1 Ariki

13 E I NA, kua aere maira tetai tangata no te Atua ki Betela, mei Iuda mai, i te tuatua na Iehova; te tu ua rā Ieroboama i te pae atarau ei tutungi i te atinga kakara.

2 Kua kapiki atura aia i taua atarau ra, i tuatuaia mai e Iehova, na ko atura, E tera ra atarau e, e tera ra atarau, te na ko mairā Iehova, I na, e anau mai tetai tamaiti i te ngutuare o Davida, ko Iosia te ingoa; ka apai aia i te aronga taunga o te au ngai teitei ki runga ia koe ra, i tei tutungi i te atinga kakara ki runga ia koe ra, ka tutungiia oki te au ivi tangata ki runga ia koe ra.

3 Kua tuku maira aia i te akairo i taua rā ra, na ko maira, Teia te akairo ta Iehova i tuatua maira, I na, ka ngaa taua atarau nei, e te reu ai e vai i rungao, ka maringi ïa ki raro.

4 Kite akera te ariki i te tuatua a te tangata no te Atua, i tei kapiki i te atarau i Betela ra, kua akatika mairā Ieroboama i tona rima i runga i taua atarau ra, tuatua maira, Ka opu ana; marō atura taua rima i akatikaia e ia ra, e kare atura i tika kia akaoki mai.

5 Ngaa iora oki taua atarau ra, e te reu ai i runga i taua atarau ra, kua maringi ïa ki raro, i te akairo ta te tangata o te Atua i tuku i te tuatua a Iehova ra.

6 Kua tuatua maira te ariki, na ko maira ki taua tangata no te Atua ra, E tautopa atu koe ki to Atua ra kia Iehova, e pure koe iaku, kia akaoraia rai toku rima nei. Kua tautopa atura taua tangata no te Atua ra kia Iehova, akaoraia akera te rima o te ariki, riro atura mei tei muatangana ra.

7 Kua tuatua maira te ariki ki taua tangata no te Atua ra, Aere katoa taua, ki te are akera, e kaikai, e tutaki atu oki au ia koe.

8 Kua karanga atura taua tangata no te Atua ra ki te ariki, Oronga ua mai koe i tetai pae i te are noou, kare au e kaikai, kare e inu i te vai i teianei ngai;

9 Kua ikuikuia mai oki au e te tuatua a Iehova, na ko maira, Auraka e kaikai, auraka e inu i te vai, auraka e oki na te arataa e aereia e koe ra.

10 Oki atura aia na tetai ara ke, kare i na te ara tana i aere mai ki Betela ra.

11 Te noo ra tetai peroveta taito i Betela; e kua aere maira te au tamariki nana, kua akakite maira i te au angaanga i raveia e te tangata no te Atua i Betela i te reira rā: ko te au tuatua tana i karanga atu ki te ariki ra, kua akakite katoa ratou ki to ratou metua i te reira.

12 Kua karanga atura te metua kia ratou, I naea akenei oki aia i te aere? kua kite nga tamariki i te ara i aereia e taua tangata no te Atua ra, mei Iuda mai.

13 Kua karanga atura aia ki nga tamariki nana ra, Ka tuku ana i te nooanga ki runga i te asini naku. Kua tuku ratou i te nooanga ki runga i te asini nana: e kua noo aia i rungao,

14 E kua aru atura i te tangata no te Atura ra, rokoia atu te noo ra ki raro ake i tetai ale; kua karanga atura aia kiaia, Ko taua tangata no te Atua ra ainei koe mei Iuda mai? Kua tuatua maira aia, Ko au.

15 Kua karanga atura aia, E aere taua ki te ngutuare e kaikai.

16 Kua tuatua maira aia, Kare au e tika kia aere atu, kare au e tae atu ki roto i to are; kare au e kaikai, kare oki au e inu i te vai ia koe na i teianei ngai;

17 I tuatuaia mai oki au e Iehova, i na koia mai au, Auraka koe e kaikai, auraka e inu i te vai i reira, auraka oki koe e oki na te ara e aereia e koe ra.

18 Kua karanga atura aia kiaia, E peroveta katoa oki au mei ia koe katoa na, e kua tuatuaia mai au e tetai angela i akaueia e Iehova, na ko maira, E akaoki mai iaia ki roto i to are, kia kai aia i te kai, e kia inu aia i te vai. Kua pikikaa aia iaia.

19 E kua oki atura aia raua katoa, e kua kaikai aia i roto i tona are, e kua inu oki i te vai.

20 Te noo katoa ra raua i taua kaingakai ra, kua tae maira te tuatua a Iehova ki taua peroveta i akaoki iaia ra:

21 Kua kapiki maira ki taua tangata no te Atua mei Iuda maira, na ko maira, Te tuatua mairā Iehova, No te mea, kare akenei koe i akarongo i te tuatua a Iehova, e kare akenei koe i akono i te ikuiku i ta to Atua ra i ta Iehova i ikuiku mai ia koe ra,

22 Kua oki maira koe, e kua kai i te kai, e kua inu i te vai i teianei ngai, ta Iehova oki i tuatua mai kia koe e, Auraka e kaikai, auraka e inu i te vai; kare to kopapa e tae ki te tanumanga o to ai metua ra.

23 E pangia akera aia i te kai, e kua inu i te vai, kua tuku aia i te nooanga ki runga i te asini nana, na taua peroveta tana i akaoki maira.

24 E riro atura aia, kua aravei maira tetai liona iaia i te arataa, mate atura aia: vaoo ua iora i tona kopapa i te arataa, kua tu iora te asini i vaitata, e kua tu katoa iora te liona i vaitatao i taua kopapa ra.

25 E i na, te aere ua ra etai puke tangata na reira, e kua kite oki i taua kopapa ra i te vaoo ua anga i te arataa ra, e taua liona ra i te tu ua anga i vaitatao i taua kopapa ra: e kua aere maira ratou kua akakite maira i taua oire ra i nooia e taua peroveta taito ra.

26 E kite akera taua peroveta i akaoki mai iaia i te arataa ra, kua tuatua akera aia, Ko taua tangata no te Atua ra ïa, ko tei kore i akarongo i te tuatua a Iehova: i orongaʼi a Iehova iaia ki te liona, i etietiiaʼi aia, e i mate ei, mei te tuatua a Iehova tana i tuatua mai kiaia ra.

27 Kua karanga atura aia ki te au tamariki nana ra, na ko atura, Ka tuku i te nooanga ki runga i te asini naku. Kua tuku oki ratou i te nooanga ki runga.

28 Aere atura aia e rokoia atu te vai ua ra te kopapa i te arataa ra, e te asini e te liona i te tu katoa anga i vaitata i taua kopapa ra: kare te kopapa i kaingaia e te liona, kare oki te asini i etietiia.

29 Kua rave atura taua peroveta ra i te kopapa o taua tangata no te Atua ra, kua tuku akera ki runga i te asini, kua akaoki maira; i aere mai oki taua peroveta taito ra ki roto i te oire, e aue, e e tanu iaia.

30 Kua tuku iora aia i taua kopapa nona ra ki roto i tona uaorai tanumanga; kua aue iora iaia, na ko akera, E ae oki koe, e taku taeake e!

31 E oti akera aia i te tanumia e ia ra, kua tuatua maira aia ki te au tamariki nana ra, na ko maira, Kia mate au ra, e tanu kotou iaku ki roto i te tanumanga i tanumiaʼi te tangata no te Atua ra; ei te pae toku ra ivi ki tona:

32 I te tuatua oki tana i kapiki i te tuatua a Iehova i te atarau i Betela, e te au are katoa i te ngai teitei i roto i te au oire i Samaria ra, ka ope rava ïa i te tupu.

33 E oti akera taua tuatua nei, kare a Ieroboama i akaruke i tana ravenga kino, kua oki ra e kua rave i to roto i te tangata rikiriki ei taunga no te au ngai teitei: ko tei anoano, kua rave akera e akataoonga iaia, riro atura aia ei taunga no te au ngai teitei ra.

34 Riro atura taua mea nei ei ara i te ngutuare o Ieroboama, e akataka keia atura, e pou rava akera i te ao katoa nei.