2 Paraleipomeno

27 KUA tae a Iotama ki te mataiti tai takau ma rima i ariki ei aia; okotai ngauru ma ono ona mataiti i te ariki anga i Ierusalema. Ko Ierusa te ingoa o tona metua vaine, e tamaine na Zadoka.

2 Kua rave aia i te mea tika i mua i te aroaro o Iehova, mei ta tona metua mei ta Uzia i rave ra. Kare ra aia i aere ki roto i te nao o Iehova; e te vai kino ua ra te au tangata.

3 Kua patu aia i te ngutupa teitei i te are o Iehova, e ki runga katoa i te patu ra o Ophela e ngai maata tei patuia e ia.

4 E kua akatu aia i te au oire ki runga i te au maunga o Iuda, e i roto oki i te au vaorakau ra, kua patu aia i te au are tiaki, e te au punanga katoa ra.

5 E kua tamaki oki aia i te ariki o te ngati Amona, e eke iora ratou iaia. E kua apai maira te tamariki a Amona i te au taleni ario okotai anere i taua mataiti ra, e te au kora sitona okotai ngauru i te tausani, okotai ngauru oki i te tausani i te kerite. Kua pera te tamariki a Amona i te apai mai, i te mataiti rua, e te toru.

6 Mana aturā Iotama, no te mea kua akonokono aia i tona arataa i mua i te aroaro o tona Atua o Iehova.

7 E te toenga o te tuatua ia Iotama, e te au tamaki katoa nana ra, e tona au aerenga, i na, kua tataia ïa i roto i te tuatua a te au ariki o Iseraela e Iuda.

8 Kua tae aia ki te mataiti tai takau ma rima i ariki ei aia, okotai ngauru ma ono ona mataiti i te ariki anga i Ierusalema.

9 Kua moe iorā Iotama ki o tona ra ai metua, e kua tanu iora ratou iaia i roto i te oire o Davida: tupauia akera aia i te au e te tamaiti nana ra e Ahaza.