Iobu

27 TAMOU aturā Iobu i taua tuatua nana ra, na ko akera,

2 Te ora ra te Atua, ko tei kopae i taku nei tuatua-tau; e te Mana katoatoa, ko tei akamamae mai i toku vaerua;

3 I te vai ua anga o toku ora i roto iaku nei, e te aʼo a te Atua i roto i oku rua putaiu;

4 Kare rava toku vaa e tuatua i te kino, kare oki taku arero e tuatua pikikaa.

5 Kare takiri ra au e akatika ia kotou: e mate ua atu au, kare rai au e pa i te tuatua-tika naku ra.

6 Taku tuatua-tika taku e tāpu nei, e kare au e pa: kare toku ngakau e tapepe mai iaku i toku au rā katoa.

7 Kia riro toku enemi mei te tangata kino, e tei tu mai ki runga ei patoi mai iaku, mei te tangata tuatua-tika kore ra.

8 Eaa oki to te tangata kino manakoanga, rauka uaʼi tana apinga, kia rave mai te Atua i tona vaerua?

9 E akarongo mai ainei te Atua i tona aue, kia rokoia aia e te tumatetenga?

10 E akarekareka ainei aia iaia uaorai i te Mana katoatoa? e tamou ainei aia i te kapiki atu ki te Atua?

11 E apii au ia kotou i ta te rima o te Atua i rave: kare au e uuna i ta te Mana katoatoa ra.

12 I na, kua kite kotou ravarai na; eaa oki kotou i riro ei ei mea puapinga kore anake?

13 Ko ta te tangata kino tuanga teia i te Atua ra, ko te tuanga teia te ka rauka i te takinga-kino i te Mana katoatoa ra.

14 Kia akamaataia mai tana au tamariki ra, no te koke ïa; kare oki tona uanga e merengo i te kai.

15 Ko tona aronga i toe ra, ka riro ratou na te mate e tanu; e kare tana au vaine takaua e aue.

16 Akaputuputu ua rai aia i te ario mei te one-pueu ra, e kua roi i te kakau mei te vari ra;

17 E roi ua oki aia, e na te aronga tuatua-tika ra e kakau, e na te aronga ara kore e tua i te ario.

18 Te anga nei aia i tona are mei te neu ra, e mei te are piritanga i akatuia e te tiaki ra.

19 E moe te tangata apinga nui ki raro, kare ra aia e kapitiia ki tona uaorai: te akaara ra aia i ona mata, e kare ra.

20 Te rokoia putia ua ïa mai aia e te au mea rikarika mei te vai puke ra: ei te po aia e keiaiaʼi e te uriia.

21 Te apai keia ra aia e te maoake, e riro ke atura: taitaipakokoia atura aia i tona ngai.

22 Te titiri viviki ua maira aia i te mate ki runga iaia, e kare e akaperepere: ka oro tika aia mei roto i tona rima kia ora.

23 E pokarakara ra te tangata i to ratou rima iaia, e e îîa keia aia i tona ra ngai ma te taitoito.