Te au Mapu—Ka Autu Ainei Kotou i te Timata Anga o te Tiratiratu Kerititiano?
“KARE koe e manako ana te tu mako kore e tiratiratu kore ia. Te rave ua ra koe kia mataora. E tika, kua kite koe me kite to nga metua me kare te au aronga pakari, ka akatupu te reira i te ati ngakau e kia maata i te au manamanata. Inara me te rave tamataora ua ra koe, arai ua atu rai koe i te reira au manako ki vao.”
Te mapu ou tei tuatua ia nei kua rave tamou rai oki aia i te akaturi ma te muna. Kua taki rua aia i te tu oraanga, pikikaa atura i tona nga metua e te putuputuanga Kerititiano. Kare oki i kite e te poka nei aia i te timata anga o te tiratiratu Kerititiano.
E tauatini ua atu o te au mapu Kerititiano kare i autu i te reira tu timata anga o te tiratiratu. E te tika rai! No te mea, te aere na te Tiaporo ko Satani te ‘tamaki ra’ ki te iti tangata o te Atua, i te tauta anga kia aati i to ratou tiratiratu. (Apokalupo 12:17) Kua akariro tikai aia i te au mapu ei tapao no tana “ravenga pakari.” (Ephesia 6:11, Kingdom Interlinear) Ka inangaro ia i reira te tautaanga tikai e te aruaruanga kia noo tiratiratu.
Eaa tikai te tiratiratu? I roto i te Tuatua Tapu Epera, te reo taito no te tuatua tiratiratu kua akaari mai i te aroa inangaro ki tetai peretana e akakoroanga e tu mai nei. (Salamo 18:25) Kare te reira i akaari mai i tetai tatua paruparu te ka vave ua i te momotuia, mari ra e topiri anga te ka vai rai e oti ua atu tei akakoroia ki te reira peretana. I roto i te au Tuatua Tapu Ereni, te reo taito no te tuatua “tiratiratu” kua apai te reira i te manako tu tapu mou, tuatua tika, me kare ngateitei.
Ka o i reira te tiratiratu ki te pirianga meitaki ki te Atua. Te akakite mai ra te Ephesia 4:24 kia tatou kia “akatangata ou oki ko tei angaia . . . i te tuatua tika e te tapu mou.” Te inangaro ainei koe kia tiratiratu kia Iehova? Ka anoanoia koe kia tatanu i tetai topirianga tiratiratu kiaia, e tatua momotu kore, e te aruaruanga kia mareka iaia i roto i toou aerenga ravarai. Kia aru tika atu koe ki ta Iehova au turanga tuatua tika—noatu e mei teaa te timata anga ka tu mai kia rave ke atu!
Te au Taomianga Kia Tiratiratu Kore
E mea rekareka, te maata anga o te aronga ou i roto i te au Kite o Iehova te tauta ra kia vai tiratiratu, e te rekareka nei ratou i te akava ngakau no te reira. Kua totou ra te apotetoro ko Paulo e i te tuatau o “te au ra openga,” te tiratiratu kore te tu ia o te tangata kia kiteia. (2 Timoteo 3:1, 2, NW) Te tumatetenga ra, etai o te au mapu Kerititiano kua tuku ua i te tiratiratu kore o te ao kia ‘roromi ia ratou ki roto i to ratou tu.’ (Roma 12:2, Phillips) Akapeea ra a Satani i raukai i teia?
Te taomianga mei te aronga i toou uaorai tu ko tetai ia te ravenga pakari a Satani. Te manganui anga o te tangata e inangaro ana kia akapaapaaia ratou e etai ke, e kua kite a Satani ka akapeea me akakeu i te inangaro natura. No te inangaro kia akara ia mai e te mako ra, etai au mapu Kerititiano kua tomo atu ki roto i tetai au uriuri anga manako taukore, tu aerenga mako kore, kai avaava, konakava—pera katoa te mea akakona tau kore—kua raveia teia no te mea ua nei kia arikiia e to ratou uaorai uki e piri nei.
Te inangaro nei a Satani ia tatou kia ‘kapiti ia tatou uaorai i te anoano o te kopapa nei, i te akatupu anga i ta te kopapa e ta te ngakau i inangaro ra.’ (Ephesia 2:3) Kua kite tikai oki aia i te nuti ririnui i te anoano ainga i te tuatau te “vai mapu rai.” (1 Korinetia 7:36, NW) E te anoano ra aia ia koe kia oatu ki taua au anoano ra. Etai au mapu Kerititiano kua topa rava atu ki roto i tona rima na roto i te akarakara anga i te au puka tutu tangata taakaua, te au teata, te au vitio me kare na te rave anga i te amirimiri kia navenave tona kopapa. Ko teia au apinga i reira, kua taki ki te au raveanga kino o te tiratiratu kore. Me kua ‘roromi’ ainei to Satani ao ‘ia koe ki roto i tona tu’ i roto i etai o teia au ngai?
Nooanga i te Oraanga Takirua
Te rave i te tarevake taukore mei te akaturi ko te reira e tu pakari ia, e etai au mapu kua kairo atu i to ratou au manamanata. Kua riro ratou mei te “aronga pikikaa” tei tuatuaia i roto ia Salamo 26:4 (NW) “tei uuna oki i to ratou tu.” Ko te reira au mapu te aere ra e rua tu oraanga, tetai tu i roto i te mataara te kapiti ra ki to ratou au metua me kare tetai au Kerititiano pakari e ko tetai mataara me kapiti atu ki te pupu o to ratou uki.
Inara te nooanga takirua o te tu oraanga, e kaimoumou taime, e te kino. Te rave angaanga kare e arairaiia te maata anga i te taime ka taki te reira ki tetai au rave anga tarevake. E noatu oki e te kino ra te akava ngakau o tetai i te akamata anga, me roa atu tetai i te rave kino, ka meangiti mai te akakeu anga i to tetai akava ngakau no te rave tarevake. Ka riro tetai kia ‘akamutu i te manako mamae’ no te kino i raveia.—Ephesia 4:19, Kingdom Interlinear.
Me tae ana ki teia ngai, ka ngata i reira kia tataraara i te tarevake o tetai e kia rauka mai te tauturu. Mei te mea tikai e kua o atu tetai au mapu Kerititiano ki roto i te tarevake. Ka vai i reira te manako tiratiratu tarevake. Te mapu tei kiritiia tana tuatua i te akamata anga kua akamarama e: “Ka kite rai koe taau e rave ra, e ka kite e kua tarevake. I te tumu e kia kore tetai aronga e o atu ki roto i te manamanata, kua akatika ia koe kia kore e akakite ki tetai ua atu.”
Inara me ‘pipini tetai no tona tu’ mei tona nga metua me kare te putuputuanga, kare oki e rauka i tetai i te pipini mei a Iehova. “Kare rava e mea ngaro iaia: te vai ua nei ra te au mea katoa ma te maeu rava ki mua i tona mata tei iaia te tuatua ia tatou nei.” (Ebera 4:13) Kua akapapu mai te Puka Tapu ia tatou e: “Ko tei tapoki i tana ara, kare ia e manuia.” (Maseli 28:13) Kare e roa ka akakiteia te tarevake. Kare oki e rauka i tetai i te aka mea kite atu kia Iehova. Kua tuatua te Maseli 3:7 e: “Auraka koe kia pakari i toou uaorai manako: ko Iehova ra taau e mataku, ka akaruke ei i te kino.” Akamaara katoa, e: “Tei te au ngai katoa nei to Iehova mata, i te akara anga i te kino e te meitaki.”—Maseli 15:3.
Te mapu tei tuatua ia i mua atu, e te maata anga i tetai atu tei o atu ki roto i te rave o te muna tarevake, kua kite ia mai e kua akaateaia aia e tona au oa mei te putuputuanga Kerititiano. I muri mai kua meitaki akaou mai i te pae vaerua e kua ariki akaouia. Tira ua, e mataara ngata tikai teia kia apii i te aiteanga o te tiratiratu!
‘Akatikatikaanga i te au Mea’ ma te Atua
Ka akapeea me kua kitea takereia te tiratiratu kore o tetai na roto i tetai mataara, penei na te rave anga i tetai tu tarevake? E mea ngoie ua te akavare i tetai ua atu e kia patoi e ka anoanoia kia akatika i te au mea. Tetai mapu tei rave muna i te akaturi kua tuatua e: “Kua akamaata oki au i taku angaanga tutu aere, te manako anga e na teia e tapoki mai i te tarevake.” Te tu unui ki muri o te iti tangata Iseraela kua aiteite i te tauta anga kia taparu ia Iehova na roto i te au atinga. Inara kua kopae a Iehova i te reira akangateitei anga pikikaa. Kua raurau atu Aia kia ratou: “E orei ia kotou kia ma kotou; e tuku ke atu i te kino ta kotou e rave ra ki mua i oku nei mata; kua oti ana te rave i te kino.” Ka ariki a Iehova i ta ratou au atinga mari ua me ‘akatikatika ia te au mea kiaia.’ Ko te tika rai ia i teia tuatau no tetai ua atu tei o atu ki roto i te rave tarevake.—Isaia 1:11, 15-18.
Kare oki tetai e tika kia akatikatika i te au mea kia Iehova na roto ua i te akakite anga ki toou au oa e piri ra. Te mea mua, kare oki toou au oa piri e oronga ua ana rai i te tauturu tau, i te mea e kua kotinga ua ia ta ratou i kite i te oraanga. Te mea maata rava atu, kare e rauka ia ratou i te akakore i taau ara. Na te Atua ua te reira. No reira e “riringi i toou ngakau” ki aia i te tataraara. (Salamo 62:8) Noatu ka oonu toou akama i toou tu, kia papu ra e ko Iehova ‘te maata ra oki iaia te akakore i te ara.’ Isaia 55:7.
Ka anoano oki koe i te tauturu takake. “E akakite ki toou nga metua, akakite viviki ki te aronga pakari—i te akamataanga rai,” te akamaroiroi ia a tetai Kerititiano ou tei puapingaia mei te reira tu tauturu. Ae, toou nga metua tei roto ia i te turanga meitaki kia tauturu ia koe. “Oronga i toou ngakau” kia raua, te akakite anga i te katoa anga o toou au manamanata. (Maseli 23:26, NW) Ka rauka ia raua i te akanoo i tetai tauturu takake akaou mei te aronga pakari mei te mea e ka anoanoia te reira.—Iakobo 5:14, 15
Te Akaarianga i te Tiratiratu Tika—Akapeea?
E tika rava, e meitaki atu i mua rai, auraka e topa ki roto i te tu tiratiratu kore. Te akakite ra te Salamo 18:25 kia tatou e: “E te tangata tiratiratu ra, e tiratiratu katoa [a Iehova]. I te tangata viivii kore ra, e viivii kore katoa taau.” Ka akameitakiia Iehova i te aronga te noo tamou rai i te au turanga teitei i te aerenga.
E au mataara, ke ra tetai te ka riro ei timata i toou tiratiratu. Ei akaraanga, ka akapeea mei te mea e kua aere toou taeake na tetai mataara mako kore. Ka tuku ainei koe i te tiratiratu tei arataki keia ki te reira oa kia tapokiia toou tiratiratu kia Iehova? Te ravenga aroa kia raveia koia oki kia aravei i te reira oa e kia raurau atu kiaia kia ripoti i te reira ki tona nga metua me kare ki te aronga pakari. E akakite ki toou oa tane me kare e vaine e rave i te reira i roto i tetai tuatau tau, ka raveia kia koe uaorai i te reira. Kua tuatua te Maseli 27:5 e: “E ngari ake te kauvai akakite ateaia mai, i te inangaro kia uuna ia.” Na te tauturu anga i toou oa i roto i teia mataara, ka akakite ia koe i toou uaorai anoano tika o toou ra pirianga e pera katoa e te oonu o toou tiratiratu kia Iehova.
Noatu eaa te timataanga, te maroiroi no te akaari i te tiratiratu ka rauka mai te reira mei te pirianga ketaketa uaorai kia Iehova. Te pure ngakau tae e te apii maroiroi e mea anoanoia mei te mea e kia rekareka ia te reira pirianga. Te tu marama ua, te katoatoa o te au mapu tei tarevake i akakiteia mai i mua ra kua akakite e ko ta ratou au pure e ta ratou uaorai apiianga i matau te akaputu ra—e i tetai mai kua akamutu takiri. Kare ia a Iehova i rai tika tikai ia ratou, e kare i roa kua kapitiia mai e te aerenga viivii ra. Te akaketaketa mai ainei koe i toou pirianga kia Iehova na roto i te pure e taau uaorai apii kia vai tiratiratu ua rai?
E tika, etai au taime e manako ana koe penei te ngere nei koe i te rauka anga tetai tuatau mataora. “Etai au taime mei te mea atura e te tangata o te ao nei te mataora ra,” i tuatuaaʼi tetai mapu vaine. “Me piritia ra koe ki roto i tetai turanga, ka kite ia koe e kare ia i te mataora.” Te tuatua nei oki aia no tana i kite, i te mea e i o ana aia ki roto i te ainga tau kore, e nui atura e te titiri i te pepe. “Te noo ki roto i te tuatua mou e paruru anga ia,” te tuatua nei aia—e apiianga tana i kite i te mataara ngata. Kua akamaara mai te Salamo ia tatou e: “E au maata to te aronga i inangaro i ta [te Atua] ture.”
No reira, e tauta koe kia vai tiratiratu ua. E angaanga i te patu i tetai pirianga openga kore ma Iehova. E makitakita i te kino e mou i te mea meitaki. (Roma 12:9) Akakite mai te Salamo 97:10 kia tatou e: “Ko kotou tei inangaro ia Iehova, kia rikarika i te kino ra; te tiaki ra aia i te vaerua o tona aronga tapu ra; te akaora ra aia ia ratou i te rima o te aronga kino ra.” Ae, ei mapu Kerititiano, ka puapinga ia koe mei te paruru anga a Iehova e ka rekareka i te oraanga mutu kore mei te mea e ka autu koe i te tiratiratu Kerititiano.