Levitiku

12 KUA tuatua mairā Iehova kia Mose, na ko maira,

2 E karanga atu koe ki te tamariki a Iseraela, e na ko atu, Kia to te vaine, e kua anau te tamaiti ra, e viivii aia i reira e kia po itu; mei te au rā katoa kia akatakaia aia i tona maki ra, ko tona ïa viivii anga.

3 E kia tae ki te po varu ra e peritomeiaʼi te kiri i mua o taua tamaiti ra. 4 Ka noo ua ra aia e kia toru ngauru ma toru i te po, i te tamā anga iaia uaorai; auraka aia e akatukia ua atu i te mea tapu, auraka oki e tomo ki roto i te ngai-tapu, e kia ope ra te au rā tamā anga iaia ra.

5 E tamaine ra tana e anau ra, kia rua ïa ona ebedoma i te viivii anga, mei tei tona akatakaanga ra; e e noo ua aia, e kia ono ngauru ma ono i te po, i te tamā anga iaia uaorai.

6 E kia ope tona au rā tamā anga, to te tamaroa ra, e to te tamaine, e apai mai ei aia i tetai punua mamoe mataiti okotai ra ki te taunga i te ngutupa Are uipaanga ra, ei atinga karakaratio, e tetai punua rupe, e kare ra, tetai kukupa, ei tarangaara.

7 E nana e apai ki mua i te aroaro o Iehova, ei tapokiangaara nana; ka mā aia i reira i tona ra viivii anau ra. Ko te ture teia no te vaine kia anau te tamaroa, e te tamaine. 8 E kia kore e tika iaia kia apai mai i te mamoe, ei kukupa tana e apai mai kia rua ake; e kare ra, kia rua ake punua rupe; ei atinga karakaratio tetai, ei tarangaara tetai: e na te taunga e apai i te tapokiangaara nana, e ka mā ïa aia.