Ezekiela

6 KUA tae maira oki te tuatua a Iehova kiaku nei, na ko maira,

2 E te tamaiti a te tangata na, ka anga atu i to mata ki te au maunga i Iseraela nei, ka totou atu ei ia ratou,

3 Ka na ko atu ei, E te au maunga i Iseraela nei, ka akarongo mai i te tuatua a te Atu ra a Iehova; Te na ko maira te Atu ra ko Iehova ki te au maunga, e ki te au tuaivi, ki te au kauvai ra, e te au o ra; I na, ko au, ko au nei rai, e apai mai au i te koke ki runga ia kotou, e e akakore au i ta kotou au ngai teitei.

4 E tanea ta kotou au atarau, e ta kotou au tiki rā, e ngaangaa ïa: e akainga oki au i to kotou aronga i taia ki mua i te aroaro o to kotou au idolo.

5 E tuku oki au i te au turuma o te tamariki a Iseraela ki mua i to ratou au idolo; e akapueurikiriki au i to kotou au ivi e pini ua ake ta kotou au atarau.

6 I to kotou au nooanga katoa ra e pou te au oire, e tanea oki te au ngai teitei; kia pou oki ta kotou au atarau e kia tanea atu, e kia ngaangaa oki to kotou au idolo e kia kore atu, e kia tipupuia to kotou au tiki ra, e kia akaruke ravaia ta kotou au angaanga.

7 E inga oki te aronga taia i rotopu ia kotou, e kite oki kotou e ko Iehova au.

8 E akatoe ra au i tetai toenga, kia ora tetai pae o kotou i te koke i roto i te au etene, kia pueurikiriki ke kotou ki te pa enua ra.

9 E to kotou e ora ra, e akamaara mai ïa iaku i rotopu i te au etene e apai tuikaaiaʼi ratou ra; kia paruparu to ratou ngakau akaturi, tei akaruke iaku, e to ratou mata, tei riro ki te akaturi aere ki to ratou au idolo: e akaviivii oki ratou ia ratou uaorai i te au kino ta ratou i rave ra, i to ratou au mea viivii katoa ra.

10 E kite oki ratou e ko Iehova au, e kare taku e tuatua puapinga kore, i taua kino nei taku e akatupu ia ratou ra.

11 Te na ko maira te Atu ra ko Iehova; Ka papaki i to rima, ka takatakai i to vaevae, ka karanga atu ei, Aue oki te au mea viivii kikino katoa ra a te ngutuare o Iseraela e! e inga oki ratou i te koke, te onge, e te makimate.

12 To te mamao ra, ka mate ïa i te maki-mate; e ko tei vaitata ra, e inga ïa i te koke; e ko tei toe ra, e kua akapiniia, ka mate ïa i te onge: e pera au i te akatupu i toku riri otooto ki runga ia ratou.

13 Ei reira kotou e kite ei e ko Iehova au, kia iro katoaia to ratou aronga taia i roto i to ratou au idolo, e pini ua ake ta ratou au atarau, ki runga i te au tuaivi teitei, e te au take katoa o te au maunga ra, e ki raro ake i te au rakau ruperupe katoa ra, e ki raro ake oki i te au ale nunui katoa ra, ki te ngai ta ratou i apai i te rakau kakara ki to ratou au idolo ravarai ra.

14 Ka akatika atu oki au i toku rima ki runga ia ratou, e ka akariro au i te enua ei tanea, e ei vavaranga, e iti to te medebara i Dibelata, i to ratou au nooanga ravarai ra: e kite ïa ratou e ko Iehova au.