1 Samuela

14 E TAE akera ki tetai rā, kua karanga atura te tamaiti a Saula ra ko Ionatana ki te tangata ou apai taoonga nana ra, Taki aere taua ki tera atu pae, ki te puakapa o te Philiseti. Kare ra aia i akakite ua atu ki tona metua.

2 Te noo rā Saula i te openga mai o Gibea, i raro ake i te remuna, i vaitata i Migerona: e te au tangata e ono paa anere i piri kiaia ra;

3 E ko Ahia, te tamaiti a Ahituba, te tuakana no Ikaboda, te tamaiti a Phinehaza, te tamaiti a Eli taunga a Iehova i Silo ra, tei kakau i te tiputa. Kare te au tangata i kite e kua aere a Ionatana.

4 E puke mato kekeo tei taua arataa i aereia e Ionatana ki te puakapa o te Philiseti ra, okotai tei tetai pae, okotai oki tei tetai pae: ko Bozeza te ingoa tetai, e ko Sene te ingoa o tetai.

5 Te ngai kekeo o tetai, anga tika atura ïa ki Mikemasa i te pae i apatokerau ra: e te ngai kekeo o tetai ra, anga tika maira ïa ki Geba i te pae i apatonga ra.

6 Kua tuatua mairā Ionatana ki taua tangata ou apai taoonga tamaki nana ra, Taki aere taua ki te puakapa o tera ra au peritome kore: peneiake ko te rave a Iehova i te angaanga no tatou nei: kare oki ïa peu ia Iehova i te akono i te maata e te iti kia akaora ra.

7 Kua karanga atura taua apai taoonga tamaki nana ra, Ka rave koe i ta to ngakau e inangaro ra: ka aere ra, i na, tei vaitata katoa au ia koe i taau e anoano ra.

8 Kua tuatua mairā Ionatana, I na, te aere nei taua ki taua au tangata ra, e ka akakite taua ia taua uaorai ki ratou.

9 Kia tuatua mai ratou ki taua nei, Arika na kia tae atu matou kia kotou na; ka tu ua taua i reira i to tatua ra ngai, kare taua e aere ki runga kia ratou ra.

10 kia tuatua maira ratou e, E aere mai ki runga nei kia matou nei; e aere ïa taua ki runga i reira: ei akairo oki te reira na taua e, kua tuku mai a Iehova ia ratou ki to tatou nei rima.

11 Kua akakite atura raua ia raua uaorai ki taua puakapa Philiseti ra; e kua tuatua akera te Philiseti, I na, te aere maira te Ebera mei roto mai i te au vaarua i pipini ei ratou ra.

12 Kua tuatua maira to taua puakapa ra kia Ionatana e te apai taoonga nana ra, na ko maira, E aere mai ana ki runga nei kia matou nei, e na matou e akakite atu kia korua i tetai mea. Kua tuatua mairā Ionatana ki taua apai taoonga nana ra, E aru mai koe iaku ki runga: kua tuku mai a Iehova ia ratou ki te rima o Iseraela.

13 Kua totoro ua aturā Ionatana ki runga i nga rima e nga vaevae, e te apai taoonga nana ra i te aru anga iaia; topa iora taua au tangata ra ki mua i te aroaro o Ionatana; e kua ta katoa atura taua apai taoonga nana ra na muri iaia ra.

14 E taua pou muatangana ra ta Ionatana e ta te apai taoonga nana i rave ra, e rua ïa paa ngauru anga i te tangata, ki runga i te manga one e aite ki tetai pae ekera te maata, e tau ki nga puakatoro e rua kia arote.

15 Rokoia iora te nuku e te tumatetenga i te puakapa anga ra, e te tangata katoa: to te punanga ra, e te aronga noni katoa ra kua rokoia e te tumatetenga; e kua ngaueue katoa te enua; no ko mai i te Atua taua tumatetenga ra.

16 Kua akara iora te au tiaki o Saula i Gibea i o Beniamina ra; e i i na, te ngaeva ua ra taua nuku maata ra, te akapueurikiriki aere ua atura ratou.

17 Kua tuatua akerā Saula ki te aronga i vaitata iaia ra, Ka tatau ana kia kitea atu to tatou i riro ra. E kia tatau oki ratou ra, i na, kare ua rā Ionatana e te apai taoonga nana ra.

18 Kua karanga aturā Saula kia Ahia, Ka apai mai ana i te aruna a te Atua ra. Tei te tamariki a Iseraela oki te aruna a te Atua i taua tuatau ra.

19 Te karangaranga ua rā Saula ki te taunga, te maata ua ara te keukeu i roto i te puakapa Philiseti ra: kua karanga aturā Saula ki taua taunga ra, Kua oti ua.

20 E kua maeva iorā Saula e te tangata ravarai i ona ra, e kua aere anake i ora e tamaki; e i na, ko te au koke o te tangata ravarai kua ariu anake ïa ki tona uaorai taeake; e eke maata rava atura.

21 E te Ebera i noo i o te Philiseti i muatangana ra, tei aere katoa mai oki ki te puakapa ra, kapiti katoa maira ki to Iseraela kia Saula raua ko Ionatana ra.

22 E to Iseraela ravarai i pipini i te maunga ra ko Epheraima, kite akera ratou e, kua ati te Philiseti, kua aruaru katoa atura ratou ia ratou i taua tamaki ra.

23 Kua akaora iorā Iehova ia Iseraela i taua rā ra: tae rava atura taua tamaki ra ki Bete-avena.

24 E tumatetenga to Iseraela i taua rā ra, kua akataputouia oki te tangata katoa e Saula, kua tuatua oki aia e, Kia taumaaia te tangata e kaikai e aiai rava atu, kia tutaki atu au i toku au enemi. Kare anake atura te tangata i tongi ua atu i te kai.

25 E tae ua atura oki te tangata katoatoa ki tetai ngai vaorakau ra; e meli oki to reira, te vai ua ra ki runga i te one.

26 Kia tae ra te tangata ki roto i te taua ngai vaorakau ra, e i na, te topata ua ra te meli ki raro; kare rava e tangata i tuku ua ake i tona rima ki te vaa; kua mataku oki te tangata i taua taputou ra.

27 Kare rā Ionatana i kite i tona metua i te tuku anga mai i taua taputou ra ki te au tangata ra: e kua ko ua atura aia i te kauru rakau i tona rima ki roto i tetai melikerio, e kua tuku iora i te rima ki tona vaa; e kua puera rava atura ona mata.

28 Kua karanga atura tetai o taua aronga ra, na ko atura, Kua ikuiku mamate mai to metua i te au tangata nei ma te taputou, na ko maira, Kia taumaaia te tangata e kai i te kai i teianei rā: i potopoto ei te aʼo o te au tangata nei.

29 Kua tuatua mairā Ionatana, Kua tumatetenga te au tangata nei i toku metua: ka akara ua ana, taku ïa tuatua kia koe, i toku mata kua puera, ko au i tongi ua ake i tetai manga meli iti nei!

30 Ka tanga atu ei i te au tangata nei, naringa ratou i kai ua i nakonei i te kai no te āru o to ratou au enemi i rauka ia ratou ra? kare ainei e maata rava to te Philiseti mate i reira?

31 E ta aere ua atura ratou i te Philiseti i taua rā ra mei Mikemasa atu, e tae ua atura ki Aialona: potopoto rava akera te aʼo o te tangata.

32 Kua oro ua atura te tangata ki runga i te apinga, kua rave iora i te mamoe, e te puakatoro e te punua puakatoro, e kua ta ua iora ki raro i te one; e kua kai io ra te au tangata i te puaka ma te toto katoa ra.

33 E kua karanga atura ratou kia Saula, na ko atura, I na, kua ara te au tangata akera ia Iehova, kua kai i te puaka ma te toto. Kua karanga atura aia, Kua ara kotou: ka akataka mai ana i tetai toka maata ki ko nei kiaku nei.

34 Kua tuatua akerā Saula, Ka aere ana kotou i rotopu i te au tangata, ka karanga atu ei kia ratou, E taki mai te tangata ravarai i tana puakatoro e tana mamoe, i ko nei ta ai ka kai ei; auraka kia ara ia Iehova i te kai anga mate toto katoa. Kua taki anake maira te tangata katoa i ta ratou puakatoro, i reira te tainga i taua po ra.

35 Kua akatu akerā Saula i tetai atarau na Iehova, ko te atarau mua tikai teia tana i akatu na Iehova.

36 Kua tuatua akerā Saula, E aere tatou ki raro ki te au Philiseti i teianei po, ka noni atu ei e ao ua ake, e auraka rava tetai tangata o ratou kia vaooia. Kua tuatua maira ratou, E rave koe i taau e anoano ra. Kua tuatua akera te taunga, E akavaitata tatou ki te Atua i ko nei.

37 Kua ui aturā Saula ki te Atua, E aere ainei au ki te Philiseti? Ka tuku ainei koe ia ratou ki te rima o Iseraela nei? Kare ra aia i tuatua mai kiaia i taua rā ra.

38 Kua karanga aturā Saula, E akavaitata mai ana kotou, e te aronga mamaata ravarai o te au tangata nei; e akara kia kitea teianei ara i teianei rā.

39 Te ora ra oki a Iehova i akaora ia Iseraela nei, tei taku tamaiti uaorai teianei ara, tei ia Ionatana, ka mate tikai aia. Kare takiri ra tetai o taua au tangata katoa ra i ki ua mai kiaia ra.

40 Kua karanga atura aia kia Iseraela katoa ra, Ei tetai pae kotou, e ei ia maua ko taku tamaiti ko Ionatana tetai pae. Kua tuatua maira te au tangata kia Saula, Ka rave koe i taau e anoano ra.

41 Kua karanga aturā Saula kia Iehova, E te Atua o Iseraela e, e tuku mai koe i te tika. E ko Ionatana raua ko Saula tei akakiteia mai; kua ora iora te au tangata.

42 Kua tuatua akerā Saula, Ka tuku ana i te kelero ia maua ko taku tamaiti nei ko Ionatana. E ko Ionatana tei akakiteia mai.

43 Kua tuatua akerā Saula kia Ionatana, E akakite mai koe kiaku i taau i rave. Kua akakite aturā Ionatana kiaia, kua karanga atura, Kua tongi ua arai oki au i tetai manga meli mea ngiti i runga i te kauru o te rakau i toku rima ra, e i na, ka mate au.

44 Kua tuatua mairā Saula, Kia kore koe e mate, e Ionatana e, kia pera mai te Atua kiaku nei e kia maata atu rai.

45 Kua karanga atura te au tangata kia Saula, Ka mate a Ionatana, i raukaʼi oki teianei ora maata i Iseraela nei? Auraka rava ïa: te ora rā Iehova kare rava tetai rauru o tona mimiti e topa ki raro i te one; ko te Atua oki ma ia katoa tei rave i te angaanga i teianei rā. Kua akaora iora te au tangata ia Ionatana, e kare akera aia i mate.

46 E aere aturā Saula, akaruke iora i te Philiseti, aere anake atura te Philiseti ki o ratou uaorai ra.

47 Rauka iora te taoonga ariki ia Saula ki runga ia Iseraela, e kua tamaki atura aia i te au enemi katoa nona e pini ua ake, ia Moabi, e te au tamariki a Amona, e ia Edoma, e te au ariki o Zoba, e te Philiseti: e te au ngai katoa i aereia e ia ra kua akaanata rai aia ia ratou.

48 Maroiroi atura oki aia, e ta iora aia i to Amaleka, e kua akaora iora aia i a Iseraela i te rima o te aronga i takinga-kino ia ratou ra.

49 Teia nga tamariki tamaroa a Saula ra, ko Ionatana, e ko Isui, e ko Melikisua; teia oki te ingoa o nga tamaine toko rua nana ra; ko te ingoa o te tama mua ra, ko Merabi ïa, e te ingoa o tei muri ake, ko Mikala ïa:

50 E te ingoa o te vaine a Saula ra, ko Ahinoama ïa, e tamaine na Ahimaaza: e te ingoa o te rangatira o te nuku nana ra, ko Abenera ïa, e tamaiti na tetai metua o Saula na Nera.

51 E taua metua o Saula ra, ko Kisa ïa, e taua metua o Abenera ra, ko Nera ïa, e tamaiti ïa na Abiela ra.

52 E tamaki maata ta Iseraela i te Philiseti e ope ua ake to Saula ra tuatau: e kua kite a Saula i te tangata maroiroi e te toa ra, kua rave aia iaia ei tangata nona.