Levitiku

11 KUA tuatua mairā Iehova kia Mose raua ko Aarona, na ko maira kia raua,

2 E karanga atu ki te tamariki a Iseraela, e na ko atu, Teia ta kotou au puaka e kai no te au puaka ravarai o te enua nei.

3 To te au puaka katoa i ngaa te maikuku ra, e tei vaʼiia ra te tapuae, e tei tamaru i te kai ra, e kai ïa kotou. 4 Kareka ko tei tamaru ua i te kai ra, e tei ngaa ua te maikuku ra, auraka ïa kotou e kai: mei te kamela, e tamaru rai oki aia i te kai, kare ra ona maikuku i ngaa; ei mea viivii ïa ia kotou: 5 E te saphana, e tamaru rai oki aia i te kai, kare ra ona maikuku i ngaa; ei mea viivii ïa ia kotou: 6 E te aranebeta, e tamaru rai oki aia i te kai, kare ra ona maikuku i ngaa; ei mea viivii ïa ia kotou:

7 E te puaka-maori, e maikuku ngaa rai oki tona, te vaʼiia ra te tapuae, no te mea ra kare aia e tamaru i te kai, ei mea viivii ïa ia kotou.

8 Auraka roa kotou e kai i to te reira kiko, auraka oki kotou e akatukia ua atu i te reira kia mate ra, ei mea viivii ïa ia kotou.

9 Teia ta kotou e kai i to te au mea katoa i raro i te tai e te vai; ko te au mea katoa i peauia ra, e te poa, ki raro i te tai, e ki raro i te kauvai, ko ta kotou ïa e kai.

10 Kareka te au mea ravarai, to te tai, e to te kauvai, kare e peau e te poa, to te au mea katoa e keukeu aere i raro i te tai e te vai, e to te au mea ora katoa, i raro i te tai e te vai, ei mea rikarika anake ïa te reira ia kotou:

11 Ei mea rikarika ïa te reira ia kotou; auraka roa kotou e kai i te kiko o te reira; kia rikarika tikai ra kotou i te reira kia mate.

12 Ko to te tai e to te vai katoa, kare e peau e te poa ra, ei mea rikarika ïa ia kotou.

13 E to te au manu ra, teia ta kotou e rikarika ra; auraka roa ïa e keingaia, e mea rikarika ïa: koia te aeto, e te peresa, e te ozeni, 14 E te dae, e te aie i to ratou tu; 15 E te orebi i to ratou tu;

16 E te ione, e te takemesa, e te sakapha, e te neza i to ratou tu;

17 E te kusa, e te salaka, e te ianesupha,

18 E te tenesemeta, e te kate, e te rakama,

19 E te kasida, e te kotuku i to ratou tu, e te dukipata, e te moa kirikiri. 20 Te au manu vaevae a e totoro aere ua ra, ei mea rikarika ïa ia kotou.

21 Kareka te au manu vaevae a totoro aere ua, e vaevae ke to ratou ei runga ake nga vaevae e totoro ei ra, ei rere aere anga ki runga i te enua nei, e kai kotou i te reira: 22 Teia ta kotou e kai i te reira: ko te tāpaki i to ratou tu, e te saloma i to ratou tu, e te karegala i to ratou tu, e te kereteki i to ratou tu.

23 Kareka te au mea rere vaevae a katoa e totoro aere ra, ei mea rikarika anake ïa ia kotou.

24 E e viivii kotou i taua au mea ra: ko te tukia ua atu i te reira au mea kia mate ra, e viivii ïa e aiai ua atu.

25 E ko tei apai ua atu i tetai i taua au mea ra kia mate, e orei aia i ona kakau, e viivii oki aia e aiai ua atu.

26 Te au puaka ravarai i ngaa te maikuku, kare ra e vaʼiia te tapuae, e kare oki i tamaru i te kai ra, ei mea viivii ïa ia kotou; ko te tukia ua atu i te reira kia mate ra, e viivii ïa. 27 E te au mea vaevae matikuku ravarai e aere nei, i roto i nga mea ora e aere i nga vaevae e a ra, ei mea viivii anake ïa ia kotou: ko te tukia ua atu i te reira kia mate ra, e viivii ïa e aiai ua atu.

28 E ko tei apai ua atu i taua au mea me mate ra, e orei aia i ona kakau, e viivii ïa e aiai ua atu; ei mea viivii ïa te reira ia kotou. 29 Teia katoa te mea viivii ia kotou i to te au mea e totoro aere ua ki runga i te enua nei; ko te keleda, e te kiore, e te moko nui i to ratou tu.

30 E te anaka, e te moko kai tangata, e te moko, e te kometa, e te tenesemeta.

31 E mea viivii anake taua au mea nei ia kotou, no te au mea e totoro aere nei: ko te tukia ua atu i te reira kia mate ra, e viivii ïa e aiai ua atu.

32 E te au mea ravarai i topaia e taua au mea nei kia mate, e viivii ïa; mei te kapu rakau ra, e te kakau, e te kiri, e te pute, te au āriki katoa i ārikiia te apinga ra, e tukuia ïa ki raro i te vai, e viivii ïa e aiai ua atu, ei reira e mā ai.

33 Kareka te au āriki karakaraea, kia topaia e taua au mea ra ki roto, ko to roto i taua āriki ra, e viivii ïa; e e vavaʼi kotou i te reira ra. 34 Te au kai katoa e keingaia, kia ku i te reira vai, e viivii ïa; e te au mea katoa e inumia i roto i te reira āriki, e viivii ïa. 35 E te au mea katoa i topaia e taua au mea ra kia mate, e viivii ïa; mei te umu ra, e te toka pange pani ra; e vavaʼiia ïa ki raro: e mea viivii ïa, e ka riro oki ei mea viivii ia kotou.

36 Kareka te punavai, e te rua e vai maata tei roto, kare ïa e viivii; ko te tukia ua atura i taua au mea ra kia mate, e viivii ïa. 37 E kia topa tetai vaʼi i taua au mea i mate ra ki runga i te ua e tanumia ra, kare ïa e viivii. 38 E vai ra tei tukuia ki rungao i taua au ua ra, ka topaiaʼi e taua au mea mate ra, ei mea viivii ïa te reira ia kotou.

39 E kia mate ua tetai o te au puaka e kaingaia e kotou na; ko te tukia ua atu i taua mea mate ua ra, e viivii ia e aiai ua atu: 40 E ko te kai i taua mea mate ua ra, ka orei aia i ona kakau, e e viivii ïa e aiai ua atu: e ko te apai ua i taua mea mate ua ra, ka orei aia i ona kakau, e e viivii ia e aiai ua atu.

41 Kareka te au mea e totoro aere ua ki runga i te enua ra, ei mea rikarika anake ïa; auraka roa e keingaia.

42 Ko tei aere ua i raro te kopu ra, e te au mea vaevae a e aere ua ra, e te vaevae manganui, i te au mea totoro ravarai e totoro aere ua ki runga i te enua ra, auraka roa kotou e kai i te reira; e mea rikarika ïa. 43 Auraka rava kotou e akariro ia kotou uaorai ei mea rikarika i te au mea katoa e totoro aere ua nei, auraka kotou e akaviivii ia kotou uaorai i te reira, kia viivii kotou i taua au mea ra.

44 Ko au oki to kotou Atua ra ko Iehova; e akatapu oki ia kotou uaorai, kia tapu kotou; no te mea te tapu nei au: auraka oki kotou e akaviivii ia kotou uaorai i te au mea totoro e totoro aere ua ki runga i te enua ra.

45 Ko au nei oki, ko Iehova, tei arataki mai ia kotou, mei te enua maira mei Aiphiti, kia riro au ei Atua no kotou: kia tapu oki kotou, no te mea te tapu nei au.

46 Ko te ture teia no te au puaka, e no te au manu, e no te au mea ora e tere aere ki raro i te tai e te vai, e no te au mea ravarai e totoro aere ki runga i te enua nei:

47 Ei akataka anga i te mea viivii e te mea viivii kore, e kia taka oki te au mea ora e tika kia kai, e te au mea ora kare e tika kia kai.