Au Uianga a te Aronga Tatau

Te tatau ra a Deuteronomi 14:21 e: “Auraka kotou e kai i te mea mate ua ra.” Te tuke ra ainei tera kia Levitiku 11:40, tei tatau e: “E ko te kai i taua mea mate ua ra, ka orei aia i ona kakau, e e viivii ïa e aiai ua atu”?

Kare e tuke i rotopu i teia nga irava e rua. Te ripiti ra te irava mua i te araianga e auraka kia kai i tetai manu tei mate, penei tetai tei taiaia e te au puaka taetaevao. (Exodo 22:31; Levitiku 22:8) Te rua te akamarama ra eaa ta tetai tangata Iseraela penei ka rave me aati aia i taua ture ra, penei ma te akakoro kore.

Ko te tika e kua araiia tetai apinga e te Ture kare tona aiteanga e kare te araianga e kopaeia i tetai au taime. Ei akaraanga, te vai ra te au ture no te keikeia, te ta tangata, te kite pikikaa, e te vai atura. I taua taime rai, te vai ra te au utunga no te aati i taua au ture ra a te Atua. Kua riro taua au ture ra i te akaketaketa i te au ture e i te akaari i te pakari tikai o te reira.

Tetai tangata tei aati i te araianga e auraka kia kai i te kiko o tetai manu tei mate ka viivii aia i mua i te aroaro o Iehova e ka anoanoia kia na roto i te au takainga tau no te tamaanga. Me kare e rauka iaia i te tama meitaki iaia uaorai, tei runga iaia “tana ara vaoo ei.”​—Levitiku 17:15, 16.