Te Aue o Ieremia

2 AUE te akapoiri anga o te Atu i te tamaine a Ziona i te riri nona e! kua uri mai aia mei te rangi e raro roa i te enua nei i te manea o Iseraela, kare oki i maara i tona takainga vaevae i te rā riri nona e!

2 Kua apuku uaia e te Atu ma te aroa kore i te au nooanga ravarai o Iakoba ra: kua uritumu aia ki raro ma te riri i te au akapuanga anga ketaketa o te tamaine a Iuda: kua tuku rava aia ia ratou ki raro i te one: kua viivii iaia te basileia e te ui ariki i reira.

3 Kua kokoti ke atu aia ma te riri otooto i te au tara katoatoa o Iseraela: kua akaariu ke aia i tona rima katau i te aroaro o te enemi, e kua ka iora ki o Iakoba mei te ai mura akapou e pini ua ake.

4 Kua akamingi aia i tana ana mei te ekai: kua akatano maira i tona rima katau e aite ki te enemi, kua ta iora aia i te au mea katoa inangaroia e te mata ra i te puakapa o te tamaine a Ziona: kua riringi mai aia i tona riri otooto mai te ai ra.

5 I riro maira te Atu mei te enemi: kua apuku aia ia Iseraela, kua apuku aia i tona katoa ra au are ariki: kua uritumu aia i to au punanga ketaketa nona, e kua akamaata aia i te aue e te mii i te tamaine a Iuda.

6 Kua vavaʼi aia i tana koro mei to te kainga ra: kua akakore i tona ngai uipa anga: kua akangaro ravā Iehova i Ziona nei, i te au oroa tapu, e te sabati, e i te otooto anga o tona riri, kua akaviivii aia i te ariki ma te taunga.

7 Kua akaruke te Atu i tana atarau; kua akavaavaa aia i tona ngai-tapu; kua oronga mai aia ki roto i te rima o te enemi i te au patu o tona ra au are ariki; kua mutamuta ratou ki roto i te are o Iehova, mei tei te rā oroa tapu ra.

8 Kua manako a Iehova e vavaʼi i te patu o te tamaine a Ziona: kua akatika oki aia i te tataura, kare aia i akaoki i tona rima i te akapou anga: i aue ei te patu e te koro iaia; okotai o raua mii anga.

9 Kua topa rava tona au pa ki raro i te one; kua vavaʼi aia e kua aati i tona au tea: tona ariki e tona ui ariki ra, tei rotopu ïa i te au etene: kare e ture; kare oki a te au peroveta nona e orama i kitea ia Iehova ra.

10 Te noo ua ra ratou ki raro i te one, te muteki ua ra te aronga pakari o te tamaine a Ziona: kua āū ratou i te one-pueu ki runga i to ratou upoko; kua tatua ia ratou uaorai i te kakau paoa: te tupou nei te au paretenia o Ierusalema i to ratou mimiti ki raro i te one.

11 Kua poepoe toku mata i te roi-mata, kua ngarepurepu toku ngakau, kua riringiia taku ate ki raro i te one, no te pou o te tamaine a toku nei au tangata; te rere a mate ua oki te varevare e te kai u ki roto i te au arataa o te oire nei.

12 Te tuatua nei ratou ki to ratou au metua vaine, Teiea te sitona e te wina? te rere a mate ua ra ratou mei tei puta i roto i te au arataa o te oire nei, e kua unui akera to ratou vaerua ki roto i te umauma o to ratou metua vaine.

13 E akapeea atu au kia koe? eaa taku kia akaaite atu ia koe, e tera ra tamaine a Ierusalema e? e akatau atu au ia koe ki te aa, kia akapumaana atu au ia koe, e tera ra tamaine paretenia a Ziona e? mei te moana toou na pou i te maata: koai te rapakau ia koe?

14 Kua akara to au peroveta i te mea puapinga kore e te neneva noou: kare ratou i akakite mai i taau ara kia ruri keia toou tuikaa anga; kua akara ra ratou i te apainga puapinga kore noou ra, ei tuaru anga.

15 Te aronga katoa e aere na te ara nei te pokarakara nei i te rima ia koe ra; te aviri nei ratou, e te takirikiri nei i to ratou upoko, ki te tamaine a Ierusalema, te na ko ra, Ko taua oire ainei teia i karangaia nei i te tu ke roa i te manea, e rekareka anga no te ao katoa?

16 Kua amama anake te vaa o to au enemi ia koe: kua aviri, e kua pakati i te nio: kua karanga ratou e, Kua apuku uaia aia e tatou: koia ïa, ko to tatou teia rā i tapapa ra; kua rauka ia tatou, kua kitea.

17 Kua rave a Iehova i tana i akakoro ra; kua akatupu aia i tana tuatua i tei akaueia e ia i te au rā i muatangana: kua uritumuia ïa e ia ma te aroa kore: e kua rekareka te enemi iaia ki runga ia koe; kua teitei iaia te tara o to au ekai.

18 Kua kapiki to ratou ngakau ki te Atu, E te patu o te tamaine a Ziona, kia maringi a kauvai ua te roi-mata i te po e te ao: auraka koe e akaangaroi; auraka te tamaine a to mata ra e akapaki.

19 Ka tu, ka kapiki nui i te po: i te momua o te ara anga ra, riringi a vai ua i to ngakau ki mua i te mata o te Atu: ka akateitei na i to rima kiaia, kia ora oki to au tamariki varevare ra, ko tei mate ua i te pongi i te openga mai o te au arataa katoa nei.

20 Ko akara mai na, e Iehova, e akamanako i taau i akapera maira. E kai ainei te vaine i ta ratou i anau ra, i te tamariki ikiikiia e te rima? E taia ainei te taunga ma te peroveta ki roto i te ngai-tapu o te Atu ra?

21 Ko te tamaiti iti e te ruaine i te moe anga ki raro i te one i te au arataa ra: kua inga taku au paretenia e taku au tangata ou ra i te koke: i te rā i riri ei koe ra kua ta koe; kua tamate rava koe ma te aroa kore.

22 Kua kapiki koe, mei tei te rā akonoia ra, ki toku au mea rikarika ra e pini ua ake; e tae akera ki te rā i riri ei a Iehova ra, kare i ora, e kare i toe: ko tei ikiikiia e au ra, e kua pakari iaku ra, kua pou ïa i toku enemi.