Isaia

16 E AKAUNGA atu i te punua mamoe ki te tutara o te enua ra, mei Sela atu ki te medebara ra, ki te maunga ra o te tamaine a Ziona.

2 Mei te manu i taviuia i te koanga e rere aere ua ra, ka pera katoa oki te au tamine a Moabi ki te ngai aereia i Aranona ra, i te na ko anga e,

3 E tuku atu i te ako; ka kimi i te tuatua-tau; e akariro i toou marumaru mei te po i te avatea nei rai; e uuna i tei tuaruia ra; auraka e aaki i tei oro ra:

4 To Moabi i akarukeia ra, kia noo ua ana ïa kia koe na; ei paruru koe no ratou i te ta aere ra. Kua kore akenei oki te takinga-kino; kua kore te ta aere; ko tei takitaki mai ia tatou ki raro na, kua takoreia i te enua nei.

5 E akatinamouia oki te terono i te aroa: e noo oki tetai ki rungao ma te tuatuamou, i te puakapa o Davida, tetai Akava te ka kimi marie i te tuatua-tau, e te ka akatupu i te tuatua-tika.

6 I akarongo ana tatou i te parau no Moabi; e ngakau parau maata tona: tona akateitei, e te ngakau parau, e tona riri: e mea puapinga kore ra tana pikikaa.

7 No reira e kakaoaʼi Moabi no Moabi, ka kakaoaʼi taua enua katoa ra; e aue kotou no te au tumu no Kira-haraseta; kua taia tika oki ratou.

8 Kua mae aere oki te au kainga o Hesebona: te vine no Sibema, kua aatiia e te ui mataiapo o te pa enua ra te au rara memeitaki nona ra, tei tae tika ki Iazera, tei tae roa ki te medebara: kua toro ua atura tona au rara e tae ua atura ki tetai pae tai ra.

9 E teianei e aue au mei te aue o Iazera i te vine i Sibema: e tamauu au ia koe i toku roimata, e Hesebona e, e Eleale e: kua rokoia oki toou mou e toou mou vine, e te aoa tamaki.

10 E kua rave keia te rekareka, e te pereperekavana i te kainga uua ra; kare ratou e imene, e kare oki e maeva ki roto i te kainga vine ra: kare te takatakai e takatakai i te wina i roto i te au āriki ra: kua akakore akenei au i te maeva.

11 E teianei, ka tangi toku ngakau nei mei te tangi kinura ra ia Moabi, e to roto iaku nei ia Kira-haraseta.

12 Ka riro oki e kia akakite ua rai Moabi iaia uaorai, e kia akaroiroi aia iaia uaorai ki runga i te ngai teitei, e kia tomo aia ki roto i tona uaorai ngai tapu e pure, kare ra e manuia.

13 Teia te tuatua i tuatuaia e Iehova ia Moabi i muatangana;

14 I teianei ra, kua tuatua mairā Iehova, na ko maira, Kia oti nga mataiti e toru ra, mei te mataiti o tei ouia ra, e akaitiiaʼi te aronga nunui o Moabi, ma tona urupu maata katoatoa ra; ka riro oki te totoenga e tokoiti ua, e te matutu kore.