Salamo

26 TEI ia koe te tuatua iaku, e Iehova; i aere ua ana oki au ma te apa kore: i irinaki ana oki au ia Iehova; kare au e paeke.

2 E unuunumou mai koe iaku, e timata mai, e Iehova; e akamakitoro marie mai koe i toku manako e toku ngakau.

3 Ko to takinga-meitaki ra, tei mua ïa i toku mata: e i aaere ana au i te tuatua-mou naau ra.

4 Kare au i noo i roto i te au tangata tarevakaua, kare oki i kapiti i roto i te aronga pikikaa.

5 E mea riri naku te uipa anga tangata ara; kare oki au i noo i roto i te aronga kino.

6 Ka orei au i oku puke rima i te apa kore; ka akapini atu ei au i to atarau, e Iehova:

7 Ka akakite atu ei ma te reo akameitaki, ka tatau ei oki i taau katoa ra au angaanga taka ke ra.

8 Kua inangaro au, e Iehova, i te vairanga o to are, e te ngai i noo ei toou ra kakā.

9 Auraka kia kapiti katoaia toku vaerua ki to te aronga rave ara, e ko au katoa nei ki to te aronga toto ra:

10 Te vai ra te ravenga kino i roto i to ratou rima; kua ki oki to ratou rima katau i te tutaki.

11 Kareka au nei, te aere nei au ma te apa kore; e akaora koe iaku, e aroa mai oki iaku.

12 Te takai nei toku vaevae i te ngai maniania; ka akameitaki rai au ia Iehova i roto i te au uipa anga ra.