1 Paraleipomeno

15 KUA akatu iorā Davida i te au are nona i roto i te aoire o Davida, e kua akonokono iora i tetai vairanga no te aruna a te Atua, e kua patia i tetai puakapa no te reira.

2 Kua tuatua akerā Davida, Auraka rava ei tangata kia apai, i te aruna a te Atua, mari ra ko te ngati Levi anake: ko tei ikiia ïa e Iehova ei apai i te aruna a te Atua, e ei raverave i mua iaia, e tuatau ua atu.

3 Kua akaputuputu mairā Davida ia Iseraela katoa ki Ierusalema, e apai mai i te aruna a Iehova ki tona vairanga, i akonoia e ia no te reira.

4 Kua akaputuputu mairā Davida i te au tamariki a Aarona, e te ngati Levi;

5 To te au tamariki a Kohata; ko Uriela ko te mataiapo ïa, e tona ra au taeake okotai anere e rua ngauru:

6 To te au tamariki a Merari ra; ko Asaia ïa te mataiapo, e tona ra ai taeake e rua anere e rua ngauru:

7 To te au tamariki a Geresoma ra; ko Ioela ïa te mataiapo, e tona ai taeake okotai anere e toru ngauru:

8 To te au tamariki a Elizapana ra; ko Semaia ïa te mataiapo, e tona ra ai taeake e rua ïa anere:

9 To te au tamariki a Heberona ra; ko Eliela ïa te mataiapo, e tona ra ai taeake e varu ïa ngauru:

10 To te au tamariki a Uziela ra: ko Aminadaba ïa te mataiapo, e tona ra ai taeake okotai ïa anere okotai ngauru ma rua.

11 Kua tiki aturā Davida i nga taunga ra ia Zadoka raua ko Abiatara ra, e te au ngati Levi, ia Uriela, ia Asaia, e ia Ioela, ia Semaia, e ia Eliela, e ia Aminadaba.

12 Kua karanga atura kia ratou, Kotou te aronga mataiapo tutara ngati Levi; e akatapu ia kotou uaorai, kotou e to kotou ai taeake ra, ka apai mai ei i te aruna a te Atua o Iseraela a Iehova ki te ngai i akonoia e au no te reira.

13 No te mea kare kotou i apai ua mai i muatangana akera, i akangaa mai ei to tatou Atua ko Iehova ia tatou nei, no te mea kare tatou i kimi iaia mei tei akakiteia maira.

14 Kua akatapu iora te kau taunga e te au ngati Levi ia ratou uaorai, kia apai ratou i te aruna a te Atua o Iseralela a Iehova.

15 Kua apai ua mai oki te au tamariki a Levi i te aruna a te Atua ma nga amo ki runga i to ratou pakuivi, i ta Mose oki i akaue mai i te tuatua a Iehova ra.

16 Kua karanga aturā Davida ki te au mataiapo ngati Levi ra, e akono ratou i to ratou ai taeake ei aronga imene i te akatangi i te au mea i akatangiia ra, kia akatangi ratou i te nabala, e te kinura, e te sumebalo, ma te akateitei i te reo ma te rekareka.

17 Kua akataka iora te ngati Levi ia Hemana te tamaiti a Ioela ra; e i tona ra au taeake, ko Asapha ïa te tamaiti a Berekia; e i nga tamariki a Merari to ratou au taeake, ko Etana te tamaiti a Kusaia;

18 E to ratou au taeake i muri ake ia ratou, ko Zekaria, ko Beni, e ko Iaaziela, e ko Semiramota, e ko Iehiela, e ko Uni, e ko Eliaba, e ko Benaia, e ko Maaseia, e ko Matitia, e ko Eliphele, e ko Mikeneia, e ko Obeda-edoma, e ko Ieiela, e aronga tiaki ngutupa ïa.

19 Te aronga imene ra, ko Hemana, ko Asapha, e ko Etana, ei akatangi i te sumebalo veo ra;

20 E ko Zekaria, e ko Aziela, e Semiramota, e ko Iehiela, e ko Uni, e ko Aliaba, e ko Maaseia, e ko Benaia, ei nabala akareo vaine ta ratou;

21 E ko Matitia, e ko Eliphele, e ko Mikenia, e ko Obeda-edoma, e ko Ieiela, e ko Azazia, ei kinura reo akaaka ta ratou ei arataki.

22 Ko Kenaia e tutara ngati Levi, ei te tumu imene ïa, kua akakite oki aia i te tu imene, no te mea kua karape aia.

23 E ko Berekia, e ko Elikana, e tiaki ngutupa ïa no te aruna ra.

24 E ko Sebania, e ko Iehosaphata, e ko Netaneela, e ko Amasai, e ko Zekaria, e ko Benaia, e ko Eliezera nga taunga ra, ko tei akatangi i te pu na mua i te aruna a te Atua: e ko Obeda-edoma, e ko Iehia, e tiaki ngutupa ïa no te aruna.

25 Kua aere atura oki a Davida, e te aronga pakari o Iseraela, e te au rangatira tausani ra, e apai mai i te aruna koreromotu a Iehova ki runga, ma te rekareka, i roto i te are o Obeda-edoma.

26 E no te mea kua tupae mai te Atua i te au ngati Levi ra tei apai mai i te aruna koreromotu a Iehova ra, kua apai ratou i nga puakatoro e itu, e nga mamoe toa e itu, ei atinga.

27 Te kakau rā Davida ki te kakau orongā meitaki, e te au ngati Levi katoa tei apai mai i taua aruna ra, e te aronga imene, e ko Kenania, e tumu imene ma te aronga imene: tei runga oki ia Davida tetai ephoda orongā ra.

28 Kua apai maira Iseraela katoa i te aruna koreromotu a Iehova ra, ma te maeva, e ma te tangi o te au pu tu ke ke, e ma te au sumebalo, e kua akatangi ma te au nabala, e te au kinura.

29 E tae maira te aruna koreromotu a Iehova ki te oire o Davida, te akara ra te tamaine a Saula ko Mikala, na roto i tetai māramārama, kite atura i te ariki ra ko Davida i te ura anga e te nanave anga ki mua i te aruna ra: kua akavaavaa atura aia iaia i roto i tona ngakau.