Hosea

5 E AKARONGO mai kotou i teia, e te kau taunga e; e e akono mai kotou, e te ngutuare o Iseraela e; e e ariu mai i to kotou taringa, e te are o te ariki e, no kotou oki te tuatua-tau i tikai i riro ana ra kotou ei ereere i Mizepa, e ei kupenga totoaia ki runga ia Tabora.

2 Te ta maata rava nei te aronga titima, e teianei, ko ratou katoa ra taku e ako.

3 Kua kite au ia Epheraima, e kare oki a Iseraela i ngaro iaku: e tenana oki, e Epheraima, te akaturi na koe , e kua viivii Iseraela.

4 Kare ratou e kimi i te ravenga kia oki akaou ki to ratou Atua: e ngakau kanga oki tei roto ia ratou, e kare ratou i kite ia Iehova,

5 E te akakite nei te nengonengo o Iseraela ki mua i tona mata; e teianei, e inga Iseraela ma Epheraima i ta raua ara; ko Iuda ma ratou katoa i te inga anga.

6 Ma ta ratou au anana mamoe e ta ratou au puakatoro ka aere ei ratou ka kimi ia Iehova, kare ra aia e kitea e ratou; kua aere ke oki aia ia ratou.

7 Kua pikikaa ratou ia Iehova: e tamariki ke ke anake ta ratou i anau; e teianei; e pou ratou e ta ratou au tuanga i te marama okotai.

8 Ka akatangi ana i te pu i Gibea, e te pu uipa i Rama: e kapiki nui i Bete-avene; tei murio aia ia koe, e Beniamina.

9 E tanea Epheraima i te rā i akoia atu ei ra: kua akakite atu i te ka tupu tikai i rotopu i te au kopu o Iseraela.

10 Kua aite te ui ariki o Iuda ki te aronga e apai ke i te kena kainga: e riringi atu au i taku riri ki runga ia ratou mei te vai ra.

11 Kua akateiaaia Epheraima, e kua aatiia ra i te akava anga; no te mea kua aru rekareka aia i tei akaueia ra.

12 E teianei e riro au mei te neu ia Epheraima, e mei te pe i te ngutuare o Iuda.

13 Kite akera Epheraima i tona maki, e Iuda i tona puta; kua aere iora Epheraima ki Asura, e kua tono ki te ariki ra ki te ekai: kare ra i tika iaia i te akaora ia kotou, e to kotou puta kare i ora iaia.

14 E riro oki au mei te liona ou ia Epharaima, e mei te liona ou i te ngutuare o Iuda: ko au nei, e aeae au, e e aere ke; e naku e apai ke atu, e kare e akaora.

15 E aere au, e oki au ki toku ra ngai, e ki aaki mai ratou i ta ratou ara, e kia kimi mai i toku mata: kia rokoia ratou e te tumatetenga ra, e kimi vave mai ïa ratou iaku.