Ebera

5 KO te kau taunga mamaata katoa i ikiia no roto i te tangata nei, kua akonoia ïa na te tangata, ei rave i te au mea o te Atua ra, ei apai i te atinga e te tarangaara ra:

2 E tika oki iaia kia aroa i te kite kore, e te aronga i tatipake; no te mea kua kako katoa aia uaorai i te kino.

3 E no reira oki i tuku katoaʼi aia i te tarangaara i tana uaorai ara, mei ta te tangata katoa ra, e tikaʼi.

4 E kare rava e tangata e rave ua i teianei taoonga teitei nona uaorai, mari ra ko tei ikiia e te Atua, mei ia Aarona ra.

5 Koia katoa oki te Mesia, kare tona i te akateitei iaia uaorai koia i riro ei taunga maata, na te Atua ra, na tei karanga mai iaia e, “Ko taku Tamaiti koe, i nakonei koe i akaanauiaʼi e au.”

6 Mei tana katoa oki i tuatua i roto i tetai salamo ra e, “E taunga koe e tuatau ua atu mei ia Melekizedeka te tu.”

7 Kua tuku oki te Mesia i te pure, i tona ora anga, i te pati anga atu kiaia, ma te aue maata e te roi-mata i Tei tika kia akaora iaia mei te mate maira, e i akarongoia aia i tana i mataku ra:

8 E Tamaiti ua rai oki aia, i kite aia i te akamoraro i tona au mate;

9 E no te mea kua akatapu ravaia aia ra, riro atura ïa ei tumu no te ora mutu kore no te aronga katoa e akarongo iaia ra;

10 I tuatuaia mai e te Atua e, e taunga maata mei ia Melekizedeka te tu.

11 E tuatua maata oki ta matou iaia, e te kimi ngata oki te ariteanga, no to kotou ra kamakura.

12 Naringa oki mei teianei kua riro kotou ei orometua, kua tika ïa i te roa; e tenana kia apii akaouia rai kotou i te apiianga mua o te tuatua a te Atua e tikaʼi; e kua riro io nei kotou mei te aronga e tau ia ratou te u, eiaa te kai pakari.

13 Ko tei kai katoa oki i te u anake ra, kare ïa i pakari i te tuatua-tika ra: e kaiu rai aia. 14 Kareka te kai pakari ra, na te tangata pakari ïa, na te aronga no te mātau i kite ei to ratou ngakau i te meitaki e te kino.