Zekaria

11 KA kiriti ana i to au pa, e Lebanona, kia pou to au arezi i te ai.

2 Ka aue, e te berusi, no te mea kua inga te arezi: no te mea kua kore te aronga memeitaki ra; ka aue, e te au alona i Basana, no te mea kua tuaia te vaorakau koroia ra.

3 Te kitea ra te reo aue o te au tiaki, no te mea kua pou to ratou meitaki; te reo ngunguru o te au liona ou, no te mea kua pou te nengonengo o Ioridana.

4 Te na ko maira taku Atua ra, ko Iehova, Ka akaangai ana i te anana i akatakaia no te mate;

5 Ko tei taia e to ratou au pu, e kare e manako e kau ara; e te aronga katoa i oko ia ratou, kua tuatua anake, Kia akameitakiiā Iehova, kua apingaia au; e kare ua to ratou au tikai i akaperepere ia ratou.

6 Kare oki au e akaperepere akaou i to te enua nei, te tuatua mairā Iehova; i na, e tuku au i te au tangata e pini ua ake ki te rima o tona tangata tupu, e ki roto i te rima o tona uaorai ariki, e e pou te enua nei ia ratou, e kare au e akaora ia ratou i to ratou rima.

7 E kua akaangai atura au i taua anana i akatakaia no te mate ra, e anana uruurungā kino roa ïa! Kua rave atura au i nga rakau e rua, tapaia e au tetai ko Te Aroa e tetai i tapaia e au ko Ngaruru; akaangai atura au i taua anana ra.

8 E kua tipu ke atura au i nga tiaki toko toru i te marama okotai, kua iu rava oki toku vaerua ia ratou, akaruke mai oki to ratou vaerua iaku.

9 Kua karanga iora au i reira, Kua oti ana au i te angai ia kotou; ko te mate ua ra, vaoo atu rai kia mate; e ko te ka tipu keia ra, vaoo atu kia tipu keia atu; e kia kai ua atu nga toe i to ratou uaorai kiko tetai e tetai.

10 Kua rave atura au i taku rakau ia Aroa, kua kokoti ke atura, ei akaatikau i te koreromotu i papauia e au ki te au tangata katoa ra.

11 Akaatikauia akera ïa i taua rā ra, kite akera taua anana uruurungā i mako mai iaku ra, na Iehova taua tuatua ra.

12 E kua karanga atura au kia ratou, Kia meitaki i to kotou na mata, o mai i taku oko; e kare ra, auraka. Kua aite iora ratou i te oko iaku i nga moni e toru ngauru.

13 E kua tuatua mairā Iehova kiaku, Ka titiri atu ki o te potera: e oko meitaki tena tei okoia mai au e ratou ra. E kua rave atura au i taua nga ario e toru ngauru ra, e kua titiri atura ki roto i te are o Iehova ki te potera ra.

14 Kua tipu ke atura au i tetai aku rakau i reira, ko Ngaruru, kia aatiia te ruru taeake ia Iuda raua ko Iseraela.

15 Kua tuatua mairā Iehova kiaku, Ka rave rai koe i te au taoonga a te tiaki neneva ra.

16 I na oki, e akatupu au i tetai tiaki i te enua nei; ko tei mate aere ke ra, kare aia e kimi, ko tei paruparu ra, kare aia e akaora, ko tei tu ua ra, kare aia e angai; ko te kiko ra o tei matu ra tana ïa e kai, e atiati oki aia i to ratou au maikuku.

17 Aue to te tiaki puapinga kore, ko tei akaruke i te anana, ei runga i tona rima te koke, e ei runga i tona mata katau; e marō takiri tona rima, e e akapoiri ravaia tona mata katau.