Iobu
31 KUA papau au i te koreromotu i oku nei mata: eaa ra au ka akara atu ei ki te paretenia?
2 Eaa oki te tuanga a te Atua no runga mai? e te kelero a te Mana katoatoa no te ngai teitei mai?
3 Kare ainei i te mate no te aronga kino? e te mate tu ke no te aronga rave tuatuakino?
4 Kare ainei aia i kite i toku nei au aerenga, e kua tatauia toku au takainga ravarai?
5 E aerenga tatipake toku ra, e kua ngakoikoi toku vaevae ki te pikikaa;
6 E akateiaa aia iaku ki roto i te arite tikai, kia kite te Atua i te pikikaa kore noku ra.
7 I anga ke toku takainga i te arataa ra, e kua aru taku ngakau i oku mata, e kua mou tetai mea topata ki runga i oku rima;
8 Kia ruru ua atu au, e na tetai ke e kai; e kia kiriti tumuia taku paū kai.
9 Kua vare toku ngakau i te vaine, e kua moetapapa au i te ngutupa o toku oa;
10 Kia riro taku vaine ei taviri sitona na tetai ke, e kia moeia aia e etai ke.
11 E riro oki te reira e ara maata; e ara akautungaia e te aronga akava.
12 E riro oki te reira ei ai e pou rava atu ei, e ope roaʼi te au mea tupu naku ra i te kiriti tumuia.
13 I akavaavaa ana au i te tuatua a toku tavini tane, ma toku tavini vaine, i to ratou māro anga mai iaku;
14 Akapeea ra au i reira kia tu mai te Atua? e kia atoro mai aia, naea au i te karanga anga atu kiaia?
15 Kare ainei aia tei anga iaku i roto i te kopu i anga katoa iaia? kare ainei okotai Atua tei anga ia maua katoa i roto i te kopu.
16 Naringa au kua akangere i te ao i ta ratou inangaro, e kua mata nevaneva te vaine takaua iaku i te tapapa anga;
17 E kua kai i taku manga kai ko au anake uaorai, e kare te matiroeroe i kai katoa i te reira;
18 Mei toku ou anga ra te angai anga iaia, mei te metua ra, e mei te kopu mai o toku metua vaine i te arataki anga iaia;
19 E kua kite au i te tangata i te mate ua anga i te kakau kore, e te ao i te tapoki kore;
20 E kare tona taukupu i akameitaki mai iaku, e kare aia i maanaana i te uruuru o taku au mamoe;
21 E kua apai au i toku rima ki runga i te matiroeroe, ka kite ei au i toku ra mana i te ngutupa ra:
22 Kia topa toku pakuivi i toku papa i reira, e kia aatiia toku rima i te ponaanga ra.
23 Kua riro oki te mate no ko i te Atua ra ei mea rikarika naku, e no tona mana kare i tika iaku kia rave.
24 E kua akairo au i te auro ei manako anga noku, e kua karanga au ki te auro mā meitaki ra, Ko koe toku irinaki anga;
25 E kua rekareka au i te mea kua maata toku apinga, e no te mea kua maata tei rauka i toku rima;
26 Kua akara au i te rā i tona kakā anga mai, e te marama i tona kakā aere anga;
27 E kua riro poiri ua atura toku ngakau i reira e kua ongi toku vaa i toku rima:
28 E riro katoa te reira ei ara e akautungaia e te akava: kua uuna ïa au i reira i te Atua i runga ra.
29 Kua rekareka ainei au i te mate o tei riri mai iaku ra, e kua akateitei ainei au iaku uaorai ka rokoia mai ei aia e te kino ra?
30 Kare oki au i pa i toku vaa kia ara, i te pati anga i te kino ki runga i tona vaerua.
31 Kare ainei te au tangata o toku ra puakapa e tuatua e, Koai tei kaki i tana kai, e kare i merengo ana?
32 Kare te tangata ke i moe ua i te arataa: kua kiriti au i toku ngutupa ki te tangata aere i te ara.
33 E kua tapoki ainei au i taku ara mei ia Adamu, i te uuna anga i toku kino i roto i toku umauma?
34 Kua rokoia ainei au e te tumatetenga ki mua i te uipa anga maata i reira ra, e kua vi ainei au i te akavaavaa o te au kopu-tangata ra; kia muteki ua au, e auraka e tomo ki vao?
35 Naringa i akarongo mai tetai i taku! i na, taku akairo e, na te Mana katoatoa e tuatua mai iaku, e na toku enemi e tata i te tapepe anga iaku nei.
36 E tuku tikaia e au ki runga i toku pakuivi, e kua akamou ki runga iaku mei te korona ra.
37 E tatau atu au i te rainga o toku ra au takainga iaia; e akavaitata atu au iaia ra mei te aere o te ariki ra.
38 Kua akakino mai toku kainga iaku, e kua aue katoa te au rua arote o te reira?
39 Kua kai ua au i tona ua e kare e tutaki, e kua potopoto te aʼo o te au tangata kainga iaku?
40 Ei ngangaere ua te tupu mai auraka ei sitona, e te mauku auraka ei kerite. Oti ra ua te tuatua a Iobu.