Isaia

23 TE TUATUA ia Turia ra. Ka aue, e te au pai i Taresisa e, kua pou oki; kare e are toe, e kare rai e tomo anga ki roto! no ko mai i te enua ra no Kitima te akakite angaia mai kia ratou.

2 Ka muteki na, e tei noo i taatai; e tei akakiia e te aronga oko no Sidona, kia na tai ra.

3 Te ua o Sihora, ki rotopu i te vai maata ra; te mou o te vai ra, ko tana ïa apinga uipa; riro atura aia ei okoanga na te pa enua.

4 Kia akama koe, e Sidona e! i tuatua ana oki te moana, te punanga o te moana, na ko maira, Kare au i mamae; e kare au i anau tama na; e kare i angai tamariki, e kare i rāpu i te au paretenia.

5 Mei tei te rongo ia Aiphiti ra, ka mamae ravaʼi ratou i te rongo ia Turia ra.

6 E aere tika kotou ki Taresisa, ka aue kotou, e tei noo i taatai e.

7 Ko to kotou ainei teianei oire i rekarekaia ra, i vai ana mei ito mai? te apai keia ra aia e tona uaorai vaevae kia tuitarere aere i te ngai mamao.

8 Koai tei akakoro i teianei tuatua ia Turia nei, ki te oire i tua i te korona; tona au tangata oko, ei ui ariki anake ïa, tona aronga oko aere, ko ratou te ui rangatira o te enua nei?

9 Na Iehova Sabaota i akakoro; kia viivii te nengonengo o te au mea manea katoa ei akavaavaa i te aronga mana katoatoa o te enua nei.

10 Akanina i to enua, mei tei ninaia e te Nilo ra, e te tamaine a Taresisa e: kare rava oki e mouranga toe.

11 Kua akatika aia i tona rima ki runga i te tai, kua akangaueue aia i te au basileia: kua tuatuā Iehova ia Kanaana, kia vavaʼiia tona au punanga.

12 Kua tuatua oki aia, Kua oti ana koe i te rekareka, e tenana paretenia takinga-kinoia, e te tamaine a Sidona; ka tu, ka aere atu ki Kitima, kare rai oki koe e mou i reira.

13 I na oki te enua o te Kaledea; kare ïa aronga i karangaia e tangata i muatangana, e aronga kokaua i te medebara, i akamouia ratou e to Asura ra: kua patu ratou i to ratou au punanga; kua vavaʼi ratou i tona ra au are ariki; kua tutuamu rava ratou iaia.

14 Ka aue kotou, e te au pai i Taresisa e, kua pou takiri oki to kotou akapuanga.

15 E kia tae i te reira rā, ka akangaropoinaiaʼi Turia e kia ope te au mataiti e itu ngauru ra, mei te au rā o te ariki okotai ra: e kia ope ra taua au mataiti e itu ngauru ra, e atu ei Turia i te peʼe, mei ta te vaine akaturi ra.

16 Ka rave i te kinura, ka aere ei na roto i te oire, e tera ra vaine akaturi akangaropoina roaia e; ka akatangi meitaki i te au ao; kia manganui te peʼe, kia manako akaouia koe.

17 E kia ope te au mataiti e itu ngauru ra, e atoro mai a Iehova ia Turia; e oki aia ki tona ra oko anga apinga, e akaturi katoa atu aia ki te au basileia katoa ra, i te pa enua katoa o te ao nei.

18 E tana ra au apinga e tana mea e rauka i te oko, e tapu ïa na Iehova: kare e akaputuputuia, e kare oki e vaioia i te vairanga; e riro ra tana e rauka na ratou na tei noo ki mua ia Iehova, ei manga kia rava, e te kakau inuinu.