Genese

50 KUA tipapa iorā Iosepha ki runga i te mata o tona metua, aue ua iora ki runga iaia, e ongi atura iaia.

2 Kua akaue aturā Iosepha i tona au tavini, i te aronga taunga ra, e miri i tona metua; e kua miri iora taua aronga taunga ra ia Iseraela.

3 E ope akera te au rā e a ngauru ra; ko te au rā ïa e ope ei i te miri anga: kua aue iora to Aiphiti iaia e itu akera ngauru anga o te rā.

4 E ope rava akera taua au rā aue anga iaia ra, kua karanga aturā Iosepha ki te ngutuare o Pharao, na ko atura, I kite aroaia mai au e kotou na, teia taku tuatua kia kotou, e karanga atu kotou kia Pharao, e akakitea atu e,

5 Kua akataputou mai toku metua iaku, na ko maira, I na, teia au ka mate; ei roto i toku uaorai menema koe tanu ei iaku, i taku i ko noku uaorai, i te enua ra i Kanaana: e teianei, e tuku ake ana koe iaku, e aere au ki runga e tanu i toku metua tane, e ka oki mai au.

6 Kua tuatua mairā Pharao, Ka aere ki runga, ka tanu i to metua tane, i tana i akataputou mai ia koe ra.

7 E aere aturā Iosepha ki runga e tanu i tona metua tane; e te au tavini ravarai o Pharao i te aere katoa anga, te aronga pakari no tona ngutuare, e te aronga pakari katoa no taua enua ra no Aiphiti,

8 E to te ngutuare katoa o Iosepha, e tona ai tuakana, e to te ngutuare o tona metua tane: ko te au tamariki anake ra, e te au mamoe, e te au puakatoro, tei vaooia i te enua ra i Gosena.

9 Ko te au kariota katoa oki i te aerenga ki runga, e te aronga akaoro oroenua katoa ra; e urupu maata rava oki ratou.

10 E tae atura ratou ki te ngai pāpā sitona o Atada, i tera pae Ioridana, i reira to ratou eva anga, e eva anga maata roa atu: e aue anga tana i akatupu i reira i tona metua, e po itu akera.

11 E kite akera to taua enua ra, ko te ngati Kanaana, i taua aue anga i te ngai pāpā sitona o Atada ra, kua tuatua akera ratou, E aue anga maata roa tera ake ta to Aiphiti ra: i tapaiaʼi te ingoa i te reira i tera pae Ioridana ra, ia Abela-mizeraima.

12 Kua rave marie atura te au tamariki a Iakoba ra i tana i ikuiku mai kia ratou ra:

13 Kua apai marie oki tana au tamariki iaia ki te enua ra ki Kanaana, e kua tanu oki iaia ki roto i te ana i te kainga i Makapela, i tei okoia e Aberahama ma te kainga katoa, ei tanumanga tangata, ia Epherona ngati Heta ra, i vaitata i Mamera ra.

14 E oti akera tona metua tane i te tanumia e ia, kua oki maira Iosepha ki Aiphiti; koia, e tona ai tuakana, e te aronga i aere katoa ki runga i te tanu manga i tona metua tane.

15 E kite akera te ai tuakana o Iosepha e, kua mate to ratou metua tane, kua tuatua akera, Peneiake ko te makitakita mai a Iosepha ia tatou, kare e kore e tutaki mai i ta tatou takinga-kino katoa iaia ra.

16 Kua tono akera ratou i tetai karere kia Iosepha ra, e karanga atu e, I iku mai to metua tane, ka mate ei ra, na ko maira,

17 E karanga atu kotou kia Iosepha, E akakore mai koe, i tenana, i te apa a to ai tuakana nei, e to ratou kino; kua takinga-kino oki ratou ia koe: e teianei, teia ta matou tuatua kia koe, e akakore mai koe i te ara a te au tavini o te Atua o toou metua tane ra.

18 Aere atura oki tona ai tuakana, e tipapa iora ki raro ki mua i tona aroaro; e karanga atura, I na, ei tavini anake matou noou.

19 Kua tuatua mairā Iosepha kia ratou, Auraka e mataku: tei iaku ainei ta te Atua?

20 Ko ta kotou i akakoro ei kino noku, ko ta te Atua ïa i akakoro ei meitaki, kia tupu iaia ta tatou e kite nei, koia te tangata katoa nei e manganui i te ora anga i teianei rā.

21 E teianei, auraka e mataku: naku kotou e angai, e ta kotou au tamariki. Pera atura aia i te akamaru anga ia ratou, e kua akapumaana atuia ratou.

22 Noo ua iorā Iosepha i Aiphiti, koia, e te ngutuare katoa o tona metua: okotai atura anere e okotai ngauru ara i to Iosepha mataiti i te ora anga.

23 Kua kite oki a Iosepha i to Epheraima au mokopuna: e te tamariki katoa a Makira te tamaiti a Manase ra, i runga ratou i te ūā o Iosepha i te pakari anga.

24 Kua karanga aturā Iosepha ki te au taeake nona ra, Teia au ka mate; e ka atoro mairai te Atua ia kotou, e nana kotou e arataki atu mei ko nei atu ki runga roa te enua i tana i taputou mai e, no Aberahama, e no Isaaka, e no Iakoba.

25 Kua akataputou aturā Iosepha i te au tamariki a Iseraela, na ko atura, E atoro mairai te Atua ia kotou, e na kotou e apai katoa i toku nei ivi ki runga mei ko nei atu.

26 Mate iorā Iosepha, okotai atura anere okotai ngauru ara te mataiti; e kua miri iora ratou iaia, e kua tuku atura ki roto i te pia i Aiphiti.