Zekaria

9 TE totou ra i te tuatua a Iehova; ei runga i te enua o Hadaraka, e ei Damaseko, vaoo ei; ka akara atu oki te mata o te tangata, e to te au kopu katoa o Iseraela, kia Iehova;

2 E e ia Hamata katoa e piri mai ki vaitata ki te reira; ko Turia, e Sidona, maata uaʼi tona pakari.

3 Patu ua rai Turia i te punanga nona, e kua akaputuputu i te ario mei te one-pueu ra, e te auro meitaki mei te vari i te au arataa ra;

4 I na, e kikaia aia e te Atu ki vao, e e ta oki aia i tona mana i te moana, e pou oki aia uaorai i te ai.

5 E kite Asekelona, e e riro i te mataku; ko Gaza katoa oki, e ka rokoia e te mamae maata; e ko Ekerona, no te mea, kua taakamaia aia e tona manako anga; ka mate oki te ariki i Gaza ra, e kare Asekelona e tangataia.

6 E e tangata ke te ka noo i Asedoda, e e tipu keia e au te nengonengo o te Philiseti.

7 E e rave keia e au te toto i tona vaa, e tona ra au mea viivii i roto i tona ra au nio: e e riro rai aia i te akatoeia no to tatou Atuia, e riro oki aia mei te tutara i Iuda, e Ekerona oki mei te ngati Iebusi ra.

8 E no te nuku e patiaʼi au i te puakapa i toku are e pini ua ake, no tei aere na roto, e no tei oki mai; e kare atura ratou e aere akaouia e te takinga-kino na roto ra, te akara nei rai oki au i toku mata.

9 Kia rekareka maata koe, e te tamaine a Ziona e; ka maeva na, e te tamaine a Ierusalema e; i na, te aere maira to ariki kia koe ra; e tuatua-tika tana, e tei iaia te ora; e akaaka tona, e te noo anga ki runga i te asini, e te punua oki, te anaunga a te asini.

10 E e tipu keia e au te kariota i Epheraima, e te oroenua i Ierusalema; e tipu keia oki te ana tamaki; e nana e tuatua i te au ki te au etene; e riro oki tona au mei tetai tai e tae ua atu ki tetai tai, e mei te kauvai mai e tae ua atu ki te au openga o te enua ra.

11 Kareka ko koe katoa oki, no te toto i te koreromotu naau ra, i tuku atu ei au i to aronga i tapekaia ra ki vao i te vaarua, kare e vai o roto ra.

12 E oki mai kotou ki te akapuanga ketaketa, e te aronga manakonako i tapekaia ra e, te akakite atu nei au i teianei rā, e ka paparua taku e apai atu kia koe ra.

13 Kua akamingi oki au ia Iuda noku uaorai, kua akaki au i te ana ia Epheraima, e kua akatupu au i to au tamariki, e Ziona e, ei patoi i taau ra au tamariki, e Eleni e, e kua akariro ia koe mei te koke o te tangata ririnui ra.

14 E ka kitea oki a Iehova no ratou, e e peke tana au kakao mei te uira ra; e na te Atu ra oki na Iehova e akatangi i te pu, ka aere ei ma te puaioio i apatonga ra.

15 Na Iehova Sabaota e akaruru ia ratou; e kai oki ratou, e e takatakai i te au toka maka ra; e inu oki ratou, e kapikipiki oki, mei te mea e no te wina; e akakiia ratou mei te āriki vai ra, mei nga poo o te atarau ra.

16 E na to ratou Atua na Iehova e akaora ia ratou i taua rā ra, mei te anana o tona iti tangata ra: ka riro oki ratou mei te au toka korona ra i te akateitei anga ia ratou uaorai i runga i tona ra enua.

17 Te maata oki o tona meitaki e! e te maata oki o tona manea e! E maroiroi te au tangata ou i te sitona, e te au tamaine i te wina ou.