1 Samuela
5 KUA rave maira te Philiseti i te aruna a te Atua, mei Ebenezera mai e kua apai atura ki Asedoda.
2 E oti akera te aruna a te Atua i te raveia e te Philiseti ra, apai atura ratou ki roto i te are o Dagona, e kua tuku atura ki te pae o Dagona ra.
3 E ao akera, kua tu akera to Asedoda i te popongi, e i na, kua ingā Dagona ki raro, te tipapa ua ra te mata ki raro i te one ki mua i te aruna a Iehova. Kua rave iora ratou ia Dagona, akatu akaou akera iaia ki runga i tona turanga ra.
4 E ao akera ia ratou i tu ki runga i te akirata ra, i na, kua ingā Dagona ki raro, te tipapa ua ra te mata ki raro i te one ki mua i te aruna a Iehova; e te mimiti o Dagona, e nga kapu rima ra, kua motu ke ïa, te vai ua ra i te turuki ngutupa ra; ko te tino anake o Dagona ra tei toe.
5 I kore ei te kau taunga o Dagona, e te aronga katoa e tomo ki roto i te are o Dagona i Asedoda ra, i takai i te turuki o Dagona, e tae rava akenei ki teianei rā.
6 Kua teiaa maira te rima o Iehova ki runga i to Asedoda, mate iora ratou iaia, e kua ta maira aia ia ratou ki te toê tupu, ko Asedoda e te au tapere katoa i reirao.
7 E kite akera to Asedoda i te reira, kua tuatua akera ratou, Auraka te aruna a te Atua o Iseraela e vaooia i o tatou nei: kua teiaa tukituki oki tona rima ki runga ia tatou, e to tatou nei atua ia Dagona.
8 Kua unga atura ratou i te karere, e uipa mai i te au tutara katoa o te Philiseti ki o ratou ra, e kua karanga atura, Akapeea tatou i te aruna a te Atua o Iseraela nei? Kua tuatua maira ratou, E apai akapini tatou i te aruna a te Atua o Iseraela e kia tae ki Gata ra. Kua apai atura ratou i te aruna a te Atua o Iseraela e tae ua atura ki Gata.
9 E oti akera i te apiia e ratou ki Gata ra, tei runga maira te rima o Iehova i taua oire ra, e mate maata ua atu to ratou; ta iora oki aia i te au tangata o taua oire ra, te aronga mamaata e te tangata rikiriki, mate iora oki ratou i te toê tupu i roto ra.
10 E kua apai atura ratou i te aruna a te Atua ki Ekerona. E tae atura te aruna a te Atua ki Ekerona, kua aue ua atura to Ekerona, na ko akera, Kua apai mai ratou i te aruna a te Atua o Iseraela ki o tatou, e ta ia tatou nei, e to tatou nei au tangata.
11 Kua unga atura ratou i te karere, e uipa maira i te au tutara katoa o te Philiseti, e kua karanga atura, E tuku kotou i te aruna a te Atua o Iseraela kia oki akaou ana ki tona ngai tikai, ko te mate aea tatou e to tatou nei au tangata iaia: e mate maata oki to taua oire ra e pini ua ake; teiaa tukituki maira te rima o te Atua i reira.
12 E te au tangata kare i mate rava ra, kua taia iora ratou ki te toê tupu; e tae ua atura te aue o taua oire ra ki runga i te rangi ra.