Iobu

6 KUA tuatua mairā Iobu, na ko maira,

2 Angairi toku mate nei i arite tikaia nei, e toku tumatetenga nei i kapiti katoaia ki roto i te aite akateiaa e!

3 I teianei rai oki, ka iti ïa te one taatai, i te teiaa: kare e rauka i taku nei tuatua.

4 Te au kakao a te Mana katoatoa tei roto mai nei iaku nei, e na te kavangu o te reira i pou ei taku vaerua; e te au mea mataku a te Atua te tupati marie nei ki runga iaku nei.

5 E aue ainei te asini momoavao i te ngai ngangaere? e e ungā ainei te puakatoro ki runga i tana kai?

6 E tika ainei te mea mangarongaro kia kai auraka ei tai? e te tui nei ainei te numata ua moa?

7 Ko te au mea ra kare rava i tauia atu e au ra, ko tei riro mai ïa ei kai aue naku.

8 Angairi i rauka mai taku e pati nei; angairi oki te Atua e oronga mai i taku e inangaro nei!

9 Angairi i tika i te Atua i te aati mai iaku; angairi i tika iaia kia tuku mai i tona rima, e tipu ke iaku!

10 E vai rai toku rekareka i reira, e rere ua oki au i te rekareka i te mate; auraka aia e akaperepere, kare oki au i uuna i te tuatua a Tei Tapu ra.

11 Eaa toku nei ririnui, e manakonako ei au? eaa toku nei openga, kia akaroaia e au toku nei aʼo?

12 E ririnui toka ainei toku nei ririnui? e e kiko veo ainei toku?

13 Aue! kare ua e marōrō o roto iaku, e te akaora iaku nei, kua akataka keia ïa.

14 E tau te tangi a te oa ki tei makiia ra: kua akaruke ra aia i te mataku i te Mana katoatoa ra.

15 Kua pikikaa mai toku aronga taeake mei te peka vai ra, mei te vai taʼe o te au o ra e mimie ua ra:

16 Ko tei kerepuruia i te vai toka, e ngaro atura te kiona ki roto ra:

17 I te tuatau i maanaanaʼi ra, kua ngaro ïa ratou; kia pukakā ra, kua kore ïa i to ratou vairanga;

18 To ratou aerenga i te taʼe anga ra, kua mingi ke ïa; te aere ra ratou ki te kore anga, e ngaro atura;

19 Te au motuanga tangata no Tema tei akara, e te au takanga tangata no Seba kua tapapa i te reira:

20 Kua tumatetenga ratou, no te mea, ko to ratou ïa irinakianga; kua tae ratou ki reira, e kua akama atura.

21 E teianei e mea puapinga kore rai kotou: te kite nei kotou i toku tuku akaakaanga, e te mataku na kotou.

22 I tuatua ana ainei au, Apai mai ana kiaku nei? e, No roto i ta kotou apinga, e o mai i tetai naku?

23 E, Kia ora au ia kotou i te rima o te enemi? e, Akaora kotou iaku i te rima o te aronga ririnui ra?

24 E apii mai iaku, e naku e muteki ua: e taku ngai i ē ra, ka akakite mai kiaku.

25 E mea taka meitaki te au tuatua-tika! teiea ra te tuatua i taka i ta kotou akamura?

26 Te manako nei ainei kotou e akamura mai i te au tuatua ua, te au tuatua oki a tei kore rava e manakoanga, e riro ei matangi ra?

27 Koia tika rai, te tinai-mate nei kotou i te matiroeroe, e te ko nei kotou i te vaarua no to kotou oa.

28 E tenana, kia tika ia kotou na, ka akara mai iaku; te mua tikai i to kotou na mata, me pikikaa au.

29 E ariu mai, ko taku ïa tuatua, auraka e akariroia ei ara; koia ïa, e ariu akaou mai, ko taku rai tei tika i taua mea nei.

30 E ara ainei tei toku nei arero? kare ainei au i kite i te mea kino kia tongi au?