariki e noo ki runga i te terono o Davida, e i te au tangata katoa e noo i teianei oire, i to kotou au taeake, kare i riro katoa i tenana tuikaa anga ra:

17 Te na ko mairā Iehova Sabaota ra, I na, ka akaunga atu au i te koke ki runga ia ratou, te onge, e te maki-mate; e akariro au ia ratou mei te suke kino roa ra, tei kore e tika kia kai i te kino.

18 E aru atu au ia ratou i te koke, te onge, e te maki-mate; e tuku atu au ia ratou no te manamanata i te au basileia katoa i te ao nei, ei tao anga, e ei vavaranga, e ei akavaavaa anga, e ei akakino anga, i te au enua katoa ra, tei tuaruia atu ratou e au ra;

19 Ratou kare i akarongo mai ki taku nei tuatua, te tuatua mairā Iehova, iaku oki i tono atu i toku au tavini i te au peroveta, ma te tu popongi oki, e te tono anga atu, kare ra kotou i akarongo ra, te tuatua mairā Iehova.

20 E tenana, e akarongo mai kotou i te tuatua a Iehova, e to te tuikaa katoa ra, tei tonokia e au ki Babulonia mei Ierusalema atu nei:

21 Te na ko mairā Iehova Sabaota ra, te Atua no Iseraela, ia Ahaba, te tamaiti a Kolaia ra, e ia Zedekia, te tamaiti a Maaseia, tei totou atu ia kotou i te tuatua pikikaa i toku nei ingoa ra; I na, e tuku atu au ia raua ki te rima o te ariki o Babulonia, kia Nebukanesa ra; e nana raua e ta ki mua i to kotou mata;

22 E no raua ka raveiaʼi te tuatua akakino e te au tuikaa katoa o Iuda i Babulonia ra, i te na ko anga e, Kia akariroia koe e Iehova mei ia Zedekia, e mei ia Ahaba, i tei tunuia e te ariki o Babulonia ki te ai.

23 No te mea kua rave raua i te tuatua neneva i Iseraela nei, e kua akaturi i te au vaine a to raua tangata tupu ra, e kua tuatua i te tuatua pikikaa i toku nei ingoa, kare oki au i akaue atu ia raua; kua kite oki au, ko au uaorai te kite, te tuatua mairā Iehova.

24 E ka karanga katoa atu koe kia Semaia te Nehelemi ra, e na ko atu,

25 Te na ko mairā Iehova Sabaota ra, te Atua no Iseraela, na ko maira, No te mea kua akau koe i te au leta i toou uaorai ingoa, ki te au tangata katoa i noo i Ierusalema, e kia Zephania, te tamaiti a Maaseia taunga ra, e te kau taunga katoa ra, i te na ko anga e,

26 Kua akariro a Iehova ia koe ei taunga ei tupau ia Iehoiada taunga ra, kia riro kotou ei aronga taoonga i te are o Iehova, ko te nenevaia oki tetai tangata atu, e ko te karanga iaia uaorai e peroveta, kia tuku atu koe iaia ki roto i te patiti ra, e ki roto i te are tapeka anga.

27 E tenana, eaa koe i kore ei i akamura atu ia Ieremia no Anatota, ko tei akariro iaia uaorai ei peroveta kia kotou na?

28 No te mea kua akau mai aia i te tuatua kia matou ki Babulonia, i te na ko anga mai e, E roa te tuatau: e patu kotou i te are, ka noo ei ki roto; e tanu oki i te kainga, ka kai ei i te kai o te reira.

29 Kua tatau iora te taunga ra ko Zephania i taua leta ra ki mua i te aroaro o te peroveta ra ko Ieremia.

30 I tae mai ei te tuatua a Iehova kia Ieremia, i te na ko anga mai,

31 E tono atu koe ki to te au tuikaa katoa ra, ka na ko atu ei, Te na ko mairā Iehova ia Semaia te Nehelemi ra; No te mea kua totou atu a Semaia kia kotou na, kare oki au i tono iaia ra, e nona kotou i irinaki ei ki te tuatua pikikaa ra:

32 E teianei, te na ko mairā Iehova, I na, e tutaki atu au ia Semaia te Nehelemi ra, e tona ra unga: e kare rava tetai tangata nona e noo ki rotopu i teianei iti-tangata; kare oki aia e kite i te meitaki taku e rave i toku nei au tangata, te tuatua mairā Iehova; no te mea kua tuatua aia i te meameaau ia Iehova nei.