Luka

5 E TE tu ua ra aia i tetai rā i te pae roto i Genesareta ra, kua ototitoti ua maira te tangata katoa e manganui kiaia, e akarongo i te tuatua a te Atua,

2 Akara atura aia i e rua puke pai, te tapae ua ra i te pae roto; kareka te aronga ravakai, tei uta ïa, te taruku ra i ta ratou kupenga.

3 Aere atura aia ki rungao i tetai pai, i to Simona, kua karanga atura kiaia e toko aia ki taio kia atea te one ki uta. Kua noo iora aia ki raro e kua apii maira i te tangata tini i runga i taua pai ra.

4 E oti akera tana tuatua, karanga atura aia kia Simona, O atu ki te moana, tuku atu ei i ta kotou kupenga i tetai aronga ika.

5 Kua tuatua mairā Simona, na ko maira, E te Atu, i tauta ua na matou mei te aiai e ao akenei, e kare e ika i rauka; kia tuatua maira koe, ka tuku rai au i te kupenga ki raro.

6 E kia pera iora ratou, kua pini rava akera ia ratou te ika e manganui; e motu atura ta ratou kupenga.

7 Kua kamokamo atura ratou ki to ratou aronga ki runga i tetai pai, kia aere katoa mai ratou e rave. Kua aere maira oki ratou, kua akaki iora i nga pai e rua katoa, e vaitata rava iora i te tomo.

8 E kia akara iorā Simona Petero i te reira, tipapa iora aia ki raro i te pae turi no Iesu, ma te karanga atu e, E aere ke koe, e te Atu, e tangata ara oki au.

9 Poitirere iora aia e ratou katoa i taua aronga ika i rauka ia ratou ra:

10 E ko Iakobo katoa oki e ko Ioane, nga tamariki a Zebedaio, kua kapiti katoa raua kia Simona. Kua karanga aturā Iesu kia Simona, Eiaa e mataku; mei teianei atu, e tangata taau e rauka.

11 E tae maira to raua puke pai ki uta, akaruke anake iora ratou, e kua aru maira iaia.

12 E i na, tei tetai oire aia, kua akara maira tetai tangata ia Iesu, kua pini rava aia i te lepera; tipapa iora aia ki raro, pati maira kiaia, na ko maira, E te Atu, kia tika ia koe ra, e mā au ia koe.

13 Kua akatika atura aia i tona rima, akatukia atura iaia, na ko atura, Kua tika ïa iaku: kia mā koe. Peke ke atura tona lepera i reira.

14 E kua iku atura aia iaia, auraka rava e aaki ki te tangata, E aere ra e akakite ia koe uaorai ki te taunga ra, e e apai atu i tei akonoia e Mose, ei akakite anga atu kia ratou e, kua mā koe.

15 Vavaria rava atura tona rongo, e e aronga maata tei uipa katoa mai e akarongo iaia, e kia akaoraia ratou e ia i to ratou au maki.

16 Riro ke akera aia ki te ngai motutaa e pure.

17 E tae akera ki tetai rā, te apii ra aia, te noo maira te Pharisea, e te aronga apii ture, i vaitata, mei Ierusalema mai, e mei te au vila ravarai i Galilea e Iudea, e tei reira te mana o te Atu i te akaora ia ratou.

18 E i na, te apai maira te tangata i tetai akangoru ki rungao i te roi: i inangaro ratou i te apai mai iaia ki roto, e tuku i mua iaia.

19 E kare akera i tika i te rai o te tangata, kake akera ratou ki rungao i te are, kua tuku iora iaia ki raro, na roto i te tapoki are, ma te roi iti katoa i rotopu i mua ia Iesu.

20 E kite atura aia i to ratou akarongo, kua karanga atura aia kiaia, E tama, kua akakoreia taau ara.

21 Kua eumiumi iora te au tata tuatua e te au Pharisea, na ko akera, Koai teia e tuatua i te akakino Atua? E matara oki te ara iaai mari ra i te Atua anake ra?

22 Te kite rā Iesu i to ratou manako, kua karanga atura kia ratou, Eaa ta kotou i eumiumi ua na i roto i to kotou ngakau?

23 Teiea te mea rave ngoie, ko te tuatua aina, Kua matara taau ara; e ko te tuatua aina, Ka tu ki runga, ka aere?

24 Kia kite ra kotou e, e mana to te Tamaiti a te tangata i te ao nei kia akakore i te ara, (kua na ko atura aia ki taua akangoru ra,) Te karanga atu nei au kia koe, Ka tu ki runga, ka rave i to roi, ka aere ki toou ngutuare.

25 Kua tu akera aia i reira i mua i to ratou mata, rave iora i tona moenga, aere atura ki tona ngutuare, i te akakakā anga atu i te Atua.

26 Rokoia anake iora ratou e te umere maata e te mataku, e kua akakakā atura i te Atua, na ko akera, E mea tu ke maata ta tatou i kiteo i teianei rā.

27 E muri akera, aere atura aia ki vao, e kite atura aia i tetai telona, ko Levi te ingoa, i te noo anga i te are telona; kua karanga atura aia kiaia, Ka aru mai iaku.

28 Kua tu akera aia ki runga, vaoo atura i te apinga tini, e aru atura iaia.

29 Kua akatupu iorā Levi i tetai kaingakai maata nana i tona uaorai are; e manganui te telona e te tangata ke katoa i noo i taua kaingakai ra ko ratou katoa.

30 Kareka te au tata tuatua e te au Pharisea, koumuumu iora, tuatua atura ki tana au pipi ra, Eaa kotou i kai katoaʼi, e i inu ei oki, e te au telona ma te aronga ara ra?

31 Kua tuatua mairā Iesu kia ratou, na ko maira, Kare no te aronga ora te taunga, no te aronga maki ra.

32 Kare au i aere mai e tiki i te aronga tuatua-tika, i te aronga ara ra, kia tataraara.

33 Kua ui atura e tokotai puke tangata kiaia, Eaa te mea i akakore putuputu ei te au pipi a Ioane i te kai, e ta te au Pharisea, e e pure oki, kareka taau, te kai ua nei ïa, e te inu ra.

34 Kua tuatua maira aia kia ratou, Te akakore nei aina te au oa o te tane ou ra i te kai, i te noo katoa anga o taua tane ou ra ki o ratou?

35 Te vai atura ra te tuatau e apai keiaʼi te tane ou ra, ei reira ratou e akakore ei i te kai.

36 Kua tuatua maira aia kia ratou i teianei parabole, Kare e tangata e pananaki i te kakau piro ki te manga pananaki ou: kia pera, e motu te kakau piro ra i te manga pananaki ou i pananakiia ra, kare rava oki te mea ou e tau i te mea piro.

37 Kare oki e tangata e tuku i te wina ou ki roto i te āriki taito ra; kia pera, e ngaae te āriki i taua wina ou ra, maringi atura ïa, e kino atura te āriki.

38 Kia tukuia ra te wina ou ki roto i te āriki ou e tikaʼi, e e ora kapipiti ïa.

39 E kare oki te tangata i inu i te wina taito ra e kaki vave i te wina ou, e tuatua oki aia e, te wina taito te mea meitaki.