Ieremia

14 TE TUATUA a Iehova i tae mai kia Ieremia, no te onge.

2 Kua aue Iuda, e kua paruparu tona au ngutupa; kua kerekere roa ki te one rava; e te aue o Ierusalema, kua riro atura ïa ki runga.

3 Kua unga oki te au tangata nunui i ta ratou au tamariki ki te vai; e tae atura ki te au puna ra, kare ua e vai i kitea; kua ooki maira ratou ma te āriki ua; kua akama iora ratou, e kua tumatetenga, e puroku atura i to ratou mimiti.

4 No te mea kua ngaangaa ua te one, kare oki e ua i te enua nei; kua akama te aronga arote, kua puroku iora i to ratou mimiti.

5 Kia anau akera oki te aili i roto i te kainga, akaruke iora i tana punua, no te mea kare e ngangaere.

6 E kua tu ua te au asini momoavao ki runga i te au ngai teitei, kua ongiongi ratou i te matangi mei te au taae; kua aninia to ratou mata, no te mea kare e ngangaere.

7 Akaapa ua mairai to matou kino ia matou nei, e Iehova e, e angaanga koe, no toou uaorai ingoa: kua manganui akenei to matou kotoe anga ki muri; kua ara akenei matou ia koe.

8 E te manako anga o Iseraela e, tona Akaora i te tuatau tumatetenga e, eaa koe e akatangata ke ua i te enua nei? e mei te tangata tuitarere e tapae ua mai e moe i te po okotai ua?

9 Eaa koe e arite ei ki te tangata poitirere ua, mei te tangata mana e kare e rauka i te akaora? tei rotopu rai oki koe ia matou nei, e Iehova e, e kua akaikiia toou ingoa ki runga ia matou; auraka koe e akaruke ia matou.

10 Te na ko mairā Iehova ki teianei iti-tangata, E inangaro koka aere pera to ratou, e kare akenei ratou i tāpu i to ratou vaevae, i kore ei a Iehova i kite mai ia ratou; ka akamaara ra aia i to ratou kino i teianei, e e tutaki mai aia i ta ratou au ara.

11 I tuatua mai ei a Iehova kiaku, Auraka koe e pure no teianei iti-tangata kia meitaki ratou.

12 Kia akakore ratou i te kai ra, kare au e akarongo i ta ratou kapiki; e kia apai mai ratou i te atinga karakaratio, e te atinga kai, kare au e āriki atu i te reira: i te koke ra, e i te onge, e i te maki-mate, e akapou roaʼi au ia rutou.

13 Kua karanga atura au e, Aue, e te Atu e Iehova e! i na, te tuatua maira te au peroveta kia ratou e, Kare kotou e kite i te koke, e kare rai kotou e rokoia e te onge; ko te au nuingangare ra taku e oronga atu ia kotou i teianei ngai.

14 E kua tuatua mairā Iehova kiaku, E pikikaa ta te au peroveta i totou i toku nei ingoa: kare au i tono ia ratou, e kare i akaue atu ia ratou, e kare rai au i karanga ua atu kia ratou: e orama pikikaa, e te totou pikikaa, e te mea puapinga kore, e te pikikaa o to ratou uaorai ngakau, ko ta ratou ïa i totou mai ia kotou.

15 E teianei te na ko mairā Iehova i te au peroveta, tei totou i toku nei ingoa, e kare au i tono ia ratou, na ratou uaorai i tuatua e, Kare e tae mai te koke e te onge ki teianei enua; I te koke rai, e te onge, e pou ei taua au peroveta ra.

16 E te au tangata ta ratou i totou ra, e titiriia ki vao i te au arataa i Ierusalema, no te onge, e te koke; e kare e tangata i te tanu ia ratou; ko ratou, e ta ratou au vaine, e ta ratou au tamariki tamaroa, e ta ratou au tamaine: e riringi atu oki au i to ratou kino ki runga ia ratou.

17 Teia rai taau tuatua ka karanga atu ei kia ratou; Kia eke ua te roi-mata i toku mata, i te po e te ao, e auraka rava e akapaki: no te mea kua paruparu te tamaine paretenia o toku iti-tangata i te paruparu maata, i te tainga mamae maata.

18 Kia aere au na te au kainga, i na, te aronga i taia i te koke! e kia tomo au ki roto i te oire, i na, te aronga i pae ua i te onge! koia ïa, te oko aere ua oki te peroveta e te taunga i runga i te enua nei, e kare rai i kite.

19 Kua akaruke takiri ainei koe ia Iuda? kua akaviivii rava ainei to Vaerua ia Ziona? eaa koe i pāpāʼi ia matou, e kare ua o matou e akaora? kua tatari matou ki te au, e kare ua e meitaki; e i te tuatau e oraʼi ra, e i na, ko te mataku!

20 Te aaki nei matou, e Iehova, i to matou au kino e te are a to matou ai metua ra: kua ara akenei matou ia koe.

21 Auraka koe e akaviivii mai, no toou ra ingoa, auraka koe e akakino i te terono o toou kakā: e akamaaraara, e auraka koe e akaatikau i taau koreromotu ia matou.

22 Te vai ra ainei to roto i te au mea puapinga kore o te etene e tika kia tuku mai i te ua? E na te au rangi ainei e oronga mai i te tua ua? kare ainei ko koe, e to matou Atua, e Iehova? i tapapaʼi matou ia koe; no te mea naau teia katoa nei au mea e rave.