Salamo

33 E REKAREKA ia Iehova, e te aronga tuatua-tika e; e tau te akameitaki i te aronga tiratiratu.

2 E akameitaki ia Iehova i te kinura; e imene iaia ki te nabala ao ngauru ra.

3 E imene aia ki te imene ou; akatangi meitaki ana kia tangi nui.

4 E tika te tuatua a Iehova, e te tuatua-mou oki tana katoa au angaanga.

5 Inangaro aia i te tuatua-tika e te tuatua-tau: te ki nei te enua i te takinga-meitaki o Iehova.

6 Na te tuatua a Iehova i oti ei te au rangi: e to ratou katoa ra nuku i te aʼo o tona vaa.

7 Kua akaputuputu aia i te tai o te moana kia ututua; kua vaoo aia i te moana ki roto i te are vairanga.

8 Kia mataku te pa enua ravarai ia Iehova; kia koiriria to te ao katoa nei iaia:

9 Kua tuatua oki aia, e kua oti rai; kua akaue aia, e kua mou atura.

10 Te akakore nei a Iehova i te uruoaanga a te au etene; te akariro nei i tei akakoroia e te au tangata ra ei mea puapinga kore.

11 Te akakoro a Iehova ra, ka tu ïa e rimua; te manako o tona ngakau ki tera uki ki tera uki.

12 E ao to te enua ko Iehova to ratou Atua; te au tangata i ikiia e ia ei tuanga nana.

13 Ko Iehova tei akara mai na runga mai i te rangi; te akara maira i te au tamariki ravarai a te tangata nei:

14 Te ngai i nooia e ia ra, tana ïa akara anga mai i to te ao katoa nei:

15 Koia anake ra tei akaarite i to ratou ngakau, e koia tei kimi matatio mai i ta ratou katoa i rave ra.

16 Kare e ariki i ora i te rainga o tona nuku, kare e tangata maroiroi i ora i te ririnui.

17 E mea puapinga kore te oroenua ei ora; kare oki e tangata e ora i tona ririnui.

18 I na! tei runga to Iehova mata i te aronga i mataku iaia; i runga i te aronga i irinaki i tona ra aroa:

19 E akaora i to ratou vaerua i te mate; e kia ora oki ratou i te onge ra.

20 Te tapapa nei to tatou vaerua ia Iehova: ko to tatou ïa tauturu, e to tatou ïa paruru.

21 E rekareka oki to tatou ngakau iaia; te irinaki nei oki tatou i tona ingoa tapu.

22 Kia vai marie rai to aroa, e Iehova, ki runga ia matou, mei ia matou nei e irinaki atu ia koe ra.