Iobu

42 KUA karanga aturā Iobu kia Iehova, na ko atura.

2 Kua kite au e, e tika ia koe te au mea katoatoa, e kare taau i manako ra e tika kia akakore.

3 Koai teia e tangarongaro i te tuatua i te kite kore? kua tuatua au i tei kore i kitea e au ra; e au mea taka ke rava iaku nei, kare i kitea e au.

4 Tera taku tuatua kia koe, e akarongo mai koe, e naku e karanga atu: e ui atu au ia koe, e naau e akakite mai kiaku.

5 I kite akenei au ia koe i te kite taringa nei; i teianei ra, te akara nei taku mata ia koe;

6 E teianei te akaviivii nei au iaku uaorai, e te tataraara nei au i raro i te one-pueu e te reu.

7 E oti akera taua au tuatua nei i te tuatuaia atu e Iehova kia Iobu, kua karanga aturā Iehova kia Eliphaza ngati Temana, Kua tupu toku riri ia koe, e nga oa katoa noou ra toko rua; kare oki ta kotou tuatua i tau iaku, mei ta toku tavini mei ta Iobu.

8 E tenana, ka rave kotou i nga puakatoro e itu ra, e nga mamoe toa oki e itu, na kotou, ka aere atu ei ki toku tavini ra kia Iobu, ka apai ei i tetai atinga karakaratio na kotou; e na taku tavini na Iobu e pure ia kotou: koia taku tangata e kite atu; e ko te rave aea au ia kotou kia tau i ta kotou tuatua neneva; kare oki i tau ta kotou tuatua iaku, mei ta taku tavini mei ta Iobu.

9 Kua aere iorā Eliphaza ngati Temana, e ko Biladada ngati Sua, e ko Zophara i Naama, e kua pera i ta Iehova i akaue mai ia ratou ra: e kua kite mairai a Iehova ia Iobu.

10 Kua ruri ke akerā Iehova i taua eketumu anga o Iobu ra, kia oti ake tana pure i nga oa nona ra: e kua tataki rua mairā Iehova i ta Iobu apinga i tei rauka iaia i muatangana ra.

11 Kua aere anake maira tona au taeake katoa kiaia i reira, e tona au tuaine katoa, e te au oa takere ravarai nona ra, e kua kai iora i te manga ki ona ra ki roto i tona uaorai are: e kua tangi iora ratou iaia, e kua akarekareka akera iaia i te au kino katoatoa i apaiia mai e Iehova ki runga iaia: e kua apai atura te tangata katoa i tetai manga moni nana, e tetai poe auro e pini ua akera ratou katoa ra.

12 Akameitaki roa akerā Iehova i to Iobu openga i to tona muatangana: okotai ngauru ma a oki ana tausani i te mamoe, e ono tuasini i te kamela, e rua tausani i te puakatoro, okotai tausani asini ua.

13 Toko itu oki ana puke tamariki tamaroa, e toko toru tamaine.

14 Tapaia iora te ingoa o tei mua ra ia Iemima; e te ingoa o te toko rua ra ia Kezia; e te ingoa o te toko toru ra ia Kereneapuka.

15 E kare rava i kitea i taua enua katoa ra te vaine e tau ki te au tamaine a Iobu i te memeitaki: e kua oronga maira to ratou metua tane i tetai tuanga i roto katoa i to ratou au tungane.

16 E muri ake i reira, te ora ua rā Iobu e okotai akera anere e a ngauru i te mataiti, e kua kite i tana au tamariki, e te au tamariki katoa a aua nga tamariki nana ra, e a katoa uki ra.

17 Mate iorā Iobu kua ruaine, e ma te iu i tona ra puke rā.