1 Ariki

11 INANGARO aturā Solomona i te vaine ke ke e manganui, ratou katoa e te tamaine a Pharao, ko te vaine ngati Moabi, e te ngati Amona, te ngati Edoma, te Sidona, te ngati Heta;

2 No te pa enua ta Iehova i tuatua mai ki te tamariki a Iseraela ra, Auraka kotou e aere atu ki roto ia ratou ra, auraka oki ratou e aere atu ki roto ia kotou na: ka riro i te akaariuia e ratou to kotou ngakau kia aru i to ratou au atua: kua riro rava to Solomona ngakau kia ratou.

3 E itu anere ana vaine, e ui ariki anake, e toru anere i te vaine tavini, anga ke atura tona ngakau i taua au vaine nana ra.

4 Tangata metua akera oki a Solomona, kua akaanga keia iora tona ngakau e te au vaine nana ki te au atua ke: kare akenei tona ngakau i tau ki tona Atua kia Iehova, mei te ngakau o tona metua ra ko Davida.

5 Kua aru atura oki a Solomona ia Asetoreta, i te atua vaine no Sidona, e te aru anga atu ia Moloka, i te idolo viivii a te ngati Amona ra.

6 Kua rave oki a Solomona i te kino i mua i te aroaro o Iehova, kare akerai i aru totomapu tikai ia Iehova, mei to tona metua mei to Davida i aru ra.

7 Kua akatu akerā Solomona i tetai ngai teitei no Kemosa, no te idolo viivii o Moabi ra, ki runga i te tuaivi i mua atu ia Ierusalema e no Moloka, i te idolo viivii o te tamariki a Amona ra.

8 E kua pera katoa aia i te au vaine ke nana ra, ko tei tutungi i te atinga kakara, e kua apai i te atinga na to ratou uaorai au atua.

9 Riri akerā Iehova ia Solomona, no te mea kua anga ke tona ngakau i te Atua no Iseraela ia Iehova, ka rua akera oki ona akakite anga mai kiaia,

10 E kua ikuiku aia iaia i taua au mea nei, e auraka aia e aru i te au atua ke: kare akerai aia i akono i ta Iehova i ikuiku mai kiaia ra.

11 Kua tuatua mairā Iehova kia Solomona, Ko koe rai i akapera maira, kare koe i akono i taku koreromotu, e taku nei au akonoanga, i akaueia atu e au ia koe ra, ka aaeia e au teianei basileia ia koe, e ka oronga au ki toou ra tavini.

12 Kare ra au e akapera i toou nei tuatau, no to metua no Davida; kia tae ra ki te rima o to tamaiti ka aae keiaʼi e au.

13 Kare ra au e aae takiri mai i te basileia katoa; ka apai ra au i tetai kopu na to tamaiti, no toku tavini no Davida, e no Ierusalema i ikiia e au nei.

14 Kua akatupu akerā Iehova i tetai ekai no Solomona, ko te ngati Edoma ra ia Hadada: e tanga no te ariki i Edoma taua tangata ra.

15 Ka noo ei oki a Davida i Edoma ra, e riro atura te rangatira o te nuku ra ko Ioaba ki runga e tanu i te aronga mate ra, kua oti akera te au tane i Edoma i te taia;

16 (Ka ono akera oki o Ioaba marama i te noo anga i reira e to Iseraela katoa, e ope rava akera te au tane i Edoma i te tipu keia.)

17 Oro aturā Hadada i reira, koia e tetai pae ngati Edoma, e aronga tavini o tona metua, ma ia katoa ra, aere anake atura ki Aiphiti; e tamaiti iti a Hadada i reira.

18 Aere atura ratou mei Midiana atu, e tae atura ki Parana: e kua arataki atura ratou i te tangata mei Parana atu, aere atura ki Aiphiti, kia Pharao ki te ariki o Aiphiti ra; e kua oronga maira aia i te are nona, e kua akono atura i te kai nana, e kua oronga i te kainga nona.

19 Kite puia mai a Hadada e Pharao, e kua oronga atura aia i te taeake o tana uaorai vaine ei vaine nana, i te tuaine o te ariki vaine ra ia Tahapene.

20 Anau akera ta taua tuaine o Tahapene i te tamaiti nana ia Genubata, e topa ua atura te u ia Tahapene i te ngutuare o Pharao: kapiti katoa aturā Genubata ki te ngutuare o Pharao, i roto i te au tamariki a Pharao.

21 Kite akerā Hadada i Aiphiti e kua moe katoā Davida ki o tona ai metua katoa ra, e kua mate te rangatira o te nuku ra ko Ioaba, kua karanga aturā Hadada kia Pharao, E tuku akena koe iaku, e aere au ki toku ra enua.

22 Kua tuatua mairā Pharao kiaia, Eaa taau mea toe iaku nei, i anoano ei koe e aere ki toou ra enua tikai? Kua karanga atura aia, Kare rava ïa: e tuku ua ra koe iaku.

23 Kua akatupu akera te Atua i tetai ekai rai nona, i te tamaiti a Eliada ia Rezona, ko tei akaruke i tona pu i te ariki o Zoba ia Hadadezera:

24 Kua akaputuputu iora aia i te tangata kiaia ra, e riro atura ei rangatira no tetai takanava, ka ta ai a Davida ia ratou i Zoba; riro atura ratou ki Damaseko, e kua noo ratou i reira, e kua au atura ratou i Damaseko.

25 E ekai aia no Iseraela e ope rava akera to Solomona au rā, te taka ra te takinga-kino o Hadada: e kua makitakita aia ia Iseraela, riro atura aia ei ariki no Arama.

26 E ko Ieroboama te tamaiti a Nebata no Zereda i Epharata ra, e tavini no Solomona, ko Zerua te ingoa o tona metua vaine, e vaine takaua, kua akateitei aia i tona rima i te ariki.

27 Teia te mea i akateitei ei aia i tona rima i te ariki: kua akatu a Solomona ia Milo, e kua patu aia i te au vaʼi i ngaangaa i te oire o tona metua ra o Davida.

28 E tangata kaumaiti taua tangata ra ko Ieroboama: te kite ra oki a Solomona i te maroiroi o taua tangata ra, kua akariro atura iaia ei rungao i te apinga uipa i te ngutuare o Iosepha.

29 Tei taua tuatau ra, te aere uā Ieroboama mei Ierusalema atu, e kua aravei akera te peroveta ra ko Ahia i Silo iaia i te arataa; kua kakau aia ki te kakau ou; ko raua anake ra i te ngai ato:

30 Kua opu akerā Ahia i taua kakau ou i runga iaia ra, kua aae iora e okotai ngauru e rua ara aenga:

31 Kua karanga atura aia kia Ieroboama, Ka rave mai koe e kia okotai ngauru aenga naau uaorai: te na ko maira oki te Atua o Iseraela ko Iehova, I na, e aae au i te basileia i te rima o Solomona ra, ka tukuia atu e au nga kopu okotai ngauru kia koe:

32 (Okotai ra ona kopu e toe no toku tavini no Davida, e no Ierusalema, te oire i ikiia e au no roto i te au kopu katoa o Iseraela nei:)

33 No te mea kua akaruke ratou iaku, e kua akamori i te atua vaine o to Sidona ia Asetoreta, e ia Kemosa i te atua no Moabi, e ia Moloka i te atua no te tamariki a Amona, e kare akenei i aere na toku nei arataa i te akono anga i tei tika ki mua i oku nei mata, e taku nei au akonoanga, e taku nei au tuatua-tau, mei tona metua mei ia Davida.

34 Kare ra au e rave katoatoa mai i te basileia i tona rima: ei ariki rai aia i te au rā katoa o tona ora anga nei, no toku tavini no Davida, i ikiia e au ra, no te mea kua akono aia i taku au akauenga, e taku au akonoanga.

35 E rave ra au i taua basileia nei i te rima o tana tamaiti, e ka oronga atu au i nga kopu tino ngauru ra kia koe.

36 Ka oronga ra au i tetai kopu no tana tamaiti, kia vai ua mairai ta toku tavini ta Davida mori ki mua iaku i Ierusalema nei, i te oire i ikiia e au noku uaorai ei vairanga no toku nei ingoa.

37 Ko koe taku e ka rave, e ka riro koe ei tutara ki runga katoa i ta to ngakau e anoano ra; ei ariki oki koe ki runga ia Iseraela.

38 Ka riro oki kia akarongo mai koe i taku katoa e akaue ia koe, e kia aere koe i toku ra au arataa, e kia rave koe i tei tika i toku mata nei, i te akono anga i taku nei au akonoanga e taku nei au akauenga, mei ta toku tavini i rave mei ta Davida, ei vaitata katoa au ia koe, e naku e patu i te are mou noou, mei taku i rave i to Davida, e ka oronga oki ia Iseraela kia koe;

39 E no reira au e tairo ei i te ngutuare o Davida, auraka ra ei mea mutu kore.

40 No reirā Solomona i umuumu ei ia Ieroboama e ta; kua tu akerā Ieroboama e kua oro ki Aiphiti, ki te ariki o Aiphiti kia Sisaka, noo atura i Aiphiti e mate aturā Solomona.

41 E te toenga o te tuatua ia Solomona, e te au mea katoa tana i rave ra, e tona oki pakari, kare ainei tei tataia ki roto i te buka angaanga a Solomona?

42 E to Solomona tuatau i te ariki anga i Ierusalema ki runga ia Iseraela katoa e a ïa ngauru i te mataiti.

43 Kua moe iorā Solomona ki o tona ra ai metua, e tanumia iora aia i roto i te oire o tona metua ra o Davida; tupauia akera aia i te au e tana tamaiti ra e Rehoboama.