2 Samuela

23 TEIA nga tuatua openga a Davida. Ta te tamaiti a Iese ta Davida i tuatua; ta te tangata i akateitei ravaia: tei akatainuia e te Atua o Iakoba; te atu salamo mataora a Iseraela ra i tuatua:

2 Te tuatua nei te Vaerua o Iehova iaku nei, e tei toku vaa nei tana tuatua.

3 Kua tuatua mai te Atua o Iseraela kiaku nei, ko te Mato o Iseraela tei tuatua mai, Ei tuatua-tika ta te tutara ki rungao i te tangata nei, ko te ka tutara ma te mataku i te Atua ra:

4 Mei te mārama popongi ka iti mai ia aia ei rā; mei te popongi tumurangi kore aia, e te rangi makemake ra; mei te rakau rikiriki e tupu no roto i te enua ra, i muri ake i te ua ra.

5 Kore uaorai mei te reira toku nei ngutuare ki mua i te Atua ra; kua akaaiteite ra aia i te koreromotu mutu kore iaku nei, e mea akono meitakiia i te au vaʼi katoa ra, e kua akatinamouia ïa; ko toku ïa ora ko te reira ra, e toku katoa ra inangaro, kore uaorai aia e akatupu i te reira.

6 Kareka te aronga kanga, e tau ratou ravarai ki te rakau tataraara e akarukeia ïa, kare e tika kia rave atu ia ratou i te rima:

7 Ko te tangata ra e rave ra, kia paruruia ïa ki te auri e te pu korare e tikai; e ka taʼu ravaia ratou ki te ai i taua ngai ra.

8 Teia te au ingoa o te au tangata toa ki o Davida ra: Te Takemoni, ko tei noo i te nooanga, tei maata ïa i rotopu i nga rangatira ra; koia oki ko Adino te Ezena: kua tāki iora i tana korare, kua ta i te au tangata e varu anere, i te tainga okotai.

9 E muri ake iaia, ko tetai i aua nga tangata toa toko toru i o Davida ra, ko Eleazara te tamaiti a Dodo ra, e ngati Ahohi, ka akakino ei ratou i te Philiseti i akaputuputuia ra i te tamaki, e te ati ra to Iseraela:

10 Kua tu akera aia ki runga, kua ta i te Philiseti e piri rava akera tona rima ki te mouranga koke ra, e kua ngenge tona rima: e autu maata ta Iehova i rave i taua rā ra; e aru iora te au tangata iaia e rave ua i te apinga.

11 E i muri ake iaia, ko Sama te tamaiti a Agee te Harari ra. E kua putuputu te Philiseti i te takanava okotai, tei reira tetai kainga kua ki i te kerite: kua ati iora te tangata i te Philiseti.

12 Tu ua iora ra aia i rotopu i taua kainga ra, kare rava akera i pa, e kua ta iora i te Philiseti; e autu maata iora ta Iehova i rave iaia.

13 Aere atura nga tangata toko toru no taua pupu e toru ngauru ra, e tae atura ki raro kia Davida ra ki te ana a Adulama, i te tuatau akaū: te puakapaia ra te nuku Philiseti i te o ra i Rephaima.

14 Te noo rā Davida i taua punanga ra, e tei Betelehema te Philiseti i te tiaki anga.

15 Kua kaki akerā Davida i te vai, e kua tuatua akera, Naringa tetai e oronga mai i tetai manga vai, i te ruavai i te Betelehema, i te pae ngutupa ra e!

16 Kua tiki ua atura aua nga tangata toa toko toru ra na roto ua atu i te nuku Philiseti ra, e kua uti iora i te vai i taua ruavai i te pae ngutupa i Betelehema ra, kua rave maira, e kua apai maira kia Davida ra: kare akera aia i inu, kua riringi ra ki mua ia Iehova.

17 E kua tuatua akera aia, Auraka au, e Iehova, kia akapera; e inu ainei oki au i te toto o eianei puke tangata, ko tei akaruru ua i to ratou ora i te tiki anga i teianei vai? Kare akera aia i inu. I pera aua nga tangata toa toko toru ra.

18 E ko Abisai, te taeake o Ioaba, te tamaiti a Zeruia ra, ko tei maata ïa i nga tangata toko toru. E kua tāki akera aia i tana korare ki runga, ta atura i te au tangata e toru anere; rauka iora iaia i te ingoa i nga tangata toko toru ra.

19 Ko te tangata ïa i maata i aua nga tangata toko toru ra, riro atura aia ei rangatira i rungao; kare rai i taea iaia nga tangata toko toru i muatangana ra.

20 E ko Benaia te tamaiti a Iehoiada, e tamaiti aia na tetai tangata toa i Kabazeela, kua maata katoa tana au ravenga; e rua katoa ana puke liona tuputupua i ta i Moabi: e kua eke aia ki raro e kua ta rai i tetai liona i roto i te vaarua i te tuatau kiona.

21 Kua ta oki aia i tetai tangata Aiphiti, e tangata tu meitaki; e korare oki tei te rima o taua tangata Aiphiti ra; aere atura aia kiaia ra, ma te rauka tokotoko, e kua aō iora taua korare i te rima o te Aiphiti ra, kua ta atura iaia ki te korare nana uaorai.

22 I akapera aturā Benaia te tamaiti a Iehoiada, i raukaʼi tona ingoa i nga tangata toa toko toru nei.

23 Kua maata aia i te au tangata e toru ngauru ra; kare ra i taea iaia nga tangata toko toru i muatangana ra. Tukuia akera aia e Davida no rungao i tona ra pupu vaeau.

24 Ko Asahela te taeake o Ioaba, koia tetai i nga tangata e toru ngauru ra; ko Elahanana te tamaiti a Dodo i Betelehema ra,

25 Ko Sama i Harodi, ko Elika i Harodi ra;

26 Ko Heleza i Palito, ko Ira te tamaiti a Ikesa i Tekoa ra;

27 Ko Abiezera i Anatota, ko Mebunai i Husa;

28 Ko Zalamona i Ahohi, ko Maharai i Netopha;

29 Ko Heleba te tamaita a Baana i Netopha; ko Itai te tamaiti a Ribai no ko i Gibea ra no te au tamariki a Beniamina;

30 Ko Benaia i Piratoni, ko Hidai no ko i nga kauvai i Gaasa ra;

31 Ko Abi-alabona i Araba, ko Azamaveta i Baraumi;

32 Ko Eliaba i Saalaboni, nga tamariki a Iasena, ko Ionatana;

33 Ko Sama i Harari, ko Ahiama te tamaiti a Sarare i Harari;

34 Ko Elipheleta te tamaiti a Ahasabai i Maaka, ko Eliama te tamaiti a Ahitophela i Gilo,

35 Ko Hezerai i Karamela, ko Paarai i Arabi ra;

36 Ko Igala te tamaiti a Natana i Zoba, ko Bani i Gada;

37 Ko Zeleka ngati Amona, ko Nahari i Beeroti, e apai taoonga tamaki na Ioaba te tamaiti a Zeruia;

38 Ko Ira i Ituri, ko Gareba i Ituri;

39 E ko Uria ngati Heta; e toru ngauru ma itu, i te katoatoa anga.