Kua Rave Ratou i to Iehova Anoano

Tutakiia te Akarongo o Nga Metua

KI TE au Iseraela, me anauia tetai pepe tamaroa e tumu anga rekareka maata ia. Tera te aiteanga ka tupu ua atu te kopu uanga e ka vai ua te tuanga enua i roto i te pamiri. Inara i te tae anga ki te mataiti 1593 M.T.N., kua riro te anauanga o tetai tamaroa ei taumaa anga kare i te akameitakianga ki te au Epera. No teaa ra? No te mea kua manga mataku te Pharao o Aiphiti i te tupu anga maata o te au tangata ngati Iuda i te ngai i raro ake i tona akatere anga, i akaue ei aia kia tamate katoatoaia te au pepe tamaroa anau ou.​—Exodo 1:12, 15-22.

I te reira tuatau oki teia titau anga kino o te tamate anga pepe i riro mai ei a Amerama raua ko Iokebeda, e tokorua Epera, ei nga metua no tetai pepe tamaroa manea. E mea ngoie ua i te akamanako i to raua rekareka i te akameangitiia e te mataku i to raua maara anga i ta Pharao akaue anga. Inara, i to Amerama raua ko Iokebeda akara anga i ta raua pepe tamaroa, kua manako papu raua kia kore e akaruke iaia, noatu eaa te tu.​—Exodo 2:1, 2; 6:20.

Angaanga Anga ma te Akarongo

E toru marama kua uuna a Amerama raua ko Iokebeda i ta raua pepe. (Exodo 2:2) Inara, e mea tumatetenga teia, i te mea kua noo vaitata ua te au Epera e te au Aiphiti. Tetai ua atu tei kitea te titauanga i te oro ke i te akaue anga a Pharao ka akautungaia kia mate​—e ka mate katoa te pepe. Eaa, i reira, ta teia nga metua akono ka rave no te akono ora ua i ta raua tamaiti e raua katoa?

Kua akaputu mai a Iokebeda i etai au rakau raupo. E rakau pakari te raupo, tei aite ki te koe, e toru ona tua mei te mangamanga rima te petetue. I tetai taime ka taea te 6 mita te teitei. Kua taangaanga te au Aiphiti i teia rakau ei maani pepa, moenga, kie pai, tamaka, e te au poti mamangika.

Kua maani a Iokebeda i tetai pia tau te maata no roto mai i te au raupo ei tuku i tana pepe ki roto. I reira kua tapiri aia i te ta e te tapou ki runga i te pia te maani anga i te reira kia kore te vai e aere ki roto. E oti kua tuku a Iokebeda i tana pepe ki roto i te manga pia e kua akanoo i te reira ki roto i te au raupo i te pae o te Kauvai Nile.​—Exodo 2:3.

Kua Kiteaia te Pepe

Kua noo ua te tamaine a Iokebeda, ko Miriama, i te pae mai no te akara eaa te ka tupu. I reira kua aere mai te tamaine a Pharao ki te Nile no te pai.a Penei kua kite a Iokebeda e e aere putuputu ana te tamaine ariki ki teia tua o te Nile e kua akaruke tikai i te pia i te ngai ka kite ngoie uaia. Kare i roa kua kite atu rai te tamaine a Pharao i te pia e vai ua ra i roto i te au raupo, e kua kapiki aia i tetai o tona au tavini kia tiki i te reira. I tona kite anga i te pepe e aue ra i roto, kua tangi aia. Kua tamanako aia e e pepe Epera teia. Inara, akapeea aia i te vao ua anga i teia pepe manea kia tamateia? I te pae i te tu takinga meitaki i te tangata, penei kua akakeuia te tamaine a Pharao kia irinaki i te irinaki anga Aiphiti matauia e e tae ei ki te rangi tei runga ua ia i tetai akapapaanga tu takinga meitaki i te tuatau e ora ra tetai.b​—Exodo 2:5, 6.

Kua aere a Miriama, tei akara ua mai i te ngai mamao, ki te tamaine a Pharao. “E aere ainei au e tiki i tetai u no te au vaine ngati Epera, ei ikiiki i tenana tamaiti naau?” i ui ei aia. Kua pau mai te tamaine ariki: “Ka aere.” Kua oro atu a Miriama ki tona metua vaine. Kare i roa, te tu ra a Iokebeda i mua i te aroaro o te tamaine a Pharao. “E apai koe e ikiiki i teianei tamaiti naku,” i tuatuaʼi te tamaine ariki kiaia, “e naku e o atu i taau tutaki.” Penei te tae anga ki teia taime kua kite te tamaine a Pharao e ko Iokebeda te metua vaine o te pepe.​—Exodo 2:7-9.

Kua akono a Iokebeda i tana tamaiti e tae ua atu ki te taime e akatopaiaʼi aia i te u.c Na roto i teia i raukaʼi iaia te au tuatau akaperepereia e manganui kia apii iaia no runga i te Atua mou, ko Iehova. I reira kua akaoki aia i te tamaiti ki te tamaine a Pharao, tei tapa i te ingoa o te tamaiti ko Mose, te aiteanga “rave mai no raro i te vai.”​—Exodo 2:10.

Apiianga no Tatou

Kua rave pouroa a Amerama raua ko Iokebeda i te tuatau poto ua tei rauka ia raua no te apii i ta raua tamaiti te au kaveinga o te akamori anga ma. Ka tau katoa te au metua kia pera i teia tuatau. E tika, e mea puapinga maata kia pera ratou. Te ‘aaere nei te Tiaporo ko Satani mei te liona ngunguru ra, i te kimi anga i te tangata e pou iaia.’ (1 Petero 5:8) Ka inangaro aia i te au mapu akaperepereia​—te tamariki tamaroa e te au tamariki tamaine​—tei rauka ra te manakonakoanga o te riroanga mai ei au tavini meitaki no Iehova. Kare o Satani tu tangi no te au mapu ou! Te akamanako anga i teia, ka tereni te au metua i ta ratou au tamariki varevare kia mataku i te Atua mou, ko Iehova.​—Maseli 22:6; 2 Timoteo 3:14, 15.

Ia Ebera 11:23, to Amerama e to Iokebeda tauta anga i te uuna i ta raua pepe i te toru marama mua o tona oraanga kua tataia ei rave anga akarongo. Kua akaari teia nga metua mataku i te Atua i te irinaki i to Iehova mana akaora na te patoianga i te akaruke i ta raua tamaiti, e no teia kua akameitakiia raua. Ka tau katoa tatou kia aru pakari i te au ture e te au kaveinga a Iehova, te irinaki papu anga e noatu eaa ta Iehova ka akatika kia tupu kia tatou i te openga ka angaanga meitaki ei mataora e te akono anga mutu kore no tatou.​—Roma 8:28.

[Au Tataanga Rikiriki i Raro]