Hosea

11 I TO Iseraela tamariki anga i inangaro atu ei au iaia, e kua tiki au i taku tamaiti i Aiphiti.

2 Ia ratou i kapiki ra i teianei kua aere ke ratou: kua apai ratou i te atinga ki te au Baala, e kua tutungi i te rakau kakara na te idolo kotikotiia ra.

3 Naku oki i apii ia Epheraima i te aere, i te mou anga i to ratou rima; kare ra ratou i kite e ko au tei akaora ia ratou.

4 Kua arataki au ia ratou ki te taura a te tangata nei, i te au ri ra i te aroa: e kua riro au ia ratou mei tei akamāmā i te zugo i runga i to ratou kaki, e kua tuku au i te kai kia ratou.

5 Kare aia e oki ki te enua i Aiphiti; e riro ra to Asura ei ariki no ratou, no te mea kare i tika ia ratou kia akaokiia mai.

6 E vai tamou rai te koke ki runga i tona au oire, ka pou oki tona au pa, e ka apuku ravaia, no ta ratou uaorai akakoro anga.

7 Kua māro toku ra iti-tangata i te kotoe ki muri iaku: kapiki oti ia ratou kia aere mai ki Tei Teitei ra, kare rava tetai i akateitei iaiai.

8 E akapeea au i te tuku anga atu ia koe, e Epheraima e? i te akaruke anga atu ia koe, e Iseraela e? e akapeea au i te akariro anga atu ia koe mei ia Adama? e riro ei koe mei ia Zeboima iaku? kua tu ke toku ngakau i roto iaku nei; kua tupu oki toku manako aroa.

9 Kare au e akatupu i te otooto anga o toku riri, kare au e ariu atu e akapou rava ia Epheraima: e Atua oki au, kare i te tangata; i Tei Tapu i rotopu ia koe ra: kare oki au e aere atu ma te riri.

10 E aru ratou ia Iehova, kia ngunguru aia mei te liona ra: kia ngunguru aia ra, e rapurapu mai ei te au tamariki mei te opunga o te rā maira.

11 E rapurapu mai ratou mei te manu mei Aiphiti mai, e mei te kukupa mei te enua maira mei Asura: e naku ratou e akanoo ki roto i to ratou uaorai au are, te tuatua mairā Iehova.

12 Kua akapini mai Epheraima iaku ki te pikikaa, e te ngutuare o Iseraela ki te tapikipiki: Te mana nei ra Iuda i te Atua, e te vai pikikaa kore nei ïa i Tei Tapu roa ra.