Numero

22 KUA aere maira te tamariki a Iseraela, kua patia iora i te puakapa i te au ngai mataataa i Moabi i tera pae Ioridana, i aite kia Ieriko ra.

2 E kite akerā Balaka, te tamaiti a Zipora, i te au mea katoa ta Iseraela i rave i te ngati Amori ra.

3 Mataku rava akera to Moabi i taua aronga tangata ra, no te mea e toko rai ratou: tumatetenga rava akera to Moabi i te tamariki a Iseraela.

4 Kua tuatua akera Moabi ki te aronga pakari i Midiana ra, Ka pou rava te au mea katoa i taua aronga ra, e pini ua ake tatou nei, mei te ngangaere o te enua e pou i te puakatoro nei. Ko Balaka te tamaiti a Zipora te ariki o Moabi i reira.

5 E kua tono akera aia i te karere kia Balaama te tamaiti a Beora, ki Petora, i te pae vai i te enua o te tamariki a tona ra au tangata ra, e tiki iaia, e karanga atu e, I na, e urupu tangata tera ake mei Aiphiti mai; i na, kua kapi te enua ia ratou, e tei muao iaku nei ratou i te noo anga:

6 E tenana, teia taku tuatua kia koe, e aere mai koe, e taumaa i teianei aronga naku; e ririnui oki to ratou i toku: peneiake ko te rauka iaku kia pou ratou iaku, e kia arumaki atu au ia ratou i te enua nei: kua kite oki au e, ko tei akameitakiia e koe ra kua meitaki ïa, e tei taumaaia e koe ra kua taumaa ïa.

7 Aere atura te aronga pakari o Moabi, e te aronga pakari o Midiana, ma te tutaki tauraatua i to ratou rima; tae atura ratou kia Balaama ra, e kua karanga atura kiaia i te tuatua a Balaka.

8 Kua tuatua maira aia kia ratou, E moe i ko nei i teianei po, e naku e akakite kia kotou i te tuatua ta Iehova e tuatua mai kiaku. Noo iora aua nga tutara o Moabi ra kia Balaama ra.

9 Kua aere maira te Atu kia Balaama ra, e kua tuatua maira, Eaa tenana au tangata kia koe na?

10 Kua karanga aturā Balaama ki te Atua, Na te ariki o Moabi, na Balaka te tamaiti a Zipora, i tono mai ia ratou kiaku nei, e tuatua mai kiaku e, 11 I na, e urupu tangata tera ake mei Aiphiti mai, e kua kapi te enua ia ratou; e aere mai koe i tenana e taumaa i taua aronga nei naku; peneiake ko te pou ratou iaku, e kia arumaki ke atu au ia ratou.

12 Kua tuatua maira te Atua kia Balaama, Auraka koe e aere i to ratou tere; auraka koe e taumaa i taua iti-tangata ra; kua meitaki oki ratou.

13 Kua tu akerā Balaama ki runga i te popongi ra, kua karanga atura ki nga tutara no ko ia Balaka ra, Ka oki ki to kotou na enua: kare oki a Iehova e tuku iaku, kia aere au i to kotou tere.

14 Kua tu akera taua aronga tutara o Moabi ra, kua oki maira kia Balaka ra, e kua tuatua maira, Kare a Balaama e keu.

15 Kua tono akaou aturā Balaka i te aronga tutara, e maata ïa, e te mana maata atu ïa, i tetai aronga ra.

16 E tae atura ratou kia Balaama ra, e kua karanga atura kiaia, Te na ko mairā Balaka te tamaiti a Zipora, Auraka roa koe e akono i te tāpu, e aere mairai koe kiaku nei:

17 E akangateitei rava atu oki au ia koe kia maata roa, e taau e tuatua mai kiaku ra, naku ïa e rave: e tenana, teia taku tuatua kia koe, e aere mai koe, e taumaa i teianei aronga naku.

18 Kua tuatua mairā Balaama ki taua au tavini o Balaka ra, na ko maira, Oronga ua mai a Balaka i te ario e te auro naku, e kia ki ua atu tona are, kare rai e tika iaku kia rave i tetai ngai mea ngiti e tetai mea maata, mari ra ta taku Atua ra ta Iehova e tuatua maira.

19 E tenana, teia taku tuatua, ka moe kotou i ko nei i teianei po, kia kite rai au i ta Iehova e tuatua mairai kiaku.

20 Kua aere maira te Atua kia Balaama ra i te po, e kua tuatua maira kiaia, Kia tiki mai taua au tangata ra ia koe, e tu koe ki runga, e aere katoa; ko taku ra e karanga atu kia koe ra, ko te reira anake ra taau e rave.

21 E popongi akera kua tu akerā Balaama ki runga, tuku akera te nooanga ki runga i tana asini, aere katoa atura e taua au tutara o Moabi ra.

22 Riri akera te Atua no te mea koia i aere; e kua tu iora te Angela a Iehova i te arataa e arai iaia. Tei rungao aia i tana asini, e nga tavini nona toko rua i te aere katoa ra. 23 Kite atura te asini i taua Angela a Iehova ra i te tu ua anga i te arataa ra, ma tana koke i unuiia i tona rima: kua anga ke akera te asini ki te ngai atea, akaruke iora i taua ara ra; kua ta iorā Balaama i te asini e akaariu rai ki taua arataa ra. 24 Kua tu ra te Angela a Iehova i te arataa i rotopu i nga kainga vine, e patu tei teia pae, e e patu tei tera pae.

25 E kite akera te asini i te Angela a Iehova ra, kua tapae ua atura aia ki taua patu ra, paîî akera te vaevae o Balaama i taua patu ra; kua ta akaou iora aia iaia. 26 E aere atura te Angela a Iehova i vaitata atu, tu iora i te ngai oiti, kare e tatipaanga to te pae katau e te pae kaui.

27 E kite akera te asini i te Angela a Iehova, kua moe aia ki raro i raro ake ia Balaama: riri rava akerā Balaama, e kua ta iora aia i te asini ki te rakau.

28 Kua akaamama iorā Iehova i te vaa o taua asini ra, e kua tuatua maira aia kia Balaama, I akapeea atu au ia koe, i ta ua mai ei koe iaku e toru akenei tainga?

29 Kua karanga aturā Balaama ki taua asini ra, No te mea kua akakoko mai koe iaku: naringa e koke tei toku rima e, kua mate roa ïa koe iaku i teianei.

30 Kua tuatua maira te asini kia Balaama, Kare ainei au i te asini naau, e kua akaoro koe iaku mei iaku rai i riro ei apinga naau, e tae rava akenei ki teianei rā? kua pera ainei au ia koe i muatangana ra? Kua karanga atura aia, Kare. 31 Kua akapuera mairā Iehova i te mata o Balaama i reira, kite atura aia i te Angela a Iehova i te tu anga i te arataa ra, ma tana koke i unuiia ra i tona rima: kua tupou iora aia ki raro, e tipapa iora ki raro tona mata.

32 Kua tuatua maira te Angela a Iehova kiaia, Eaa koe i ta ai i taau asini e ka toru akenei tainga? i na, i aere oki au e arai ia koe no te mea e aerenga kino toou ki mua iaku nei: 33 Kua kite mai oki te asini iaku, e ka toru akenei ariu ke anga iaku; naringa rai aia kare i anga ke iaku nei, kua mate ïa koe iaku, e kua akaoraia aia e au. 34 Kua karanga aturā Balaama ki taua Angela a Iehova ra, Kua ara au: kare oki au i kite e, te tu ra koe i te arataa e arai iaku, e teianei, e mea kino ia koe ra, ka oki au ki oku ra.

35 Kua tuatua maira te Angela a Iehova kia Balaama, E aere katoa koe e taua au tangata nei; e te tuatua taku e karanga atu kia koe ra, taau ïa e karanga atu, ko te reira anake ra. Aere aturā Balaama ratou ko te au tutara ki o Balaka ra.

36 E kite akerā Balaka e te aere mairā Balaama, aere atura aia e aravei iaia ki tetai oire o Moabi, i te pae o taua enua ra, i te pae i Aranona.

37 Kua karanga aturā Balaka kia Balaama ra, Kare ainei au i māro i te tiki ia koe na? eaa oki koe i kore ei i aere mai kiaku nei? kare aina e tika roa iaku kia akamaata ia koe?

38 Kua tuatua mairā Balaama kia Belaka ra, I na, teia mai nei au ia koe na; eaa ra oki taku tuatua e tikaʼi iaku uaorai kia tuatua ua? Ko te tuatua ta te Atua e tuku mai ki roto i toku vaa, ko taku ïa e tuatua. 39 Kua aere iorā Balaama raua ko Balaka, e tae atura ki Kiriata-huzota.

40 Kua ta iorā Balaka i te puakatoro, e te mamoe, e kua apai i ta Balaama tuanga, e ta te au tutara katoa tei vaitata uaorai iaia. 41 E ao akera kua arataki aturā Balaka ia Balaama ki runga i te au ngai teitei no Baala, kia kite aia i taua aronga ra e tae ua atu ki te openga mai i reira.