2 Paraleipomeno

29 TEI te mataiti tai takau ma rima o Hezekia ra i ariki ei aia, okotai takau ma iva ona mataiti i te ariki anga i Ierusalema. Ko Abia te ingoa o tona metua vaine, e tamaine na Zekaria.

2 Kua rave aia i te mea tika i mua i aroaro o Iehova, i te au mea katoa ta tona ra tupuna ta Davida i rave ra.

3 I te marama mua e te mataiti mua o tona ra au, kua kiriti akera aia i te au pa i te are o Iehova, e kua tuā iora.

4 Kua arataki maira aia i te kau taunga e te au ngati Levi, e kua akaputuputu maira i ratou i te arataa i te itinga o te rā ra,

5 E kua karanga atura kia ratou, E akarongo mai ana iaku, e te au ngati Levi e! E akatapu ia kotou uaorai i tenana, e akatapu oki i te are o te Atua o to kotou ai metua o Iehova, e apai ke oki i te mea viivii i roto i te ngai-tapu nei.

6 Kua ara oki to tatou ai metua, e kua rave i te kino ki mua i te mata o to tatou Atua o Iehova, e kua akaruke iaia, e kua anga ke to ratou mata i te nooanga o Iehova, e kua iki te tua iaia.

7 Kua topiri oki ratou i te au pa o te tomoanga, e kua tamate i te au lamepa, e kare akenei i tutungi i te atinga kakara, e kare oki i apai i te atinga karakaratio i te ngai-tapu, na te Atua no Iseraela.

8 I rokoia mai ei Iuda e Ierusalema e te riri o Iehova, e kua tuku aia ia ratou kia rokoia e te tumatetenga, e te vavaranga, e te avirianga, ta kotou oki e kite ma to kotou mata na.

9 I na oki, no taua mea nei, i ingaʼi to tatou ai metua i te koke; e ta tatou au tamaroa, e te au tamaine, e ta tatou au vaine, te vai tuikaa ua ra.

10 E teianei, ko roto ïa i toku nei ngakau e papau i te koreromotu i te Atua o Iseraela ia Iehova, kia akaanga keia tona riri maata ia tatou nei.

11 E taku au tamariki e, auraka kotou e vare i tenana: ko kotou oki tei ikiia e Iehova kia tu kotou ki mua iaia, ei tavini nona, e ei rave i te taoonga ki mua iaia, e ei tutungi i te atinga kakara.

12 Kua tu maira te au ngati Levi, ko Mahata te tamaiti a Amasai, e ko Ioela te tamaiti a Azaria, no te au tamariki ngati Kohata: e to te au tamariki a Merari; ko Kisa te tamaiti a Abadi, e ko Azaria te tamaiti a Iehalele: e to te ngati Geresona; ko Ioa ïa te tamaiti a Zima, e ko Edena te tamaiti a Ioa ra:

13 E to te au tamariki a Elizapha ra; ko Simeri, e ko Ieiela: e to te au tamariki a Asapha; ko Zekaria, e ko Matania:

14 E to te au tamariki a Hemana; ko Iehiela ïa, e ko Simei: e to te au tamariki a Iedutuna; ko Semaia, e ko Uziela.

15 Kua akaputuputu iora ratou i to ratou au taeake, e kua akatapu ia ratou uaorai, e kua aere mai, i tei akaueia mai e te ariki, i te tuatua a Iehova, kia mā te are o Iehova.

16 Kua aere atura te kau taunga ki roto rava i te are o Iehova, e tamā mai, e kua rave mai i te mea viivii katoa, i kitea e ratou i roto i te nao o Iehova, i roto i te paepae i te are o Iehova; kua rave iora te au ngati Levi e kua apai ki vao ki te kauvai ra ki Kiderona.

17 I te rā mua o te marama mua ta ratou akatapu anga, e tae akera ki te rā varu i taua marama ra, kua tae ratou ki te tomoanga o te are o Iehova: e po varu akera oki, tapu atura te are o Iehova; e tae akera ki te rā okotai ngauru ma ono i te marama mua ra, oti rava akera.

18 Kua aere atura ratou ki roto ki te ariki ra kia Hezekia, e kua karanga atura, Kua mā rava ia matou te are o Iehova, e te atarau atinga karakaratio, e to te reira au āriki ravarai, e te kaingakai no te areto o te aroaro ra, e to reira au āriki katoa ra.

19 E te au āriki katoa, ta te ariki ra ta Ahaza i tona ra au i akanoa ra, ka tatipake ei ra aia, kua rave matou, e kua akatapu; e i na, tei mua ïa i te atarau a Iehova.

20 Kua tu maira te ariki ra ko Hezekia i te popongi roa, e kua akaputuputu mai i te aronga tutara o te oire, e kua aere ki runga ki te are o Iehova.

21 E kua apai maira ratou i nga puakatoro e itu, e nga mamoe toa e itu, e nga punua mamoe e itu, e nga puakanio toa e itu, ei tarangaara na te basileia, e na te ngai-tapu, e na Iuda. E kua akaue aia i te kau taunga i te au tamariki a Aarona e apai ei atinga ki runga i te atarau a Iehova.

22 Kua ko iora ratou i te au puakatoro, e kua āriki maira te kau taunga i te toto, e kua pîpî ki runga i te atarau; e kua ko iora oki ratou i te au mamoe toa, e kua pîpî ratou i te toto ki runga i te atarau; e kua ko oki i nga punua mamoe, e kua pîpî i te toto ki runga i te atarau.

23 Kua apai maira ratou i nga puakanio to ra ei tarangaara ki mua i te aroaro o te ariki e te uipaanga katoa ra: e kua tuku iora ratou i to ratou rima ki rungao.

24 E kua ko iora te kau taunga, e kua apai i to ratou toto ki runga i te atarau ei tarangaara, ei tapokiangaara na Iseraela ravarai: kua akaue mai oki te ariki e, na Iseraela ravarai te atinga karakaratio e te tarangaara katoa.

25 Kua tuku iora aia i te ngati Levi ki roto i te are o Iehova ma te au sumebalo, e te au nabala, e te au kinura, i tei akaueia mai e Davida, e ta te akara a te ariki ra ta Gada, e ta Natana peroveta: ko te tu ïa o ta Iehova i akaue mai i tana ra au peroveta.

26 Kua tu ua maira te au ngati Levi, ma taua au mea i akatangiia e Davida ra, e te kau taunga ma te au pu.

27 Kua akaue aturā Hezekia e apai i te atinga karakaratio ki runga i te atarau, e tei te akamata anga i taua atinga karakaratio ra i te apai, ko te imene a Iehova i te tumu katoa anga, ma te au pu katoa ra, e te au mea akatangi i kimiia e te ariki o Iseraela ra e Davida.

28 Kua akamori atura taua uipaanga katoa ra; e kua imene oki te aronga imene, e kua tangi oki te au pu, e oti rava akera taua atinga karakaratio ra.

29 E oti akera taua au mea i te apaiia ra, kua tupou iora te ariki e te tangata ravarai i reira ra ki raro, e kua akamori atura.

30 Kua akaue akerā Hezekia ariki e te ui mataiapo katoa i te au ngati Levi, e imene kia Iehova i te au tuatua a Davida, e ta Asapha akara ra. Kua imene iora ratou ma te rekareka; e kua tupou iora to ratou mimiti, kua akamori atura.

31 Kua karanga aturā Hezekia, na ko atura, Tenana, kua akatapu kotou ia kotou uaorai no Iehova, e akavaitata mai, e apai mai oki i te au atinga, e te au atinga akameitaki, ki roto i te are o Iehova nei. Kua apai maira taua uipaanga ra i te au atinga e te au atinga akameitaki; e te aronga ngakau oronga ra, kua apai ïa i te au atinga karakaratio.

32 E i te tatau anga i taua au atinga karakaratio i apaiia mai e te uipaanga ra, e itu ïa ngauru i te puakatoro, okotai anere mamoe toa, e rua anere punua mamoe: ei atinga karakaratio anake ïa au mea ra na Iehova.

33 E te au mea i akatapuia ra, e ono ïa anere i te puakatoro, e toru tausani i te mamoe.

34 E iti ra taua aronga taunga ra, kare atura e ope te au atinga karakaratio i te oore: i tauturu mai ei te au taeake no ratou, te au ngati Levi, ia ratou, e oti akera taua angaanga ra, e kia oti oki tetai pae taunga i te akatapu ia ratou uaorai: e tiratiratu maata oki to te ngakau o te au ngati Levi kia akatapu ia ratou uaorai, i to te kau taunga.

35 Kua maata rava oki taua au atinga karakaratio ra, e te tongaua no te au atinga au ra, e te au atinga inu no te au atinga karakaratio ra. Tika akera te rave anga i te angaanga i te are o Iehova.

36 Mareka rava akerā Hezekia, e te tangata ravarai, i te mea i akateteamamao mai ei te Atua i taua aronga tangata ra: kare akerai oki e mamia taua rave anga ra.