Ieremia

49 NO TE au tamariki a Amona. Te na ko mairā Iehova; Kare ainei a Iseraela e tamariki? kare ainei ona e tangata kainga? Eaa iora oki a Moloka i noo ei i te enua ra o Gaza? e tona ra au tangata i noo ei i tona au oire?

2 E teianei, i na, te tae maira te au rā, te tuatua mairā Iehova, e kiteaʼi iaku i Raba, ki o te au tamariki a Amona, te aoa tamaki; e riro oki aia ei ututua tanea; e ka tana au tamaine i te ai; e riro oki Iseraela ei tangata kainga no ratou, tei riro ei tangata kainga nona ra, te tuatua mairā Iehova.

3 Ka kakaoa, e Hesebona e, kua pou oki Ai: ka aue kotou,k e te au tamaine i Raba, ka kakau kotou i te kakau paoa, ka aue ei, ka oro aere uaʼi na roro i te au koro; e riro oki a Moloka ei tuikaa, e te kau taunga nana, e te ui ariki katoa ki ona ra.

4 Eaa oki ko i akatietie ei i te au o ra? toou o taʼe a vai ua ra, e tera ra tamaine akatitima, e irinaki i tana ra apinga, e ko te karanga e, Koai te ka tae mai kiaku nei?

5 I na, e apai mai au i te mataku ki runga ia koe, te tuatua maira te Atu ko Iehova Sabaota ra, no ko i te aronga katoa e pini ua ake ia koe ra; e arumakiia te tangata katoa i mua atu iaia, e kare tetai e akaoki mai i tei ati ra.

6 E muri akera i te reira, e ruri ke au i te tuikaa anga o te tamariki a Amona ra, te tuatua mairā Iehova.

7 No Edoma. Te na ko mairā Iehova Sabaota ra, Kua kore ainei te pakari i Temana? kua kore ainei te tuatua i te aronga akono ra? kua ngaro ke ainei to ratou pakari?

8 Ka rere, ka iki i te tua, ei te ngai oonu noo ei, e tei noo i Dedana e; ko te tumatetenga oki o Esau te ka tukuia e au ki runga iaia, koia te tuatau o toku tutaki anga atu iaia ra.

9 Kia tae mai te aronga aki vine kia koe ra, kare ainei ratou e akatoe i te totoenga vine? e keia tei aere mai i te po ra, kare ainei ratou e āru e kia pangia te kaki?

10 Kua vaoo taaka ua ra au ia Esau, kua eeuia e au tona ra au pipini anga, e kare aia e ngaro kia pipini: kua kino tona uanga, e tona ra au taeake, e tona ra au tangata tupu, e kua kore aia!

11 Ka vaoo i taau au matiroeroe, ka akaoraia ratou e au, e taau au vaine takaua, kia irinaki ratou iaku.

12 Te na ko maira oki a Iehova, I na, te aronga kare i akautungaia kia inu i taua kapu ra, kua inu tikaia ratou; e akakore rava ainei taau utunga? Kare koe e ngere i te utunga, e inu tika rai koe ra.

13 Kua taputou oki au iaku uaorai, te tuatua mairā Iehova, e riro Bozara ei vavaranga, ei akakino anga, ei tanea anga, e ei tao anga, e riro oki tona katoa au oire ei ngai akaruke tamouia.

14 Akarongo akenei au i te rongo no ko ia Iehova ra, e kua tonokia tetai karere ki te pa enua, E akaputuputu mai kotou, e aere mai ki runga iaia; koia ïa, ka tu ki runga e tamaki.

15 I na oki, ka iti koe iaku i rotopu i te pa enua nei, e te akavaavaaia i rotopu i te au tangata ra.

16 Kua vare koe i toou ra mataku angaia, e te parau o to ngakau, e tei noo ki roto i te akapi mato ra, e tei ia koe te teitei o te tuaivi ra: anga ua koe i to koanga ki runga mei to te aeto ra, e tukuia koe e au ki raro i reira, te tuatua mairā Iehova.

17 E riro oki Edoma ei vavaranga; e te au tangata katoa kia aere na reira ra, e poitirere ïa: e aviri oki i tona ra au mate katoa.

18 Mei tei te uritumu anga ia Sodoma e ia Gomora, e te au ngai i reirao, te tuatua mairā Iehova, kare rava e tangata e noo i reira, e kare oki ta te tangata nei tamaiti e tuitarere i reira.

19 I na, mei te liona i te puke anga o Ioridana, ka aere mai ei ai ki taua nooanga ketaketa ra: e kamo oki toku mata e oro ke ua aia iaku mei reira atu: koai oki te tangata ikiia ra kia akono atu au ki runga i te reira? koai oki tei tau iaku nei? e koai te tika kia aravei mai iaku? koai oki taua tiaki ra te ka mou ki mua iaku nei?

20 E teianei e akarongo mai kotou i te tuatua na Iehova, i tuatuaia e aia ia Edoma: e tana au akakoroanga i akakoroia e ia i te au tangata o Temana: koia ïa, ko tei iti rava i roto i te anana ra, te ka kika ia ratou: koia ïa, e akatanea aia i to ratou au nooanga ma ratou katoa.

21 Te ngaueue nei te enua i te aruru o to ratou inga anga; ko te aue ra, kua akarongoia te aruru ki te tai kutekute ra.

22 I na, e kake aia ki runga e rere mei te aeto ra, e totoa aia i tona peau na runga ia Bozara: e taua rā, e riro te ngakau o te aronga ririnui i Edoma, mei te ngakau o te vgaine kia rokoia e te anau ra.

23 No Damaseko. Kua tumatetenga Hamata e ko Arephada: no te mea kua akarongo ratou i te rongo kino ra, kua taravai ratou: kua ori ua mei te tai, kare e tika kia akaea ra.

24 Kua paruparu Damaseko; kua ariu aia e oro ra, kua rokoia aia e te mataku; kua opukia aia e te mamae, e te aue, mei to te vaine kia rokoia e te anau ra.

25 Aue, kare e vaooia te oire rongonui e! te oire rekareka naku e!

26 E teianei e inga tona au tangata ou ki roto i tona au arataa, e te au tangata tamaki katoa ra, e tipu keia ïa i taua rā ra, te tuatua mairā Iehova Sabaota ra.

27 E tutungi au i te ai i te patu o Damaseko ra, e ka pou te au are ariki o Beneadada.

28 No Kedara, e te au basileia ia Hazora, tei taia e te ariki o Babulonia e Nebukanesa: Te na ko mairā Iehova, Ka tu kotou, ka aere ki runga ki Kedara, e kia noniia te au tangata o te itinga o te rā.

29 E raveia e ratou to ratou au puakapa, e te au anana; ta ratou au paruru, e ta ratou au āriki katoa ra, e ta ratou au kamela, ka raveia e ratou na ratou uaorai; e kapiki oki ratou ia ratou. Te mataku e pini ua ake.

30 Ka rere, kia atea ke atu kotou; ei te ngai ngarongaro noo ei, e tei noo i Hazora ra: te tuatua mairā Iehova; kua akakoro te ariki o Babulonia ko Nebukanesa i te akakoroanga ia kotou, e kua kimi aia i te ravenga ia kotou.

31 Ka tu, ka aere ki runga i te enua noo ponuiaau ua, tei noo ma te mataku kore, te tuatua mairā Iehova: kare oki o ratou pa, kare oki e tamou pa; te taka ke ra to ratou noo anga.

32 E riro ta ratou au kamela ei apinga noni, e te maata anga o ta ratou au puaka ei mea āruia, e akapueu ke atu au ia ratou i nga rua matangi katoa ra, te aronga e varu i to ratou parata; mei te au ngai katoa mai oki to ratou mate kia apai mai au ra, te tuatua mairā Iehova.

33 E riro Hazora ei nooanga no te au taae, kia tanea e tuatau ua atu: kare rava e tangata e noo i reira, kare oki tetai tamaiti a te tangata e tuitarere i reira.

34 Te tuatua a Iehova i tae mai ki te peroveta ra kia Ieremia, ia Elama, i te akamataanga o te au o te ariki o Iuda ra ko Zedekia, na ko maira,

35 Te na ko mairā Iehova Sabaota ra, I na, e aati au i te ana o Elama, ko te maata ïa o to ratou ririnui.

36 E apai mai au i nga matangi e a ki runga ia Ekama, no nga openga e a o te rangi ra; e akapueurikiriki ke au ia ratou i taua au matangi katoa ra: e kare rava e enua, e kore ei e taea e to Elama i akarukeia ra.

37 E akamataku oki au ia Elama ki mua i te aroaro o to ratou au enemi, e ki mua oki i te aroaro o te aronga e kimi mai ia ratou kia mate ra; e apai mai au i te kino ki runga ia ratou, te viviki oki o toku nei riri, te tuatua mairā Iehova; e unga atu au i te koke na muri ia ratou, e kia pou takiri ratou iaku:

38 E akatu au i taku terono i Elama, e akapou au i te ariki e te ui ariki katoa i reira, te tuatua mairā Iehova.

39 E riro ïa ra i te au rā openga ra, e ruri ke au i te tuikaa anga o Elama, te tuatua mairā Iehova.