Iosua

10 KITE akera te ariki o Ierusalema ko Adonizedeka e kua pou Ai ia Iosua, e kua tairipotiia e ia; e mei tana i rave ia Ieriko e to reira ariki, kua pera katoa aia ia Ai e to reira ariki; e i akamoeau to Gibeona ia Iseraela, e te noo ua ra i rotopu ia ratou:

2 Mataku rava akera ratou, no te mea e oire maata Gibeona, mei te oire ariki ra te tu, e no te mea e maata te reira ia Ai, e e tangata toa anake oki to reira tangata.

3 Kua tono akera te ariki o Ierusalema ra ko Adonizedeka i te karere ki te ariki o Heberona ra ia Hohama, e te ariki o Iaremuta ra ia Pirama, e te ariki o Lakisa ra ia Iaphia, e te ariki o Egalona ia Debira, kua karanga atura,

4 E aere mai ki runga nei kiaku nei, e tauturu mai iaku, e tā tatou ia Gibeona; kua akamoeau oki to reira ia Iosua, e te tamariki a Iseraela.

5 Kua uipa iora aua nga ariki o te ngati Amori toko rima ra, te ariki o Ierusalema, te ariki o Heberona, te ariki o Iaremuta, te ariki o Lakisa, e te ariki o Egalona, aere akera ratou e to ratou au nuku ravarai, e kua patia iora i te puakapa i vaitata i Gibeona, kua tamaki atura.

6 Kua tono maira to Gibeona i te karere kia Iosua ki te puakapa i Gilagala ra, tuatua maira, Auraka koe e tavare i te tauturu mai i to au tavini, e aere viviki mai koe kia matou nei, e tupae mai ia matou kia ora matou; kua putuputu rava mai oki te ui ariki ravarai o te ngati Amori i noo i runga i te maunga ra e tamaki mai ia matou.

7 Kua aere aturā Iosua mei Gilagala atu, koia, e te au tangata tamaki katoa, e te aronga toa uritumu katoa ra.

8 Kua tuatua mairā Iehova kia Iosua, Auraka koe e mataku ia ratou; kua oronga oki au ia ratou ki to rima na; kare rava tetai o ratou e mou ki mua ia koe ra.

9 Aere iorā Iosua i taua po ra mei Gilagala atu, e ao ua akera rokoia putia iora ratou e ia;

10 Eketumuia iora ratou e Iehova ki mua i te aroaro o Iseraela, e kua ta iora ratou ia ratou, e pou maata rava i Gibeona ra, e kua arumaki ia ratou na te arataa e tae atu ei ki Bete-orona, e tae rava atura ki Azeka, e Makeda, i te ta aere anga ia ratou.

11 E i to ratou ati anga na mua i te aroaro o Iseraela ra, e te eke atura ki raro ki Bete-horona, kua akatopa mairā Iehova i te ua toka nunui, no runga mai i te rangi, ki runga ia ratou, e tae rava atura ki Azeka, mate iora ratou: e maata tei mate i te ua toka i tei mate i te taia e te tamariki a Iseraela ki te koke.

12 Kua karanga aturā Iosua kia Iehova i te rā i oronga mai ei a Iehova i te ngati Amori ki mua i te aroaro o te tamariki a Iseraela; kua karanga atura ki mua i te mata o Iseraela ra, E te rā, ka noo ana koe ki rungao i Gibeona; e ko koe oki, e te marama, ki rungao i te o ra ko Aialona.

13 Kua noo ua iora te rā, vai ua iora oki te marama, e oti ua akera ta ratou akaoko anga atu i to ratou au enemi. Kare ainei kua tataia taua tuatua nei ki roto i te buka a Iasera? Noo ua iora te rā ki runga i te rangi, kare i topa vave ki raro e e rā katoa tei topa.

14 Kare rava e rā e aite ki te reira ra mei muatangana mai, e i muri katoa io nei, i te akarongo angā Iehova i te reo tangata; na Iehova oki i tamaki i ta Iseraela tamaki.

15 Kua oki mairā Iosua, e Iseraela katoa, ki te puakapa i Gilagala.

16 Kua oro ra aua nga ariki toko rima ra, e te pipini ra ki roto i te ana i Makeda.

17 E kua akakiteia mai a Iosua, i tuatuaia mai, Tera ake nga ariki toko rima ra kua kitea, kua pipini i roto i te ana i Makeda.

18 Kua karanga aturā Iosua, Ka uri i te toka mamaata ki runga i te ngutupa o taua ana ra, ka tuku ei i te tangata ei tiaki ia ratou.

19 Auraka ra kotou e noo, e arumaki ra i to kotou au enemi, e ta atu na muri, auraka e tukuia ki roto i to ratou au oire; kua orongaia mai oki ratou e to kotou Atua e Iehova ki to kotou rima.

20 E kia akaoti akerā Iosua ma te tamariki a Iseraela i ta ratou ta akapou rava anga ia ratou, e pou rava akera ratou, e tomo atura tei toe ia ratou ki roto i te au oire i patuia ra;

21 Oki maira te tangata ravarai kia Iosua ki te puakapa i Makeda i reira ma te au: kare rava e vaa i tuatua mai ki te tamariki a Iseraela.

22 Kua karanga aturā Iosua, Ka kiriti ana te ngutupa o te ana, ka arataki mai i aua nga ariki toko rima i roto i te ana ra ki vao kiaku nei.

23 Kua pera oki ratou, kua arataki maira ratou i aua nga ariki toko rima ra kiaia, mei roto mai i te ana ra; te ariki o Ierusalema, te ariki o Heberona, te ariki o Iaremuta, te ariki o Lakisa, e te ariki o Egalona.

24 E oti akera aua nga ariki ra it e aratakiia mai e ratou ki vao kia Iosua ra, kua karanga aturā Iosua ki te au tangata ravarai o Iseraela, e kua na ko atura ki te au rangatira o te aronga tamaki ra ko tei aere katoa ma ia katoa ra, E aere mai, e takai to kotou vaevae ki runga i te kaki o eianei nga ariki. Kua akavaitata maira ratou, e kua takai to ratou vaevae ki runga i to ratou kaki.

25 Kua karanga aturā Iosua kia ratou, Auraka e mataku, auraka e ngarangara, e akamatutu, e kia maroiroi roa; ko te tu rai tena ta Iehova e rave i to kotou au enemi katoa ta kotou e tamaki atu.

26 E muri akera, kua ta iorā Iosua ia ratou, e mate rava akera, e kua ri atura ia ratou ki runga i nga rakau e rima ra; vaoo ua atura ia ratou ki runga i aua nga rakau ra e aiai ua atura.

27 Kia tae ra ki te topa anga o te rā ra, kua akaue aturā Iosua i te tangata, e kua tuku iora ratou ia ratou ki raro mei runga mai i nga rakau ra, e kua titiri atura ia ratou ki roto i te ana ta ratou i pipini ra, e kua tuku atura i te au toka mamaata ra i te ngutupa o taua ana ra, ko tei vaoo ua rai ïa e tae rava akenei ki teianei rā.

28 E rauka iora oki Makeda ia Iosua i taua rā ra, e kua ta iora aia i te reira ki te mata koke, e to reira ariki, e te tangata katoa i roto ra, i akapou takiriia ïa e ia; kare rava i akatoeia: mei tana i rave i te ariki o Ieriko ra. kua pera katoa aia i te ariki o Makeda.

29 Aere aturā Iosua e Iseraela ravarai mei Makeda atu e ki Libena, e kua tamaki atura ia Libena;

30 E kua tuku katoa maira oki a Iehova i te reira, e to reira ariki, ki te rima o Iseraela. e kua ta iora ratou i te reira ki te mata koke, e te tangata katoa i roto ra; kare rava i akatoeia: mei ta ratou i rave i te ariki o Ieriko ra, kua pera katoa ratou i to reira ariki.

31 E mei Libena oki aere atura Iosua e Iseraela ravarai ki Lakisa, patia iora i te puakapa i reira, tamaki atura ki te reira;

32 Kua oronga mairā Iehova ia Lakisa ki te rima o Iseraela, rauka iora ia ratou i te rā rua, e kua ta iora i te reira e te tangata ravarai i roto ra ki te mata koke, mei ta ratou katoa i rave ia Libena ra.

33 Kua aere mai ana te ariki o Gezera ko Horama e tupae ia Lakisa, pou iora aia e tona katoa ra au tangata ia Iosua, kare rava ïa i toe iaia.

34 E mei Lakisa oki, aere aturā Iosua e Iseraela katoa ra ki Egalona; patia iora i te puakapa i reira, kua tamaki atura ki te reira.

35 Rauka iora ia ratou i taua rā ra, e kua ta iora i te reira ki te mata koke, e te tangata ravarai i roto ra, pou takiri rava akera ïa iaia i tana rā ra, mei tana katoa i rave ia Lakisa.

36 E mei Egalona atu aere aturā Iosua e Iseraela katoa ki Heberona; e kua tamaki atura ratou ki te reira.

37 Rauka iora te reira ia ratou, e kua ta iora i te reira ki te mata koke, e to reira ariki, e to reira oire ravarai, e te tangata katoa i roto ra; kare rava i akatoeia e ia: mei tana katoa i rave ia Egalona; kua akapou takiri ravarai ïa ma te tangata katoa i roto ra.

38 Kua oki mairā Iosua e Iseraela ravarai ki Debira; e kua tamaki iora ki te reira.

39 E rauka iora te reira iaia, e to reira ariki, e to reira au oire katoa, i taia e ratou ki te mata koke, akapou takiri iora i te au tangata katoa i roto ra; kare rava i akatoeia e ia: mei tana i rave ia Heberona ra, kua pera katoa aia ia Debira, e to reira ariki; mei tana katoa i rave ia Libena ra e to reira katoa ariki.

40 Tairipoti rava akera to te enua maunga, e to te pae i apatonga ra, ia Iosua, e to te au ngai mataataa, e to runga i te au tuaivi, e to ratou au ariki katoa; kare i akatoeia e ia, pou takiri rava akera tei uti i te aʼo, i ta te Atua o Iseraela i ta Iehova i akaue maira.

41 E pou iora ratou ia Iosua mei Kadesabarenea e tae ua atura ki Gaza, e te tapere katoa ra ko Gosena, e tae ua atura ki Gibeona.

42 Okotai rai tairipoti anga i taua au ariki katoa ra, e to ratou katoa ra enua ia Iosua, no te mea na te Atua o Iseraela na Iehova i tamaki i ta Iseraela ra tamaki.

43 Oki mairā Iosua e Iseraela katoa ki te puakapa i Gilagala.