Ieremia

42 KUA akavaitata maira oki te au rangatira katoa o te au nuku ra, e ko Ioanana, te tamaiti a Karea, e ko Iezania, te tamaiti a Husaia, e te tangata katoa, mei tei iti e tae ua atu ki tei maata.

2 E kua karanga atu ki te peroveta ra kia Ieremia. Teia ta matou tuatua kia koe, kia kiteia mai e koe ta matou pati anga, e pure oki koe ki to Atua ra kia Iehova, ia matou nei, i te toenga katoa nei; (kua iti oki matou, e toe nei, rai uaʼi matou, te kite ua nei oki o mata;)

3 Kia akakite mai to Atua ra ko Iehova i te arataa kia aere matou, e te mea e tau ia matou kia rave ra.

4 Kua karanga atura te peroveta ra ko Ieremia kia ratou, Kua akarongo oki au; i na, naku e pure ki to kotou Atua ra kia Iehova, i ta kotou i tuatua maira; e ko ta Iehova e tuatua mai ia kotou, ko taku ïa e akakite atu kia kotou, e kare rava ïa mea e vaooia e au.

5 Kua karanga atura ratou kia Ieremia, Ei kite tikai a Iehova e te pikikaa kore i rotopu ia tatou nei, e ko ta to Atua ra ta Iehova e tono mai kia koe ia matou nei, kia kore ra matou e pera.

6 I te meitaki e te kino katoa, e akarongo rai matou i te reo o to matou Atua ra ia Iehova, ta matou e tono atu ia koe nei; kia meitaki oki matou, kia akarongo i te reo o to matou Atua ra ko Iehova.

7 E ope akera nga po okotai ngauru ra, kua tae maira te tuatua a Iehova kia Ieremia ra.

8 Kua kapiki atura aia ia Ioanana, te tamaiti a Karea ra, e te au rangatira katoa o te au nuku ki ona ra, e te au tangata katoa oki, mei tei iti e tae ua atu ki tei maata.

9 E kua karanga atura kia ratou, Te na ko maira te Atua o Iseraela ra, ko Iehova, i ta kotou i tono iaku nei ei akakite i ta kotou pati anga ki mua i tona aroaro;

10 I tika ia kotou i te noo ki teianei enua, e patuia kotou e au ki runga, e kare e tuku ki raro; e tanumia kotou e au, e kare e kiriti: kua tataraara oki au i te kino taku i raveo ia kotou nei.

11 Auraka e mataku i te ariki o Babulonia, ta kotou e mataku ra; auraka aia e matakuia atu, te tuatua mairā Iehova: ei vaitata oki au ia kotou, ei akaora, e kia ora kotou i tona rima.

12 E akakite atu oki au i te aroa ia kotou, kia aroa mai aia ia kotou, e ka akaoki aia ia kotou i to kotou uaorai enua.

13 Kia karanga ra kotou e, Kare matou e noo i teianei enua, e kare e akarongo i te reo o to kotou Atua ra, o Iehova.

14 Kia na ko ra, Eiaa; e aere rai matou ki te enua ra ki Aiphiti, kia kore matou e kite i te tamaki, kia kore oki kia akarongo i te tangi o te pu ra, kia kore oki e mate i te pongi; ei reira matou e noo ei:

15 E teianei ka akarongo mai, e te toenga o Iuda e, i te tuatua a Iehova, Te na ko mairā Iehova Sabaota ra, te Atua o Iseraela; Kia māro rai kotou e anga rai i to kotou mata e aere ki Aiphiti, e aere rai ki reira noo ei;

16 E riro ïa kotou i te rokoia atu e taua koke ra ta kotou e mataku ra, i te enua ra i Aiphiti; e taua onge ra, ta kotou e mataku ra, te ka aru aere i vaitatao ia kotou ki reira ki Aiphiti; e ei reira kotou e mate ei.

17 E riro oki te tangata katoa, ko tei ariu i to ratou mata e aere ki Aiphiti noo ei, i te mate i te koke, te onge, e te maki-mate: kare rava tetai e toe, e kare rava e ora i te kino taku e apai ki rungao ia ratou.

18 Te na ko maira oki a Iehova Sabaota ra, te Atua o Iseraela; Mei toku riri, e toku riri otooto i riringiia ki rungao i tei noo i Ierusalema; e riringi katoaia toku riri otooto ki runga ia kotou kia tae kotou ki Aiphiti: e riro oki kotou ei taumaa anga, e ei vavaranga, e ei tao anga, e ei akakino anga; e kare rava kotou e kite akaou i teianei ngai.

19 I te tuatua a Iehova ia kotou, e te toenga o Iuda; Auraka kotou e aere ki Aiphiti: kia kite pu tikai kotou, kua akakite ua atu oki au kia kotou i teianei rā.

20 Kua pikikaa ra kotou i to kotou uaorai vaerua; na kotou oki i tono iaku ki to kotou Atua ra kia Iehova, e kua na ko mai, E pure koe ki to matou Atua ra kia Iehova ia matou; e te au mea katoa ta to matou Atua ra ta Iehova i tuatua maira, ko taau ïa e akakite mai kia matou, e ko ta matou ïa e rave.

21 E kua akakite au kia kotou i teianei rā; kare ra kotou e akarongo i te reo o to kotou Atua ra, o Iehova, e te au mea katoa oki tana i tono iaku kia kotou.

22 E teianei, kia kite pu tikai kotou e, e mate kotou i te koke, te onge, e te maki-mate, i tenana ngai ta kotou e inangaro na e aere kia noo.