1 Samuela

22 AERE ke aturā Davida, pipini atura ki roto i te ana ra ko Adulama: e kite akera tona ai tuakana, e te ngutuare katoa o tona metua ra, aere katoa atura ratou i reira kiaia ra.

2 E te au tangata katoa i eketumuia ra, e te au tangata kai ou, e te aronga katoa i noongata ra, kapiti katoa atura ïa kiaia ra; riro akera aia ei rangatira ki rungao ia ratou: ka a akera anere o te tangata i te kapiti anga atu kiaia ra.

3 Mei reira kua aere aturā Davida ki Mizepe i o Moabi ra: e kua karanga atura ki te ariki o Moabi, E akatika mai koe i taku nei tuatua, e noo toku metua tane e toku metua vaine i o kotou nei, kia kite ake ana au i ta te Atua ravenga iaku nei.

4 Kua kave atura aia ia raua ki mua i te aroaro o taua ariki o Moabi ra: e kua noo iora raua ki ona i te tuatau katoa tei roto a Davida i taua punanga ra.

5 Kua tuatua maira te peroveta ra ko Gada kia Davida, Auraka koe e noo i roto i tenana punanga; e aere ke, e aere ki te enua ra ki Iudea. Aere aturā Davida e tae atura ki te vaorakau ra ki Hareta.

6 E kite akerā Saula e, kua kiteā Davida e te au tangata katoa iaia ra, (te noo ua rā Saula i Gibea i raro ake i tetai rakau i Rama ma te korare i te rima, e tona au tangata katoa i te tu ua anga i vaitata iaia ra;)

7 Kua karanga aturā Saula i reira ki tona au tangata e tu ua mai i vaitatao iaia ra, Ka akarongo mai ana, e te au ngai Beniamina e, oronga mai ainei te tamaiti a Iese i te kainga e te kainga vini no kotou katoa na? e akariro aina aia ia kotou katoa ei rangatira no runga i te tausani, e ei rangatira no runga i te anere?

8 I kotikoti kupengaʼi kotou iaku nei, i kore ravaʼi tetai o kotou nei i akakite mai kiaku e, kua papau taku tamaiti i te koreromotu ki te tamaiti a Iese ra! kare ra tetai o kotou i tangi mai iaku, kare oki i akakite mai kiaku e kua akakoko taku tamaiti i toku tavini e moetapapa iaku nei i teianei rā? 9 Kua tuatua mairā Doega ngati Edoma ra; tei tukuia ki rungao i te au tavini o Saula ra, na ko maira, Kua kite au i te tamaiti a Iese i te aerenga mai ki Noba, ki te tamaiti a Ahituba kia Ahimeleka ra.

10 E kua ui aia kia Iehova iaia ra, e kua apai aia i te kai nana, e kua apai oki i te koke a te Philiseti ra a Golia nana.

11 Kua tono atura te ariki i te tiki i taua taunga ra ia Ahimeleka te tamaiti a Ahituba ra, e te ngutuare ravarai a Ahituba ra, e te ngutuare ravarai o tona metua, i te kau taunga i Noba ra: e kua aere katoa maira ratou ki te ariki ra.

12 Kua karanga aturā Saula, E te tamaiti a Ahituba ra, ka akarongo mai ana. Kua tuatua maira aia, Teia au, e taku pu.

13 Kua karanga aturā Saula kiaia, Eaa korua i kotikoti kupengaʼi iaku, ko koe e te tamaiti na Iese, kua oronga koe i te kai nana, e te koke, e kua ui koe ki te Atua iaia, ei akamaroiroi iaia, kia moetapapa aia iaku mei tei teianei rā?

14 Kua tuatau mairā Ahimeleka ki te ariki, na ko maira, Koai atu oki te tangata akono meitaki i to au tavini ravarai, mari ra ko Davida, ko te unonga o te ariki na, ko te akarongo ua oki kia akueia aia e koe ra, e kua akangateiteiia oki i toou ra ngutuare?

15 I reira ainei toku akamata anga i te ui atu ki te Atua iaia ra? auraka rava ïa tuatua iaku, auraka te ariki e tuatua e, e ara ta tona tavini, e ta te ngutuare katoa o toku metua: kare rava oki to tavini i kite i tenana au tuatua, i te iti e te maata.

16 Kua karanga atura te ariki, Ka mate tikai koe, e Ahimeleka, ko koe e te ngutuare katoa o to metua ra.

17 Kua karanga atura te ariki ki te au orooro i tu ua mai i vatatao iaia ra, Ka rave, ka ta i te kau taunga a Iehova; no te mea kua tauturu katoa ratou ia Davida, e no te mea kua kite ratou iaia i te oro anga, e kare i akakite mai kiaku. Kare akera taua au tavini o te ariki ra i rave ua atu te rima i te kau taunga a Iehova ra.

18 Kua karanga atura te ariki kia Doega, Ka ariu koe, ka ta i taua au taunga ra. Kua ariu atura taua ngati Edoma ra, ko Doega, kua rave atura i te kau taunga ra, ta atura, e varu akera ngauru e rima ara i te tangata, ko te aronga e kakau ki te au tiputa orongā, tei mate iaia i te reira rā.

19 E ko Noba katoa, te oire o te kau taunga, tei taia e ia ki te mata koke; ko te tane, e te vaine, te tamariki, e te kai ua katoa, e te puakatoro, e te asini, e te mamoe, kua taia ki te mata koke.

20 Kua ora iora tetai tamaiti a Ahimeleka te tamaiti a Ahituba, ko Abiatara te ingoa, e oro atura kia Davida ra.

21 Kua akakite aturā Abiatara kia Davida e, kua pou te kau taunga a Iehova i te taia e Saula.

22 Kua tuatua mairā Davida kia Abiatara, Kua kite ana au i taua rā ra, no te mea i reira katoa taua ngati Edoma ra ko Doega, e e riro aia i te akakite kia Saula ra: noku i mate ei te ngutuare katoa o to metua ra.

23 E noo mai koe i ko nei kiaku nei, auraka e mataku: ko te umuumu mai ia koe kia mate, kua umuumu mai ïa iaku kia mate: kareka kiaku nei ka ora ïa koe.