Deuteronomi

1 KO te au tuatua teia i ta Mose i tuatua kia Iseraela ravarai, i teia pae Ioridana, i te medebara ra, i te Araba i vaitata i Suphe, i rotopu i Parana, e ko Tophela, e ko Labana, e ko Hazerota, e ko Di-zaaba.

2 (Mei Horeba e tae ua atu ki Kadesabarenea, kia na te maunga ra na Seira i te aere, okotai ngauru nei te po e okotai ara e tae ei.)

3 E tae akera ki te a o te ngauru anga o te mataiti, i te ngauru ma tai o te marama ra, e te rā mua o taua marama ra, kua karanga aturā Mose ki te tamariki a Iseraela i te au tuatua ravarai ta Iehova i akaue mai iaia e tuatua kia ratou ra;

4 I muri ake i tana tainga i te ariki o te ngati Amori ra, ko Sihona, i noo i Hesebona ra, e ia Oga ariki o Basana, i noo i Asetaroto, tana i ta i Ederei ra;

5 I teia pae Ioridana i te enua ra ko Moabi, ta Mose akakite anga i teianei ture, na ko atura,

6 Kua tuatua mai to tatou Atua ra ko Iehova kia tatou i Horeba, na ko maira, E noo anga roa to kotou i teianei maunga:

7 Ka ariu, ka aere i to kotou aerenga, ka aere ki te maunga o te ngati Amori ra, e te au ngai katoa i reirao, i te Araba ra, e te ngai tuaivi ra, e te ngai o ra; e i te pae i apatonga ra, e ki taatai; i te enua o te ngati Kanaana, e ki Lebanona, e tae ua atu ki te vai maata, te vai ra ko Eupharati.

8 I na, kua tuku au i te enua ki mua i to kotou aroaro: e aere ki rungao i taua enua ra e noo, i ta Iehova i taputou atu ki to kotou ai metua ra, kia Aberahama, kia Isaaka, e kia Iakoba, e oronga no ratou, e no to ratou uanga a muri atu.

9 Kua karanga atura oki au kia kotou i reira, na ko atura, Kare kotou e maranga iaku anake nei:

10 Kua akamaata mai to kotou Atua ra ko Iehova ia kotou, e i na, mei te etu o te rangi ra kotou i teianei rā i te maata.

11 (Kia akamaata mairai te Atua o to kotou ai metua ra ko Iehova ia kotou, e kia riro te tangata okotai ra ei tausani, e kia akameitaki mai oki ia kotou, i tana oki i tuatua mai kia kotou na!)

12 Eaa e tikaʼi iaku anake uaorai kia apai i ta kotou mea teiaa, e ta kotou apainga, e ta kotou tauetonoanga?

13 E iki ana kotou i te aronga pakari, e te akono meitaki, e te kitea, i rotopu i to kotou na au kopu, e naku e akariro ia ratou ei tutara ki rungao ia kotou.

14 Kua tuatua maira kotou kiaku, na ko maira, Ko tenana tuatua taau i tuatua mai na e mea meitaki ïa ia matou nei kia akapera.

15 Rave atura au i taua au tangata mamaata ra, e te pakari, e te kitea, i rotopu i to kotou na au kopu, akariro atura ei tutara ki rungao ia kotou na, ei rangatira no runga i te tausani okotai, e ei rangatira no runga i te anere okotai e ei rangatira no runga i te rima ngauru, e ei rangatira oki no runga i te ngauru okotai ra, e ei aronga taoonga i roto i to kotou na au kopu.

16 E kua ako atura au i to kotou na au akava i reira, na ko atura, E akarongo kotou i te tuatua a to kotou au taeake, e akatau marie i te tuatua-tika ki te tangata ma tona taeake, e te tangata ke katoa ki ona ra.

17 Auraka kotou e akono i te tu o te tangata kia akava ra; kia okotai rai aite to kotou akarongo i tei iti e tei maata; auraka kotou e mataku i te mata tangata; na te Atua oki te tuku anga utunga ra; e te tuatua kare e tika ia kotou na, e apai mai i ko nei kiaku nei, e naku e akarongo i te reira.

18 E kua akaue oki au ia kotou i reira i te au mea katoa, ta kotou e rave.

19 E ia tatou oki i akaruke ia Horeba ra, kua na roto tatou i taua medebara maata rikarika ra, i ta kotou i kite, i te aerenga mai ki te maunga o te ngati Amori ra, i ta to tatou Atua ta Iehova i akaue mai kia tatou ra; e tae maira oki tatou ki Kadesabarenea.

20 Kua karanga atura au kia kotou, Kua tae mai kotou ki te maunga o te ngati Amori, ta to tatou Atua ra ta Iehova e oronga nei no tatou.

21 I na, kua tuku mai to Atua ra ko Iehova i taua enua nei ki mua ia koe: ka aere ka noo, ta te Atua o to ui metua ra ta Iehova i tuatua mai kia koe na; auraka e mataku, auraka e taitaia.

22 Kua aere katoatoa maira kotou kiaku nei, e kua tuatua maira, E tono tatou i te tangata na mua ia tatou nei, kia tutaka ratou i taua enua ra no tatou, ka apai mai ei i te tuatua kia tatou i ta tatou arataa kia aere, e ta tatou oire e tomo ra.

23 Tika rava akera taua tuatua ra iaku; e kua iki iora au i te tangata tino ngauru ma rua no rotopu ia kotou na, i tataki taiia i te kopu okotai:

24 Ariu atura ratou, e aere atura ki runga i te maunga, e tae atura ki te o ra ko Esekola; e tutaka atura ratou i te reira ra.

25 E kua rave iora ratou i te kai o taua enua ra i to ratou rima, e kua apai maira kia tatou nei; apai maira oki i te tuatua kia tatou, na ko maira, E enua meitaki, ta to Atua ta Iehova i oronga mai no tatou nei.

26 Kare ra i tika ia kotou kia aere ki runga, kua taitoito ra kotou i te tuatua a to kotou Atua ra ko Iehova.

27 Urutoe iora kotou i roto i to kotou au puakapa, e kua tuatua akera, No te mea kua makitakitā Iehova ia tatou, i arataki mai ei aia ia tatou mei te enua maira mei Aiphiti, e tuku ia tatou ki te rima o te ngati Amori kia pou tatou.

28 Eaa tatou e tikaʼi kia aere ki runga? tei akataitaia mai to tatou au taeake i to tatou ngakau, tei na ko mai e, E au tangata mamaata e te roroa to ratou i to tatou nei; e au oire i te mamaata, e kua patuia ki runga roa i te rangi ra; e kua kite oki matou i te au tamariki a Anaka i reira.

29 Kua karanga atura au kia kotou, Auraka e rutetetete, auraka oki e mataku ia ratou.

30 Na to kotou Atua ra na Iehova, ko tei na mua ia kotou ra, e tamaki i ta kotou tamaki; mei tana katoa i rave ia kotou i Aiphiti ki mua tikai i to kotou uaorai mata:

31 E i te medebara nei, kua kite io nei oki koe i to Atua ra ia Iehova i te apai anga ia koe, mei te tangata e apai i tana tamaiti, i na te arataa katoa i aereia mai e kotou na, e tae rava mai nei kotou ki ko nei.

32 E i taua mea nei, kare kotou i akarongo i to kotou Atua ra ia Iehova,

33 Ko tei na mua ia kotou na te arataa i te aere, i na roto i te ai i te po, e na roto i te tumurangi i te ao, i te kimi anga i te patia anga puakapa no kotou; ei akakite kia kotou i te ara kia aere ra.

34 Kua akarongo mairā Iehova i te varakau anga o ta kotou tuatua, riri akera, e kua taputou iora, na ko akera,

35 Kare rava tetai o teianei aronga tangata, o teianei uki kino, e kite i taua enua meitaki nei, taku i taputou atu e oronga no to kotou ai metua ra;

36 Mari ra ko Kaleba te tamaiti a Iephune; ka kite ïa aia, e ka oronga au i te enua tana i takai ra nona, e no tana au tamariki, no te mea kua aru totomapu aia ia Iehova.

37 E i riri katoa oki a Iehova kiaku ia kotou, e kua tuatua maira, Kare katoa oki koe e tae ki reira.

38 Ko Iosua te tamaiti a Nuna ra e tu ki mua ia koe na, ka tae ïa ki reira; ko te akamaroiroi atu ïa: nana oki e akanoo ia Iseraela i reira.

39 E ta kotou au tamariki, ta kotou i tuatua ra e, ka riro, e ta kotou au tamariki varevare kare i kite i te meitaki e te kino i teianei rā, ko te ka tae ïa ki reira, e ka oronga au i te enua no ratou, e noo oki ratou i reira.

40 Kareka ko kotou na, ka oki, e aere ki te medebara, e tae tika atu ei ki te Tai Muramura ra.

41 Kua tuatua maira kotou kiaku i reira, kua na ko maira, Kua ara matou ia Iehova, ka aere matou ki runga e tamaki, i ta to matou Atua oki ta Iehova i akaue mai ia matou ra; e kua rakei iora kotou ia kotou, kua rave te tangata katoa i te taoonga tamaki, teateamamao iora kotou e aere ki runga i te maunga.

42 Kua tuatua maira rā Iehova kiaku, E karanga atu kia ratou, Auraka e aere ki runga, auraka e tamaki atu; kare oki au i ko na i rotopu ia kotou na, ka pou aea kotou ki mua i to kotou au enemi.

43 Kua karanga atura oki au kia kotou, e kare akera kotou i akarongo mai, e kua akatokā iora i te tuatua a Iehova, e aere atura ma te māro ki runga i te maunga.

44 Tei vao maira te ngati Amori i noo i taua maunga ra, e aravei mai ia kotou, e kua arumaki ua maira ia kotou mei te rango meli ra, e pou iora kotou i Seira, e tae ua atura ki Horama.

45 Kua oki maira kotou, e kua aue iora ki mua i te aroaro o Iehova; kare rā Iehova i akarongo mai i to kotou reo, e kare i anga mai i te taringa kia kotou.

46 E roa akera to kotou noo anga i Kadesa ra, taua au rā oki ta kotou i noo i reira ra.