Exodo
2 KUA aere atura tetai tangata no te ngutuare o Levi, kua akaipoipo atura i tetai tamaine a Levi ra.
2 E kua to iora taua vaine ra, e anau akera, e tamaiti: e kite akera aia e, e tamaiti purotu, kua uuna iora aia iaia e toru akera marama.
3 E kare atura e ngaro iaia kia uuna, kua rave iora aia i tetai inaki raupo, e kua amo iora ki te hemera e te tapou, e kua tuku iora i taua tamaiti ra ki roto; vaoo atura ki roto i te ngangaere i te pae o te vai ra.
4 Kua tu ua iora te tuaine nona i te mamao ke, kia kite aia iaia i te rave angaia mai.
5 Kua aere maira te tamaine a Pharao e paî i taua vai ra; e te aere ua ra te ui vaine nona ra na te pae o te vai; e kite akera ra aia i taua inaki ra ki roto i te ngangaere, kua tono atura i tona tavini vaine e tiki.
6 E kia kiriti akera aia, kite atura aia i taua tamaiti ra: e i na, kua aue iora taua tamaiti varevare ra. Aroa akera aia iaia, e kua tuatua akera, Ko tetai teia o te au tamariki a te ngati Ebera nei.
7 Kua tuatua maira tona tuaine ki te tamaine a Pharao ra, E aere ainei au e tiki i tetai u no te au vaine ngati Ebera, ei ikiiki i tenana tamaiti naau?
8 Kua karanga atura te tamaine a Pharao kiaia, Ka aaere. Kua aere atura taua vaine ra, kua tiki atura i te metua vaine no taua tamaiti ra.
9 Kua karanga atura te tamaine a Pharao kiaia, E apai koe e ikiiki i teianei tamaiti naku, e naku e o atu i taau tutaki. Kua apai atura taua vaine ra i taua tamaiti ra, kua ikiiki atura.
10 Tupu atura taua tamaiti ra, e kua apai maira aia iaia ki te tamaine a Pharao, riro maira aia ei tamaiti nana; tapa atura aia i tona ingoa ko Mose; kua tuatua akera oki aia, Naku aia i rave mai no raro i te vai.
11 Tei te reira au rā, kia pakari a Mose ra, i aere ei aia ki tona ai taeake ra, e kite atura i ta ratou apainga teiaa: e i akara atura aia i tetai tangata Aiphiti, te ta ra i tetai i tona au taeake, e ngati Ebera.
12 Kua matatua ua iora aia i tetai pae e i tetai pae, e kare rava akera e tangata i kitea e ia, kua ta iora aia i taua tangata Aiphiti ra, e kua uuna iora ki raro i te one.
13 Kua aere akaou atura aia i tetai ra, e i na, te kukumi ra e toko rua puke tangata ngati Ebera ra; e kua karanga atura aia ki tei ē ra, Eaa koe i moto ei i toou ra tangata tupu?
14 Kua tuatua maira aia, Naai koe i akariro ei tutara e ei akava ia matou nei? te manako na koe i te ta mai iaku, mei taau i ta i te Aiphiti ra? Mataku iorā Mose, e kua tuatua akera, Kua kitea tikaia taua mea nei.
15 E kite akerā Pharao i taua mea ra, kua umuumu maira aia ia Mose e ta. Oro ke maira ra Mose mei mua mai i te aroaro o Pharao, e kua noo atura i te enua ra i Midiana; e kua noo iora aia ki runga i te ruavai.
16 Ko tetai taunga ra i Midiana toko itu ana puke tamaine: e kua aere maira ratou e uti i te vai, e akaki i te au āriki ei akainu i te au mamoe a to ratou metua tane ra.
17 Kua aere maira te au tiaki mamoe, e kua tuaru ke ia ratou ra: kua tu akera rā Mose ki runga e tauturu atura ia ratou, e kua akainu i ta ratou au mamoe.
18 E tae atura ratou ki to ratou metua tane ra kia Reuela, kua tuatua maira aia, Eaa te mea i tae vave mai ei kotou i teianei rā?
19 Kua karanga atura ratou, Na tetai tangata Aiphiti i tauturu mai ia matou i taua au tiaki mamoe ra; e nana katoa i uti i te vai na matou, e kua akainu akera i te anana.
20 Kua tuatua maira aia ki taua au tamaine nana ra, E teiea aia? eaa kotou i akaruke ei i taua tangata ra? kapikiia atura, kia kai i te kai.
21 Tika roa ia Mose e noo ki o taua tangata ra: e kua oronga maira aia i tana tamaine ia Zipora kia Mose.
22 E anau maira aia ra, e tamaiti; tapa iorā Mose i tona ingoa ko Geresoma; kua tuatua akera oki aia, E tangata ke au i te enua ke nei.
23 E roa akera, mate iora taua ariki no Aiphiti ra; te ngunguru ua ra te tamariki a Iseraela i ta ratou angaanga maata; e kua aue oki ratou, e kua tae roa ki te Atua to ratou aue i ta ratou angaanga i te maata.
24 E kua akarongo maira te Atua i to ratou aue anga; e kua maara te Atua i tana koreromotu ia Aberahama, ia Isaaka, e ia Iakoba.
25 E akara maira te Atua i te tamariki a Iseraela; e kua kite maira te Atua ia ratou.