Salamo

35 E AKATIKA mai koe iaku, e Iehova, i te aronga i māro mai iaku nei: tamaki tika atu koe i te aronga i tamaki mai iaku nei.

2 Ka rave ana i te paruru e te tapoki, ka tu mai ei ki runga ka tauturu mai ei iaku.

3 Ka unui ana i te korare, ka taii i te ara i te aronga e takinga-kino mai iaku; e tuatua mai ki toku vaerua, Ko au toou ra ora.

4 Kia raungara e kia akama te aronga i kimi mai iaku kia mate; kia akaokiia ki muri e kia aringaringa te aronga i akakoro i te kino noku.

5 Kia riro ratou mei te ota i mua i te matangi ra; e na te Angela a Iehova e arumaki ia ratou.

6 Kia poiri to ratou arataa, e te pateka; e na te Angela a Iehova e aruaru atu ia ratou.

7 Kare oki a ara i tuku ei ratou i te ereere iaku ki raro i te vaarua; kare oki e ara i ko ei ratou i te rua kia mate au.

8 Ka rokoia aia e te mate manako koreia ra; koia uaorai te ka ei i te kupenga tana i tuku ra; ka rokoia aia e taua mate rai.

9 Ka mareka ra toku vaerua ia Iehova, ka rekareka rai i te ora nana.

10 Ka riro toku au ivi katoa ra i te tuatua e, E Iehova, koai tei tau kia koe, ko tei akaora i tei akaaka ra i te tangata maroiroi maata i tona ra, i tei akaaka, e te putaua ra, i te āru ra?

11 E aronga kite pikikaa tei tu mai ki runga, kua tapepe maira iaku i tei kore i kitea e au ra.

12 Kua tutaki mai ratou i toku meitaki ki te kino, kia akangereia toku vaerua.

13 Ko au nei ra, ia ratou i mate i te maki ra, kua kakau au i te kakau paoa: kua taakaaka au i toku vaerua ma te akakore i te kai: kua oki ua maira taku pure kua tupu i roto i toku ngakau.

14 Mei te taunga ra, e mei te taeake ra, taku akono anga; mei tei mii i tona metua vaine i tupou ei au ki raro ma te aue.

15 I toku tumatetenga anga ra, te rekareka ra ratou, e kua uipa akera, kua uipa te aronga akakino iaku, e kare au i kite; kua aae mai iaku, kare oki i tukumoe:

16 I rotopu i te aronga viivii taparu kai ra, to ratou pakati anga i to ratou nio iaku.

17 E te Atu, mei te aa ra te roa o toou akara ua anga mai? e akaora koe i toku vaerua i te au mate ta ratou i akakoro ra, taku akaperepere i taua au liona ou ra.

18 Ka akapaapaa au ia koe i roto i te uipa anga maata ra i reira; ka akapaatu au ia koe i rotopu i te au tangata ririnui.

19 Auraka te au enemi tumu kore noku ra kia rekareka iaku; auraka tei riri ara kore ua iaku e ukiuki i te mata iaku.

20 Kare rava oki a ratou e tuatua au kia tuatua, te kimi ra ratou i te pikikaa i te aronga e noo marie ua i te enua ra.

21 Kua amama nui to ratou vaa iaku, e kua tuatua, Eitoa! eitoa! Kua kite atura to matou mata i ta matou i anoano.

22 Kua kite koe, e Iehova, auraka koe e muteki ua: e te Atu, auraka koe e akamamao ke atu iaku nei.

23 Ka ara, e taku Atua, e akatika mai iaku; e akaaraara koe, e taku Atu, i taku nei tuatua.

24 E makitoro mai koe iaku, e taku Atua e Iehova, i te tuatua-tika naau, e auraka ratou kia rekareka iaku.

25 Auraka ratou kia tuatua i roto i to ratou ngakau e, Eitoa! ko to matou ïa anoano! auraka ratou kia tuatua e, Kua pou aia i te apukuia e matou.

26 Kia rokoia katoaia ratou e te akama, e kia tumatetenga, tei rekareka i toku nei mate; kia vaîia ratou ki te akama e te kino, tei akateitei ia ratou uaorai iaku nei.

27 Kia maeva ra e kia pingapingareka, tei akatika i te tuatua-tika naku nei; aua ratou e tukumoe i te tuatua e, Kia akamaataiā Iehova, ko tei mataora i te meiaki o tona tavini.

28 Ei reira toku vaa ka tuatuaʼi i te tuatua-tika naau, e kare rai e tivata i te akapaapaa ia koe.