1 Samuela

25 MATE iorā Samuela i reira; kua akaputuputu maira Iseraela katoatoa, kua aue iora iaia, e kua tanu iora iaia i Rama i tona uaorai kainga. Kua tu akerā Davida, e kua aere iora ki raro ki te medebara ki Parana ra.

2 Te noo ra tetai tangata no Maona, tei Karamela tona apinga te vairanga; e tangata maata roa taua tangata ra, e toru tausani puaka-nio: e te pakoti ra aia i tana au mamoe i Karamela.

3 Ko Nabala te ingoa o taua tangata ra; ko Abigaila te ingoa o tana vaine: e vaine kite meitaki i te tuatua, e te meitaki oki i te tu: e tangata rotoriri ra te tane, e te ravenga kikino; no te ngutuare aia no Kaleba.

4 E kite akerā Davida i roto i te medebara ra e, te pakoti ra Nabala i te au mamoe nana ra.

5 Kua tono aturā Davida i te au tangata ou tino ngauru ra, e kua karanga aturā Davida ki taua au tangata ou ra, E aere kotou ki runga ki Karamela, e tae atura kotou kia Nabala ra, e aroa atu kotou iaia i toku nei ingoa:

6 E karanga atu kotou kiaia i ora ra, Kia ora koe, e kia ora oki to ngutuare, e kia ora toou katoa ra.

7 Kite akenei au e, e pakoti mamoe tei i o ou ra: ki ko oki te au tiaki mamoe noou na i o matou ra, kare rava matou i rave kino ua atu ia ratou, e kare rava oki tetai mea i ngaro i to ratou noo anga i Karamela.

8 Ka ui ana ki te au tangata ou i o ou nei, e na ratou e akakite mai kia koe. E teianei e kite aroa mai koe i te au tangata ou na: e rā meitaki oki teia i aereia mai e matou nei: teia taku tuatua kia koe, e o mai ana koe i tei rauka ia koe ra na to au tavini nei, e na to tamaiti na Davida.

9 E tae atura taua au tangata ou o Davida ra, kua karanga atu rai ratou kia Nabala i taua tuatua katoa ra i te ingoa o Davida, e kua muteki iora.

10 Kua tuatua mairā Nabala ki te au tavini o Davida ra, na ko maira, Koai oki a Davida? e koai te tamaiti na Iese? e manganui te tavini i teianei tuatau ko tei akaruke i to ratou pu.

11 Ka rave ainei oki au i taku faraoa, e taku vai, e taku puaka i koia e au na taku au pakoti mamoe nei, ka apai atu ei na te au tangata i kitea koreia e au to ratou ngai no reira ratou ra?

12 Kua ariu maira taua au tangata ou o Davida ra, e kua oki maira, e kua aere maira e akakite maira kiaia i taua au tangata ou o Davida ra, e kua oki maira, kiaia i taua au tuatua katoa ra.

13 Kua karanga aturā Davida ki te au tangata nona ra, Ka tatua ana kotou ravarai i ta kotou koke. E tatua iora ratou ravarai i ta ratou au koke; kua tatua iora oki a Davida te au tangata e a paa anere; e noo iora e rua anere e tiaki i te apinga.

14 Kua karanga atura tetai tangata ou i o Nabala ki te vaine a Nabala kia Abigaila, na ko atura, I na, kua tono mai a Davida i te au karere mei te medebara mai, e aroa i to matou pu nei; e kua kauvae aia ia ratou.

15 E takinga-meitaki ra to taua aronga tangata ra ia matou, e kare oki matou i rave kinoia mai, kare rava oki a matou mea i ngaro i to matou vaitata anga atu ia ratou, ia matou i noo i te au kainga:

16 Mei te patu ra ratou ia matou i te ao e te po, i to matou noo anga i o ratou i te tiaki anga i te au mamoe.

17 E tenana, e akono meitaki, e akamaara oki koe i taau ravenga; kua akakoroia te kino ki to matou pu, e tona katoa ngutuare: kareka aia e tangata tuatua kino maata, kare e tika kia karanga atu kiaia.

18 Kua rapurapu iorā Abigaila, kua rave iora i te au faraoa e rua anere, e nga āriki wina e rua, e nga mamoe tao ra e rima, e te au kaui vine marō okotai anere, e te au kou suke e rua anere, e kua tuku akera ki runga i te au asini.

19 Kua tuatua maira aia ki tona au tavini, Ka aere ana na mua iaku; i na, e na muri atu au ia kotou. Kare ra aia i akakite ki tana tane kia Nabala.

20 E kua na runga akera aia i tetai asini, kua eke atura ki raro na tetai tuaivi, na tetai ara ngaro, e i na, kua eke maira oki a Davida e tona au tangata na tetai tuaivi i muao iaia; aravei akera aia ia ratou.

21 I tuatua ua anā Davida, E tikai anga puapinga kore taku i tana au apinga i te medebara nei, e kare rava akenei tetai i ngaro; i pera mai aia i te tutaki anga mai i te meitaki ki te kino ra:

22 Kia pera mai te Atua ki te au enemi o Davida e kia maata ua atu rai, kia toe ua ake tetai tane i ona, apopo i te akirata anga ra.

23 E kite akerā Abigaila ia Davida, kua rapurapu iora aia, e kua eke iora mei runga mai i te asini, kua tupou iora ki raro ki mua ia Davida, e tipapa iora aia ki raro tona mata i te one.

24 Kua opu iora aia i ona vaevae, e kua karanga atura, Ei runga iaku, e taku pu, teianei ara, ei runga iaku nei: e karanga ua atu ana ra to tavini vaine kia koe na, kia kite mai koe, e akarongo ua mai ana oki koe i te tuatua a to tavini vaine nei.

25 Auraka to ngakau, e taku pu, e akono i teianei tangata puapinga kore ia Nabala, taku ïa tuatua kia koe: te tau ra oki aia ki tona ingoa; ko Nabala tona ingoa, e e tuatua neneva tana: kareka to tavini vaine nei, kare ïa au i kite i te au tangata ou o taku pu, i taau i tono maira. 26 E teianei, e taku pu, te ora rā Iehova, e te ora katoa ra oki toou vaerua, ko Iehova tei tāpu ia koe kia kore koe e aere mai e akamaringi i te toto, e kia kore koe e tutaki ia koe uaorai ki toou uaorai rima; e teianei, kia riro toou au enemi e te aronga e inangaro i te takinga-kino atu ia koe, e taku pu, mei ia Nabala ra.

27 E teianei, kia apiia i teianei atinga, i apaiia mai e to tavini vaine nei naau, e taku pu, na te au tangata ou e aru mai i taku pu.

28 Teia taku tuatua kia koe, e akakore mai i te ara a to tavini vaine nei: ka riro oki a Iehova i te akatinamou i to ngutuare, e taku pu; no te mea kua tamaki koe, e taku pu, i te tamaki a Iehova ra, kare oki te kino i kitea i roto ia koe i to au rā katoa ra.

29 Kua tu ua mairai tetai tangata e aruaru ia koe, e kua kimi oki ia koe kia mate: ka ruruia ra te ora o taku pu ki roto katoa i te opa ora i o to Atua ra i o Iehova; kareka te ora o to au enemi, ka makaia ïa e ia, mei te mea e, i na roto i te kapu-maka ra.

30 E kia ope rava i te akatupuia e Iehova te au meitaki katoa i tuatuaia mai e ia noou, e taku pu, e kia akariroia koe e ia ei ariki ki runga ia Iseraela;

31 Kare oki teia e riro ei irieaanga naau i reira, kare to ngakau e tumatetenga, e taku pu, i reira, ko koe kare i akamaringi puapinga kore ua i te toto, e ko koe oki kare i tutaki ua ia koe uaorai, e taku pu: kia pera mairā Iehova i te takinga-meitaki mai ia koe, e taku pu, ei reira koe e manako ei i to tavini vaine nei.

32 Kua tuatua mairā Davida kia Abigaila, Kia akameitakiia te Atua o Iseraela ko Iehova, ko tei tono mai ia koe i teianei rā kia aravei mai koe iaku. 33 E kia ora oki koe i taau tuatua meitaki, e kia ora oki koe, ko tei tāpu mai iaku i teianei rā, kia kore e maringi iaku te toto, e kia kore au e tutaki iaku uaorai ki toku uaorai rima.

34 Koia tika rai, te ora ra te Atua o Iseraela ra ko Iehova, ko tei tāpu mai iaku nei, kia kore koe e rave kinoia atu, naringa koe kare i aere viviki mai kia aravei mai iaku nei, kare takiri e tane toe to Nabala apopo i te akirata anga.

35 Kua rave mairā Davida i taua atinga i apaiia e taua vaine ra nana, e kua tuatua maira kiaia, E aere koe ki to ngutuare ma te au; i na, ku akarongo au i taau tuatua, e kua kiteia koe e au.

36 Kua aere mairā Abigaila kia Nabala ra; e i na, e pokai tana tei roto i tona uaorai are, mei te pokai a te ariki ra; kua rekareka oki te ngakau o Nabala, kua kona oki aia; kare ake rai aia i tuatua iti ua atu kiaia e ao ua akera.

37 Kia popongi ra, kia peke taua kona wina o Nabala ra, kua akakite atura tana vaine kiaia i taua au mea ra, mate akera tona ngakau i roto iaia, riro atura aia mei te toka ra.

38 E po ngauru akera, taia iorā Nabala e Iehova, mate rava akera.

39 E kite akerā Davida e kua mate a Nabala, kua tuatua akera aia, Kia akameitakiiā Iehova, kua tutaki oki aia i te takinga-kino a Nabala iaku, e kua tāpu aia i tona tavini kia kore e rave i te kino: kua akaoki a Iehova i to Nabala kino ki runga i tona uaorai mimiti. Kua tono akerā Davida i te karere e karangaranga kia Abigaila, e e rave aia iaia ei vaine nana.

40 E tae maira taua au tavini o Davida ra kia Abigaila ra, i Karamela, kua tuatua maira ratou kiaia, na ko maira, I tonokia mai matou e Davida kia koe na, e rave aia ia koe ei vaine nana.

41 Kua tu akera aia ki runga, e kua tupou iora i raro tona mata i te one ra, kua karanga atura, I na, kia riro ua atu to tavini vaine, ei tavini orei vaevae no te au tavini o taku pu ra.

42 Kua tu akerā Abigaila ki runga e kua rapurapu iora, e kua na runga iora i tetai asini, e nga ui vaine toko rima nona i te aru anga atu iaia; kua na muri atura aia i te au karere a Davida ra, riro atura ei vaine nana.

43 Kua rave katoa iora oki a Davida ia Ahinoama i Iezereela; riro atura raua katoa ei vaine nana.

44 Kua oronga oki a Saula i tana tamaine ra ia Mikala, i te vaine a Davida, na Phalati te tamaiti a Laisa i Galima ra.