Salamo

102 E IEHOVA e, e akarongo mai i taku pure, kia tae atu oki toku reo kia koe ra. 2 Auraka koe e uuna i to mata iaku i te rā e tumatetengaʼi au ra; e ariu mai to taringa kiaku nei: i te rā e kapiki atu ei au ra, e akarongo vave mai koe iaku. 3 Kua ngaro oki oku nei puke rā mei te auai ra, e kua ka oku nei au ivi mei te vaie marō ra. 4 Kua taia toku ngakau, e kua mae mei te ngangaere ra; kua ngaropoina oki iaku taku nei kaingakai. 5 Kua piri toku au ivi ki toku nei kiri i toku aue ua anga. 6 Mei te kate o te medabara ra au; mei te kusa o te ngai motutaa ra. 7 Te tapapa nei au, e mei te manu iti ra au, koia anake ra ki runga i te are. 8 Te akakino mai nei toku au enemi iaku e po ua atu te rā; no te maata o te riri iaku, kua taputou ratou iaku: 9 No te mea te kai nei au i te reu mei te kai ra, e kua irokia taku e inu nei ki te roi-mata, 10 No toou ra mainaina e toou ra riri: Kua apai oki koe iaku ki runga, ei akaruke anga ki raro. 11 Mei te maru-ata e peke ra toku nei au rā, e kua mae au mei te ngangaere ra. 12 Kareka koe, e Iehova, ka tu koe e rimua, e te manako anga ia koe i tera uki i tera uki. 13 Ka riro koe i te tu mai ki runga e aroa ia Ziona: no te mea, ko te tuatau e kiteia mai ei aia ra, koia oki te tuatau i akonoia ra, kua tae. 14 Te pingapingareka nei oki to au tavini i te au toka nona nei, e te tangi nei i to reira one ra. 15 Ei reira te au etene e mataku ei i to ingoa, e Iehova, e te au ariki katoa o te ao nei i toou ra kakā; 16 Kia patu a Iehova ia Ziona, kia kitea mai aia ma tona uaorai kakā; 17 E akonoia e ia te pure a tei putaua, e kare e akavaavaa i ta ratou pure. 18 Kia tataia teia no tetai uki atu, kia akapaapaa te aronga te ka angaia ra ia Iehova: 19 No te mea kua akara mai aia ki raro i tona ngai-tapu teitei ra; i runga i te rangi to Iehova akara anga mai i te enua nei; 20 E akarongo i te ngunguru anga o tei tapekaia ra; kia tuku i te aronga i akonoia no te mate: 21 Kia akakiteia to Iehova ingoa i Ziona, e te akameitaki iaia i Ierusalema; 22 Kia uipa katoatoa mai te au tangata ra, e te au basileia, e akamori ia Iehova. 23 Kua akakore mai aia i toku maroiroi i te arataa ra, kua akapoto aia i oku puke rā, 24 Kua tuatua iora au, E taku Atua, auraka au e apai keia i rotopu i toku nei au rā; e vai rai oki toou ra mataiti e ope roa ake te au uki katoa ra. 25 Naau i akamou i te enua, i taito roa ra; te au rangi oki, na toou ïa rima i anga. 26 Ka riro ra te reira i te pou, e toe ra koe: e ka piro ratou ravarai mei te kakau ra: ka kopaeia ratou e koe mei te kakau ra: kopae ua rai ratou, 27 Ko koe rai koe, e kare rava toou ra mataiti e ope. 28 Ka akamouia te au tamariki a to au tavini, e to ratou ra uanga ka akatinamouia ki mua ia koe ra.