Iosua

5 E KITE akera te au ariki katoa o te ngati Amori i te pae i Ioridana i te opunga o te rā ra, e te au ariki katoa o te ngati Kanaana i taatai ra e, kua tamarō a Iehova i te vai ra ko Ioridana ki mua i te tamariki a Iseraela, e tae anake maira matou ki tetai pae; kua ngaevaeva ua iora to ratou ngakau, kare rava akera e manga maroiroi i roto ia ratou i te tamariki a Iseraela.

2 I reira ta Iehova tuatua anga mai kia Iosua, Ka rave ana i te au matipi koi, e peritome akaou i te tamariki a Iseraela, ko te tu rua ïa.

3 Kua rave iorā Iosua i te au matipi koi, peritome iora i te tamariki a Iseraela i Gibeaaralota.

4 Teia te mea i peritome ei a Iosua ia ratou: ko te au tane ra tei aere mai mei Aiphiti maira, i te au tangata tamaki katoa ra, kua ope ïa i te mate i te arataa i te medebara ra, kia riro mai ratou mei Aiphiti maira:

5 Ko te au tangata katoa i aere mai mei Aiphiti maira kua peritomeia ïa: kareka te aronga katoa i anau i te medebara ra, i te aerenga mai mei Aiphiti maira, kare ïa i peritomeia ra.

6 Ka a akera o te tamariki a Iseraela ngauru anga i te mataiti i te aere ua anga i te medebara, e ope rava akera te au tangata tamaki katoa i aere mai mei Aiphiti maira i te mate, no te mea kare ratou i akarongo i te reo o Iehova ra: ko tei taputouia e Iehova e, kare rava ratou e kite i te enua ta Iehova i taputou ki to ratou ai metua ra e, e oronga mai no tatou, e enua taʼe a vai ua te u e te meli ra.

7 E ta ratou au tamariki ia akatupuia e ia ei tupau ia ratou ra, ko ta Iosua ïa i peritome, no te mea te vai peritome kore ua ra ratou, kare rai ratou i peritome ia ratou i te arataa ra.

8 E ope akera te au tangata katoa i te peritomeia, noo ua iora ratou i to ratou ngai ki roto i te puakapa kia ora ratou ra.

9 Kua tuatua mairā Iehova kia Iosua, Kua uri keia e au te kino o Aiphiti ia kotou i teianei rā. I tuatuaia taua ngai ra ia Gilagala e tae rava akenei ki teianei rā.

10 Patia iora te tamariki a Iseraela i te puakapa i Gilagala, e kua akono ratou i te pasa i te rā okotai ngauru ma a o te marama ra, i te aiai, i te ngai mataataa i Ieriko ra.

11 E kua kai iora ratou i te sitona o te enua ra kia popongi ake taua rā pasa ra, ei areto akaopue kore, e te tunu paka i taua rā ra.

12 E kai anake iora ratou i te sitona o te enua ra, kore akera te māna kia popongi ake; kare atura oki a te tamariki a Iseraela e māna; kai iora ra ratou i te kai o taua enua ra o Kanaana i te reira mataiti.

13 E taua noo anga o Iosua i vaitata i Ieriko ra, kua nānā akera tona mata, akara akera, e i na, te tu ua maira tetai tangata ki mua iaia ma tana koke i unuiia i tona rima; kua aere aturā Iosua kiaia ra, e kua karanga atura kiaia, No matou aina koe, e no to matou au enemi ainei?

14 Kua tuatua maira aia, Kare; i aere maira au ei Rangatira no te au nuku a Iehova nei. Kua tipapa iorā Iosua ki raro tona mata i te one, kua akamori atura; e karanga atura kiaia, Eaa taau tuatua, e taku Atu, ki to tavini nei? 15 Kua tuatua maira taua Rangatira o te nuku a Iehova ra kia Iosua, Ka tatara ana i to tamaka i to vaevae iora, e ngai tapu oki taau e tu mai na. E kua pera oki a Iosua.