Salamo

146 ALELU Ia. E akameitaki ia Iehova, e toku vaerua. 2 E akapaapaa au ia Iehova koi vai ake toku ora: ka imene au i taku Atua koi vai ake au nei. 3 Auraka e irinaki ki te ui ariki, i te tamaiti a te tangata nei, kare oki ona ora. 4 Te riro nei oki tona vaerua, te oki nei aia ki tona ra one; kore rava atura tana i akakoro i taua rā ra. 5 E ao tona tei te Atua o Iakoba te tauturu iaia; tei tona Atua tei ia Iehova tona irinaki anga. 6 Ko tei anga i te au rangi e te enua, te tai, e te au mea katoa i roto ra; ko tei akono i te tuatua-mou e tuatau ua atu; 7 Ko tei akatika mai i te aronga i takinga-kinoia; ko tei oronga mai i te kai na tei pongi ra. Ko Iehova tei tatara i tei tapekaia ra; 8 Ko Iehova tei akapuera i te mata o tei matapo ra; ko Iehova tei akatu i tei taakaakaia ra; ko Iehova tei inangaro i te aronga tuatua-tika ra. 9 Te tiaki nei a Iehova i te aronga tangata ke ke ra, te tauturu nei aia i te matiroeroe e te vaine takaua ra, kareka te aerenga o te aronga kino ra, e tatipoki roaia ïa. 10 Ka vai ariki mairai a Iehova e tuatau ua atu; ko to Atua, e Ziona, e tae ua atu ki te au uki katoa ra. Alelu Ia.