2 Paraleipomeno

13 E TAE akera ki te ngauru ma varu o to te ariki ra to Ieroboama mataiti, i ariki ei a Abia ki runga ia Iuda.

2 E toru ona mataiti i te ariki anga i Ierusalema. Ko Mikaia te ingoa o tona metua vaine, e tamaine na Uriela no Gibea ra. e tamaki oki ta Ieroboama raua ko Abia.

3 Kua akamou iorā Abia i te tamaki, e nuku tangata tamaki anake tona, e a anere te tausani e aronga tangata ikiia: kua akamou iorā Ieroboama i te tamaki e rave iaia, e varu ïa anere anga i te tausani e aronga tangata ikiia, e aronga toa anake.

4 Kua tu aturā Abia ki runga i te maunga ra ko Zemaraima, tei te maunga ra ko Epheraima, e kua karanga atura, E akarongo mai ana, e Ierobama, e Iseraela katoa oki:

5 Kare kotou i kite e, na te Atua no Iseraela na Iehova i oronga mai i te basileia ra i runga ia Iseraela no Davida, e tuatau ua atu, nona, e no tana au tamariki, ei koreromotu tai?

6 E ko Ieroboama te tamaiti a Nebata, te tavini no Solomona te tamaiti a Davida ra, kua tu mai ïa kua kaitamaki i tona ra pu.

7 E kua kapiti katoa mai kiaia te tangata kanga, e te upokoango, ko tei akamaroiroi ia ratou uaorai e tamaki ia Rehoboama te tamaiti a Solomona ra, te vai ou rā Rehoboama e te ngakau pakari kore i reira, e kare akera aia i mou ki mua ia ratou.

8 E tenana, te manako na kotou e pou ia kotou te basileia o Iehova i te rima o te au tamariki a Davida; e aronga maata rai oki kotou, e tei ia kotou na nga punua puakatoro auro, ta Ieroboama i anga ei atua no kotou.

9 Kare ainei kotou i tuaru ke i te kau taunga na Iehova, te au tamariki a Aarona, e te ngati Levi, e kua akariro ua io nei kotou i te tangata ei au taunga na kotou mei ta te pa enua ke ra? e kia aere mai te tangata e akataoonga iaia uaorai ma te puakatoro ou e nga mamoe toe e itu, e riro ïa ei taunga na te au mea kare i te atua ra.

10 Kareka matou nei, ko Iehova ïa to matou Atua, e kare akenei matou i akaruke iaia: e te kau taunga, tei rave i te angaanga na Iehova ra, e tamariki ïa na Aarona, e te rave nei oki te au ngati Levi i ta ratou angaanga:

11 E te tutungi nei ratou, i te au popongi katoa nei, e te au aiai katoa nei, i te atinga karakaratio na Iehova, e te atinga kakara ra: e te areto o te aroaro nei, te akanoonoo marie nei ki runga i te kaingakai auro meitaki ra; e te vairanga lamepa auro e to reira au lamepa kia tutungiia i te au aiai katoa nei: te akono nei oki matou i tei ikuikuia mai e to matou Atua e Iehova; kua akaruke ra kotou iaia.

12 E i na, teia uaorai te Atua tei ia matou ei rangatira, e te kau taunga katoa nana ma te au pu e akatangi atu i te tangi akapoitirere ia kotou. E te au tamariki a Iseraela e, auraka kotou e tamaki i te Atua o to kotou ai metua ra ia Iehova; kare e manuia ta kotou.

13 Kua akaueia ra e Ieroboama te kotipu e na muri mai ia ratou; tei mua mai oki ratou ia Iuda, e tei muri mai oki ia ratou te kotipu.

14 E kia akara tika Iuda ki muri, i na, tei mua tetai tamaki e tei muri tetai; kua kapiki atura ratou kia Iehova, e kua akatangi iora te kau taunga i te au pu.

15 Kua maeva iora te au tangata no Iuda; e te maeva ua ra te au tangata no Iuda, eke iorā Ieroboama i te Atua, e Iseraela katoa, i mua i te aroaro o Abia e ko Iuda.

16 Ati atura te tamariki a Iseraela i mua i te aroaro o Iuda; e kua tuku maira te Atua ia ratou ki roto i to ratou rima.

17 Kua ta aturā Abia e te au tangata nona, e pou maata ua atura: e rima anere i te tausani anga i te tangata ikiia no Iseraela, tei topa mate takiri rava i reira ra.

18 Vi atura te tamariki a Iseraela i reira; autu atura te tamariki a Iuda, no te mea, te irinaki ra ratou i te Atua o to ratou ai metua ia Iehova.

19 Kua aru aturā Abia ia Ieroboama, e riro maira iaia eianei puke oire, ko Betela e to reira au vila, e ko Iesana e to reira au vila, e ko Epherona e to reira au vila.

20 Kare oki a Ieroboama i maroiroi akaou i te au rā o Abia ra: taia iora oki aia e Iehova, e mate rava akera.

21 Tupu aturā Abia i te maroiroi anga, e kua akaipoipo atura i te au vaine okotai ngauru ma a, e anau maira oki tana au tamariki tamaroa tai takau ma rua, e te au tamaine oki okotai ngauru ma ono.

22 E te toenga o te tuatua ia Abia e tona au aerenga, e tana au tuatua, kua tataia ïa ki roto i te tuatua a te peroveta ra a Ido.