1 Paraleipomeno

13 KUA tuatua iorā Davida ma te au rangatira no te au tausani, e no te au anere, e te rangatira ravarai.

2 Kua karanga aturā Davida ki te uipaanga katoa o Iseraela, Kia tika ia kotou na, e te au ra ki to tatou Atua kia Iehova, e tono tatou i te karere ki to tatou au taeake e pini ua ake, ko tei toe i te enua katoa i Iseraela nei, e ia ratou katoa i te kau taunga, e te au ngati Levi, i to ratou au oire, e te au kainga, e akaputuputu mai ki o tatou nei:

3 E apai mairai tatou i te aruna a to tatou Atua ki o tatou nei: kare oki tatou i ui tika ki reira i te tuatau ia Saula.

4 Kua tuatua maira te uipaanga katoa ra a e akapera ratou: e mea tika oki taua tuatua ra ki te tangata ravarai.

5 Kua akaputuputu katoa mairâ Davida ia Iseraela katoa ra, mei Sihora i Aiphiti ra ,e tae ua atura ki te tomoanga i te oire ra ko Hamata, e apai mai i te aruna a te Atua i Kiriata-iearima.

6 Kua aere iorā Davida e Iseraela katoa ki runga ki Baala, koia oki Kiriata-iearima, ki o Iuda ra, e apai mai i te aruna a te Atua a Iehova, ko tei noo i rotopu i nga kerubi, ko tei tautopaia tona ingoa i reira.

7 Kua akauta maira ratou i taua aruna a te Atua ra, ki runga i tetai kariota ou, mei roto i te are o Abinadaba; e na Uza e Ahio i arataki mai i taua kariota ra.

8 Kua imene nui a Davida e Iseraela katoa ki mua i te aroaro o te Atua, e kua akatangi iora i te kinura, e te nabala, e te tophe, e te sumebalo, e te au pu.

9 E tae atura ratou ki te ngai pâpâ sitona a Kidona, kua akatika aturâ Uza i tona rima e mou i te aruna, kua turorirori ïa oki nga puakatoro.

10 Kua tupu akera te riri o Iehova ia Uza, e kua ta iora iaia, koia i tuku i tona rima ki runga i te aruna; mate rava akera aia i reira ki mua i te aroaro o te Atua.

11 Mainaina iorā Davida, i te mea kua rave iorā Iehova ia Uza, i tapaiaʼi taua ngai ra ia Pereza-uza, e tae rava akenei ki teianei rā.

12 Kua mataku iorā Davida i te Atua i taua rā ra, na ko atura, E tika aina oki kia apai i te aruna a te Atua kiaku nei?

13 Kare akerai a Davida i apai mai i te aruna ki ona uaorai ki te oire o Davida, apai ke atura ki te are o Obeda-edoma i Gata ra.

14 Kua vaoo ua iora te aruna a te Atua i te kopu-tangata o Obeda-edoma ra i roto i tona are, e toru akera marama. Kua akameitaki mairā Iehova i te ngutuare o Obeda-edoma, e te au mea katoa nana ra.