1 Samuela

3 TE rave ra taua tamaiti ra ko Samuela i te angaanga a Iehova ki mua i te aroaro o Eli.

2 Te iti ra te tuatua a Iehova i te reira tuatau; kare oki e orama putuputu i reira. I taua tuatau ra, te moe ua rā Eli i tona ngai, kua avarevare tona mata, kare aia i kite kia akara ra;

3 E kare rai i mate te lamepa a te Atua i te nao o Iehova, i vaooiaʼi te aruna a te Atua ra, kua moe katoa iorā Samuela:

4 Kua kapiki mairā Iehova kia Samuela: e kua karanga atura aia, Teia au.

5 Kua oro atura aia kia Eli ra, e kua karanga atura, Teia au; taau oki i kapiki mai kiaku nei. Kua tuatua maira aia, Kare au i kapiki atu kia koe; ka aere ka moe. Kua aere maira aia kua moe.

6 Kua kapiki akaou mairā Iehova kia Samuela. Kua tu akerā Samuela ki runga, aere atura kia Eli ra, e kua karanga atura, Teia au; kua kapiki mai oki koe kiaku. Kua tuatua maira aia, Kare au i kapiki atu kia koe, e taku tamaiti; e aere rai ka moe.

7 Kare oki a Samuela i kite ia Iehova i reira; kare rai oki te tuatua a Iehova i akakiteia kiaia ra.

8 Kua kapiki akaou mairā Iehova kia Samuela, ko te tu toru ïa o te kapiki anga mai. Kua tu akera aia ki runga, e aere atura kia Eli ra, kua karanga atura, Teia au; kua kapiki mairai koe kiaku. Kite akerā Eli e, ko Iehova tei kapiki mai ki taua tamaiti ra.

9 E kua tuatua mairā Eli kia Samuela, Ka aere ka moe; e kia kapikiia mai koe ra, e karanga atu koe i reira e, E tuatua mai koe, e Iehova e; te akarongo nei oki to tavini. Kua aere mairā Samuela, kua moe i tona uaorai ngai.

10 Kua aere mairā Iehova, kua tu ua maira, e kua kapiki mei tei muatangana ra, E Samuela, e Samuela. Kua karanga aturā Samuela, E tuatua mai; te akarongo nei oki to tavini.

11 Kua tuatua mairā Iehova kia Samuela, I na, ka akatupu au i tetai mea i Iseraela nei, ka poturi nga pukai taringa ravarai o te aronga katoa e akarongo ra.

12 I taua rā ra, e akatupu ei au i te tuatua ia Eli ra, i te au mea katoa i tuatuaia e au i tona ngutuare: tena ka raveia e au, e naku rai e akaoti.

13 Kua tuatua oki au kiaia e, e akava atu au i tona ngutuare e tuatua ua atu; no te mea, kite uaorai aia i te ara a nga tamariki nana ra, ko tei akariro ia raua uaorai ei mea viivii, kare rai aia i akamura atu ia raua.

14 E teianei, kua taputou au i te ngutuare o Eli ra e, kare rava te ara a te ngutuare o Eli e mā i te atinga, e te atinga kai, e tuatau ua atu.

15 Moe ua iorā Samuela e ao ua akera, e kua kiriti akera aia i te au pa o te Are o Iehova. Mataku akerā Samuela kia akakite atu kia Eli i taua orama ra.

16 Kua kapiki mairā Eli kia Samuela, na ko maira, E taku tamaiti, e Samuela e. Kua karanga atura aia, Teia au.

17 Kua tuatua maira aia, Eaa ta Iehova tuatua i tuatua mai kia koe na? Teia taku tuatua kia koe, auraka koe e uuna i taua tuatua ra iaku; kia pera mai te Atua ia koe e kia maata ua atu rai, kia uuna ua atu koe i tetai tuatua iaku, i te au tuatua ravarai tana i tuatua mai kia koe ra.

18 Kua akakite aturā Samuela kiaia i te au mea katoa ra, kare rava e tuatua I uunaia. Kua tuatua maira aia, Ko Iehova ïa; kia rave aia i tei tau iaia uaorai.

19 Tupu aturā Samuela, e kua vaitata mairā Iehova iaia, e kare rava e tika iaia kia topa ua atu tetai tuatua nana ki raro i te one.

20 Kite akera Iseraela ravarai, mei Dana mai e tae ua atura ki Bere-seba, e, kua riro tikai a Samuela ei peroveta na Iehova.

21 E kua kitea akaou mairā Iehova i Silo; i Silo oki ta Iehova kite anga mai iaia uaorai kia Samuela i te tuatua a Iehova.