Iosua

3 KUA itirere anā Iosua i te popongi roa, e kua tae mai aia ki te ape Ioridana, koia e te tamariki ravarai a Iseraela, mei Sitima maira, e i moe ana i reira ka aere atu ei ratou ki tetai pae ra.

2 E ope akera nga rā e toru ra; kua takai iora te ui rangatira i te nuku:

3 E kua karanga atura ki te tangata, na ko atura, Kia akara kotou i te aruna koreromotu a to kotou Atua ra a Iehova, e te kau taunga i te ngati Levi ra i te apai anga i te reira ra, ei reira kotou ka aere ei, e aru ei i te reira.

4 Ei va ra i rotopu ia kotou e te reira, kia rua tausani i te kubiti kia aite ra, (auraka kotou e akavaitata ki te reira,) kia kite kotou i te arataa kia aere kotou; kare rai oki kotou i aere ana na teianei ara.

5 Kua karanga aturā Iosua ki te au tangata, Ka akatapu ana ia kotou; apopo oki a Iehova e rave ei i te mea taka ke i rotopu ia kotou na.

6 Kua karanga aturā Iosua ki te kau taunga, na ko atura, Ka rave ana i te aruna koreromotu, ka aere ki tetai pae na mua i te au tangata nei. Kua rave iora ratou i taua aruna koreromotu ra, aere atura na mua i te au tangata ra.

7 I tuatua ana oki a Iehova kia Iosua e, Ei teianei rā au e akamataʼi i te akamaata ia koe ki mua i te aroaro o Iseraela katoa ra, kia kite ratou e, mei iaku i vaitatao ia Mose ra, ei vaitata katoao au ia koe.

8 E naau e akaue atu i te kau taunga ra, i tei apai i te aruna koreromotu ra, e na ko atu e, Kia tae kotou ki te nia o te vai i Ioridana ra, ka tu ua kotou ki raro i Ioridana ra.

9 Kua karanga aturā Iosua ki te tamariki a Iseraela, Ka aere mai ki ku nei, e akarongo i te tuatua a to kotou Atua a Iehova.

10 Kua karanga aturā Iosua, Teia te mea e kite ei kotou e, tei rotopu te Atua ora ia kotou, e ka tuaru tika rai aia i te ngati Kanaana, e te ngati Heta, e te ngati Hevi, e te Perizi, e te ngati Giregasi, e te ngati Amori, e te ngati Iebusi, na mua ia kotou, kare e kore.

11 I na, te aere nei te aruna koreromotu a te Atu o te ao katoa nei, na mua ia kotou ki Ioridana.

12 I tenana, ka iki ana i te tangata tino ngauru ma rua no roto i te au kopu o Iseraela, okotai kopu okotai tangata e pini ua ake.

13 E kia tu te vaevae o te kau taunga i apai i te aruna a te Atu o te ao katoa nei a Iehova, ki raro i te vai nei i Ioridana, ei reira taua vai nei ko Ioridana, ko tei na uta mai i te taʼe, ka akataka keiaʼi, ei reira taua vai ra e ututua uaʼi.

14 E kia akaruke te au tangata i to ratou au puakapa, e aere ki tetai pae i Ioridana ra, e te kau taunga i te apai anga i te aruna koreromotu na mua i te tangata ra;

15 E tae akera te aronga i apai i te aruna ki Ioridana, e ku akera te vaevae o te kau taunga i apai i taua aruna ra i te nia o te vai, (e pani ua oki Ioridana i runga i tona au nia katoa i te tuatau mou katoa ra:)

16 I reira te vai i na uta maira i te tu ua anga, e teitei ua akera te ututua anga, e ngai mamao te oire ra ko Adama, i vaitata i Zaretana; taka ke atura oki te vai i taʼe tika ki raro i te tai o te Araba ra, (koia te Tai Kavakava ra,) kore akera ïa, i kokoti keia ïa: aere anake atura te tangata ki tetai pae i anga tika ki Ieriko ra.

17 Tu ua iora te kau taunga, ko tei apai te aruna koreromotu a Iehova ra, i rotopu tikai i Ioridana, ki runga i te one marō ma te turori kore; ka aere ei te ngati Iseraela katoa ki tetai pae na runga i te one marō; e ope rava akera te tangata tini ravarai i te tae ki tetai pae Ioridana ra.