Iobu

8 KUA karanga aturā Biladada ngati Sua, na ko atura,

2 Mei te aa te roa o tenana tuatua naau? e te au tuatua a to vaa mei te matangi viviki ra?

3 E ruri ke ainei te Atua i te tuatua-tau? e te ruri ke nei ainei te Mana katoatoa i te tuatua-tika?

4 Ara ua rai taau au tamariki iaia, e kua akarukeia ratou e ia no ta ratou ara;

5 Kia tika ra ia koe i te kimi i te Atua i tenana, e kia pure oki koe ki te Mana katoatoa ra;

6 Angairi e tuatua-tika taau e te tiratiratu; e riro tikai aia i te ara mai ia koe i tenana, e e akamanuia i to nooanga tuatua-tika ra.

7 Mea ngiti ua rai taau i mua ua nei, ka maata rava ïa taau i te openga.

8 Ka ui ana, ko taku ïa tuatua kia koe, i tei muatangana ra uki, e i to ratou ra ai metua taau e akonokono i te kimi atu:

9 Ko tatou nei oki, no nanai ua nei ïa, e te kite kore, no te mea ko to tatou puke rā i te ao nei, e tau ïa ki te ata:

10 Kare ainei na ratou e apii mai ia koe, e akakite mai kia koe, ka tuku mai ei i tetai aronga tuatua no roto i to ratou ngakau?

11 E tupu ainei te raupo auraka ei vari? e tupu ainei te mauku auraka ei vai?

12 I te vai uriuri anga ra, kare i kokotiia ra, ko tei mimiro vave ana ïa i te au rakau katoa ra.

13 Koia katoa te aerenga o te aronga ravarai i akangaropoina i te Atua; e te manakonakoanga o te pikikaa ra, e kore ïa:

14 Ka pe oki tona manakonakoanga, e te are o te tukutukuraonui tona irinakianga.

15 Ka irinaki aia ki tona ra are, kare ra e mou: ka tāpu piri oki aia i te reira, kare ra e roa i te vairanga ra.

16 Kare te rā i iti ra, te uriuri ra aia, e te toro ra tona rara na runga i tona kainga.

17 Ko tei taviri aere tona au aka na runga i te putunga toka, e kua kite i te ngai toka.

18 Kia mate aia iaia i tona ra ngai, e riro aia i te uuna iaia, e te na ko ra e, Kare au i kite ia koe.

19 I na, ko te manga rekareka teia o tona ra aerenga, e na raro rai i te one tetai i te tupu.

20 I na, kare te Atua e akaruke i te tangata apa kore, kare oki aia e mou atu i te rima o te aronga rave tuatua kino.

21 E akaki mairai aia i to vaa ki te kata, e to reo ki te rekareka.

22 Ko te aronga e riri mai ia koe ra, e vaîia ïa ki te akama; e te puakapa o te aronga kino, e kore rava ïa.