Iobu

23 KUA tuatua mairā Iobu, na ko maira,

2 Kua maata rava toku mate i teianei rā: kua rai te teimaa o te rima i runga iaku i te aue noku.

3 Naringa au i kite i te ngai e kitea aia e au kia kimi! ka tae ïa au e ki tona nooanga tikai!

4 Kua akataka ïa au i taku tuatua ki mua i tona aroaro, e akaope rava taku vaa i te tuatua i reira.

5 E kite ïa au i te au tuatua tana ka tuatua mai iaku i reira, e e taka ïa tana tuatua anga mai iaku.

6 E taumāro mai ainei aia iaku i tona mana maata? Kare; ka tauturu maira aia iaku.

7 E taumāro te aronga tuatua-tika ma ia katoa i reira; e e ora ïa au i taku akava e tuatau ua atu.

8 I na, te aere nei au ki mua, kare ua ra aia i reira; e te oki nei ki muri, kare ra aia i kitea atu e au:

9 Ki te pae kaui, i te rave anga angaanga nana, kare ra au i kite: te pipini ra aia ki te pae katau, kare ra i kitea e au.

10 Kua kite ra aia i te arataa taku i aere na: kia oti au i te timataia e ia, e riro au mei te auro i reira.

11 Kua mou toku vaevae ki tona ra takainga, kua akono au i tona arataa, e kare i anga ke.

12 Kare au i akaruke i tei akaueia mai e tona vaa; inangaro maata toku i te tuatua a tona vaa i taku tuanga kai.

13 Okotai ua oki ona manako, e naai aia e ruri ke? e ta tona vaerua i anoano ra, ko tana ïa e rave.

14 Te rave ra oki aia i tei akakoroia noku ra: e tei iaia te au mea e manganui mei te reira te tu.

15 I koiririaʼi au i mua i tona aroaro: te mataku nei au kia maara ua atu iaia.

16 Te akataitaia nei oki te Atua i toku ngakau, e te akatumatetenga nei te Mana katoatoa iaku:

17 Kare oki au i tipu keia i mua ake i taua poiri ra, e kare aia i tapoki i te poiri i toku nei mata.